നിരവധി ക്രിമിനല്‍ക്കേസുകളില്‍ പ്രതിയായ ഗുണ്ട യുവാവിനെ തല്ലിക്കൊന്നു മൃതദേഹവുമായി പൊലീസ് സ്റ്റേഷനു മുന്നിലെത്തി. കോട്ടയം കളക്ടറേറ്റിനു സമീപം മുട്ടമ്പലം ഉറുമ്പനത്ത് ഷാരോണ്‍ ബാബുവിനെയാണ് ഗുണ്ടാ സംഘം അടിച്ചും ഇടിച്ചും കൊലപ്പെടുത്തിയത്.

സംഭവവുമായി ബന്ധപ്പെട്ട് നിരവധി ക്രിമിനല്‍ക്കേസുകളില്‍ പ്രതിയായ പിഡബ്യുഡി റസ്റ്റ് ഹൗസിനു സമീപം വാടകയ്ക്കു താമസിക്കുന്ന കോതമന വീട്ടില്‍ ജോമോന്‍ കെ.ജോസ് (കെ.ഡി ജോമോനെ -40) കോട്ടയം ഈസ്റ്റ് പൊലീസ് കസ്റ്റഡിയില്‍ എടുത്തു.

ഞായറാഴ്ച രാത്രിയിലായിരുന്നു കേസിനാസ്പദമായ സംഭവം. നിരവധി ക്രിമിനല്‍ക്കേസില്‍ പ്രതിയായ ജോമോന്‍ മുന്‍പ് നഗരമധ്യത്തില്‍ ഓട്ടോഡ്രൈവറെ ആക്രമിച്ച് പരിക്കേല്‍പ്പിച്ച് കവര്‍ച്ച നടത്തിയ കേസിലടക്കം പ്രതിയായിരുന്നു. ഇയാള്‍ക്കെതിരെ കാപ്പ ചുമത്തുന്നതടക്കമുളള നടപടികള്‍ പൊലീസ് ആരംഭിച്ചിരുന്നു. ഇതിനിടെയാണ് ഞായറാഴ്ച രാത്രിയില്‍ കഞ്ചാവിന്റെയും മദ്യത്തിന്റെയും ലഹരിയില്‍ ജോമോനും സംഘവും ഷാരോണിനെ ആക്രമിച്ചത്. ആക്രമണത്തില്‍ ഷാരോണിന് ഗുരുതരമായി പരിക്കേറ്റു.

ഇതേ തുടര്‍ന്നു ജോമോന്‍ ഷാരോണിനെയുമായി ഈസ്റ്റ് പൊലീസ് സ്റ്റേഷനു മുന്നിലെത്തി. ഞാന്‍ ഇയാളെ കൊലപ്പെടുത്തിയെന്ന വീരവാദവുമായി ജോമോന്‍ പൊലീസ് സ്റ്റേഷനു മുന്നിലെത്തുകയായിരുന്നു. തുടര്‍ന്നു ജോമോനെ കസ്റ്റഡിയിലെടുത്ത പൊലീസ് സംഘം, ഷാരോണിനെ ആശുപത്രിയില്‍ എത്തിച്ചു. എന്നാല്‍, ആശുപത്രിയില്‍ എത്തിച്ചെങ്കിലും ഷാരോണ്‍ മരിച്ചിരുന്നു. ഇതേ തുടര്‍ന്നു ജോമോനെ സ്റ്റേഷനു മുന്നില്‍ നിന്നു തന്നെ പൊലീസ് സംഘം കസ്റ്റഡിയില്‍ എടുത്തു. പ്രതിയുടെ അറസ്റ്റ് ഇന്ന് രേഖപ്പെടുത്തും.

2021 നവംബര്‍ 19 നാണ് ജോമോനെ കാപ്പ ചുമത്തി ജില്ലാ പൊലീസ് മേധാവി ജില്ലയില്‍ നിന്നും നാട് കടത്തിയത്. കാപ്പയുടെ നിരോധനം ലംഘിച്ച് ജില്ലയില്‍ പ്രവേശിച്ചാല്‍ മൂന്നു വര്‍ഷം വരെ തടവ് ശിക്ഷ ലഭിക്കുമെന്നായിരുന്നു പ്രഖ്യാപനം. എന്നാല്‍, കാപ്പയുടെ വിലക്ക് നിലനില്‍ക്കെയാണ് പ്രതി ജില്ലയില്‍ എത്തി ക്രൂരമായ കൊലപാതകം നടത്തിയിരിക്കുന്നത്.