വയനാട് ദുരിത ബാധിതര്ക്കായി സര്ക്കാര് നിര്മിച്ചു നല്കുന്ന ടൗണ്ഷിപ്പിലെ വീട് സന്ദര്ശിച്ച് മന്ത്രി കെ.രാജന്
വയനാട് മുണ്ടക്കൈ-ചൂരല്മല ദുരിത ബാധിതര്ക്കായി സര്ക്കാര് നിര്മിച്ചു നല്കുന്ന ടൗണ്ഷിപ്പിലെ വീട്ടില് വിള്ളല് കണ്ടെത്തിയെന്ന ആക്ഷേപങ്ങള്ക്കു പിന്നാലെ ടൗണ്ഷിപ്പിലെ വീട് നേരിട്ട് സന്ദര്ശിച്ച് റവന്യൂ മന്ത്രി കെ.രാജന്. മേല്ക്കൂരയില് വെള്ളം കിനിഞ്ഞു വന്ന പാടുണ്ടെന്നല്ലാതെ വിള്ളല് ഉണ്ടായിട്ടില്ലെന്ന് മന്ത്രി പറഞ്ഞു. വിള്ളല് കണ്ടെത്തിയ വീടിന്റെ മേല്ക്കൂരയില് മന്ത്രി തന്നെ നേരിട്ട് ഉരച്ചുനോക്കി പരിശോധനയും നടത്തി.
വെള്ളം കിനിയുന്നില്ലെന്ന് ഉറപ്പാക്കി വാട്ടര് പ്രൂഫിങ് കൂടി പൂര്ത്തിയാക്കിയ ശേഷം മാത്രമേ വീടുകളില് ആളുകളെ താമസിപ്പിക്കുകയുള്ളു. ഇത് സാധാരണ വിള്ളലാണെന്ന സംശയം ആര്ക്കെങ്കിലും ഉണ്ടോ? എനിക്ക് സംശയം ഇല്ല. – മേല്ക്കൂരയില് വിളളലുണ്ടായെന്നു പറയപ്പെടുന്ന ഭാഗം ഉരച്ചുനോക്കിയ ശേഷം മന്ത്രി പറഞ്ഞു. ദുരന്തബാധിതര്ക്ക് 20 മാസവും വാടകയും ദിനബത്തയും കൂപ്പണും മുടങ്ങാതെ നല്കിയിട്ടുണ്ട്. അതൊന്നും സര്ക്കാരിന്റെ ഔദാര്യമായി കാണുന്നില്ല. നാട്ടിലെ ജനങ്ങളുടെ അവകാശമാണ്. രാജ്യത്ത് ആദ്യമായിട്ടായിരിക്കും ദുരന്തബാധിതര്ക്ക് മുടങ്ങാതെ ഇത്രയും കാലം സഹായം നല്കുന്നത്. കേരളത്തിലും മുമ്പ് ഇത്തരം അനുഭവമുണ്ടായിട്ടില്ല. ടൗണ്ഷിപ്പില് താമസം തുടങ്ങിയശേഷം പ്രശ്നങ്ങള് വന്നാല് ഊരാളുങ്കല് സമാധാനം പറയേണ്ടിവരും. അത് സര്ക്കാരിന്റെ ഗ്യാരണ്ടിയാണ്.
വീട്ടില് ചോര്ച്ചയുണ്ടെന്നു ഗുണഭോക്താക്കള് പരാതി നല്കിയതിനെ തുടര്ന്ന് അധികൃതര് സ്ഥലത്തെത്തി പരിശോധന നടത്തിയിരുന്നു. വീടുകളുടെ നിര്മാണത്തിലെ അപാകതകള് പരിഹരിക്കാന് ആവശ്യമായ എല്ലാ നടപടികളും സര്ക്കാര് സ്വീകരിക്കുമെന്നും മന്ത്രി ഉറപ്പുനല്കി. വീടുകളില് പ്രത്യേക പരിശോധനകള് നടത്തി പ്രശ്നം പൂര്ണമായും പരിഹരിക്കുമെന്നും അധികൃതര് വിശദീകരിച്ചു.
വിള്ളലില് ആശങ്ക വേണ്ടെന്ന് ഊരാളുങ്കല് സിഇഒ അരുണ് ബാബു പറഞ്ഞു. സ്ട്രക്ചറില് എന്തെങ്കിലും പ്രശ്നമുണ്ടോ എന്ന് കണ്ടെത്താനായി പരിശോധന നടത്തും. ഉടമസ്ഥരുടെ എല്ലാ ആശങ്കയും പരിഹരിക്കും. ഗൃഹനാഥനെ സാക്ഷിയാക്കിയായിരിക്കും പരിശോധന നടത്തുക. ഇതിനു ശേഷം ബാക്കി നടപടികള് തീരുമാനിക്കുമെന്നും ടെറസ് മുഴുവന് വാട്ടര് പ്രൂഫിങ് നടത്തുമെന്നും ഫൈബര് കൂടി ചേര്ത്ത് കോണ്ക്രീറ്റിങ് നടത്തുമെന്നും അദ്ദേഹം പറഞ്ഞു.
അതേസമയം, മന്ത്രി കെ.രാജനെതിരെ ടൗണ്ഷിപ്പിലെ വിള്ളല് കണ്ടെത്തിയ വീടിന്റെ ഉടമസ്ഥന് നൗഫല് രംഗത്തെത്തി. ഉടമസ്ഥനായ തന്നോട് ഒന്നും ചോദിക്കാതെയാണ് മന്ത്രി കാര്യങ്ങള് ചെയ്തതെന്നും മന്ത്രിക്ക് കിളി പോയതുപോലെയാണ് തോന്നിയതെന്നും നൗഫല് പറഞ്ഞു. വിള്ളല് വന്ന് മാര്ക്ക് ചെയ്തത് മാത്രം മായ്ക്കാനാണ് മന്ത്രി ശ്രമിച്ചത്. വിള്ളല് വന്ന ഭാഗം മന്ത്രി തൊട്ടില്ല. മേല്ക്കൂരയില് നോക്കിയാല് വിള്ളല് കൃത്യമായി മനസ്സിലാകുമെന്നും വിള്ളല് ഉണ്ടെന്ന് തുറന്നു പറഞ്ഞതിന് പിന്നാലെ തനിക്ക് ഭീഷണിയുണ്ടായെന്നും നൗഫല് പറഞ്ഞു. എല്ലാവരും ചോറ് തന്നെയല്ലേ കഴിക്കുന്നത് എന്നും നൗഫല് ചോദിച്ചു.
https://www.facebook.com/Malayalivartha
