കഴിഞ്ഞ ദിവസമാണ് അമേരിക്കയിലെ ചികിത്സയ്ക്ക് ശേഷം മുഖ്യമന്ത്രി ദുബായി എത്തിയത്. എന്നാൽ മുഖ്യമന്ത്രി പിണറായി വിജയന്റെയും ഭാര്യ കമലയുടെയും ദുബായിൽ നിന്നുള്ള ചിത്രം ഇന്നലെ സോഷ്യൽ മീഡിയയിൽ വൈറലായി മരുകയായിരുന്നു. പതിവ് രീതിയിലുള്ള ഖദർ ഷർട്ടിനും മുണ്ടിനും പകരം പാന്റും ഷർട്ടുമായിരുന്നു മുഖ്യമന്ത്രിയുടെ വേഷം എന്നത്. ഇപ്പോഴിതാ മുഖ്യമന്ത്രിയുടെ വേഷത്തെ വാനോളം പ്രശംസിച്ച് നടൻ ഹരീഷ് പേരടി രംഗത്ത് എത്തിയിരിക്കുകയാണ്.

എഴുപത് കഴിഞ്ഞവരിൽ എല്ലാ വേഷവും ചേരുന്ന ഒരാൾ മമ്മൂട്ടിയാണെന്നായിരുന്നു താൻ ഇതുവരെ വിചാരിച്ചിരുന്നതെന്നും, എന്നാൽ സഖാവ് പൊളിച്ചെന്നുമാണ് ഹരീഷ് പേരടി കുറിക്കുന്നത്. ജീവിക്കുന്ന കാലത്തിനനുസരിച്ച് രാഷ്ട്രീയത്തെ പുതുക്കാൻ വേഷങ്ങൾക്ക് വലിയ പ്രാധാന്യമുണ്ടെന്നും അദ്ദേഹം വ്യക്തമാക്കി. ഫേസ്ബുക്ക് കുറിപ്പിലൂടെയായിരുന്നു നടന്റെ പ്രതികരണം.

ഫേസ്ബുക്ക് പോസ്റ്റിന്റെ പൂർണ്ണരൂപം ഇങ്ങനെ;

സഖാവേ ഇത് തകർത്തു... 70 വയസ് കഴിഞ്ഞവരിൽ എല്ലാ വേഷങ്ങളും ചേരുന്ന ഒരാൾ മമ്മുക്കയാണെന്നായിരുന്നു എന്റെ ഇതുവരെയുള്ള ധാരണ... നിങ്ങൾ അതിനെയും പൊളിച്ചു... എന്തായാലും ടീച്ചറുടെ അടുത്ത് എത്തില്ല.. വേഷത്തിൽ സഖാവിനെക്കാൾ ഒരു അഞ്ച് മാർക്ക് ഞാൻ ടീച്ചർക്ക് കൊടുക്കും... ജീവിക്കുന്ന കാലത്തിനനുസരിച്ച് രാഷ്ട്രീയത്തെ പുതുക്കാൻ വേഷങ്ങൾക്ക് വലിയ പ്രാധാന്യമുണ്ട്...

പഴയ കോലങ്ങൾ മാറ്റുമ്പോൾ തന്നെയാണ് പുതിയ ചിന്തകൾക്കും പ്രസ്ക്തിയേറുന്നത്.. കരിപുരണ്ട പഴയ തീവണ്ടിയേക്കാൾ ഭംഗിയില്ലേ നമ്മുടെ സ്വപ്നത്തിലെ കെ.റെയിലിന് ... അതുകൊണ്ട്തന്നെ നിങ്ങൾ രണ്ടുപേരുടെയും ഈ ആധുനികതക്ക്, പുതിയ വേഷത്തിന് സമകാലിക കേരളരാഷ്ട്രീയത്തിൽ വലിയ പ്രസ്ക്തിയുണ്ട്... കൃത്യമായ രാഷ്ട്രീയമുണ്ട്... ലാൽസലാം.