മലയാളികള്‍ക്ക് ഏറെ പ്രിയപ്പെട്ട താരമാണ് നവ്യ നായര്‍. 2002 ല്‍ രഞ്ജിത്ത് സംവിധാനം ചെയ്ത നന്ദനം എന്ന ചിത്രത്തിലൂടെ മലയാള സിനിമയില്‍ അരങ്ങേറ്റം കുറിച്ച നവ്യക്ക് മികച്ച സിനിമകളുടെ ഭാഗമാവാന്‍ സാധിച്ചിട്ടുണ്ട്. വിവാഹത്തിന് ശേഷം സിനിമയില്‍ നിന്നും ഇടവേളയുടുത്ത നവ്യ വീണ്ടും സജീവമാവുകയാണ്. കഴിഞ്ഞ വര്‍ഷം പുറത്തിറങ്ങിയ പാതിരാത്രി ആയിരുന്നു നവ്യയുടെതായി അവസാനമെത്തിയ ചിത്രം. അടുത്തിടെ നവ്യയുടെ ഭര്‍ത്താവിന്റെ മാതാവ് മരണപ്പെട്ടിരുന്നു. പിന്നാലെ നവ്യ സമൂഹമാധ്യമങ്ങളില്‍ പങ്കുവച്ച കുറിപ്പും ശ്രദ്ധേയമായിരുന്നു തന്നെ മരുമകളായിട്ടല്ല മകളെയാണ് അമ്മ സ്‌നേഹിച്ചതെന്നും, തന്റെ നൃത്തം ഏറെ ഇഷ്ടപെട്ട അമ്മ, അവസാനമായി മാതംഗി ഫെസ്റ്റിവലില്‍ വന്നു തന്റെ കച്ചേരി മുഴുവന്‍ കണ്ടുവെന്നും നവ്യ അന്ന് കുറിച്ചിരുന്നു.

എന്നാല്‍ കഴിഞ്ഞ ദിവസം വിഷു ചിത്രങ്ങള്‍ പങ്കുവച്ച നവ്യക്കെതിരെ സമൂഹ മാധ്യമങ്ങളില്‍ വിമര്‍ശനം ഉയര്‍ന്നുവന്നിരുന്നു. 'അമ്മായിയമ്മ മരിച്ചിട്ട് ഒരു മാസം ആയിട്ടേ ഒള്ളൂ ഇവര്‍ക്കൊക്കെ ആഘോഷിക്കാലോ', 'ആ കൊച്ചിന്റെ അച്ഛമ്മ അല്ലേ കുറച്ചു ദിവസം മുന്‍പേ മരിച്ചത്, എന്നിട്ടാണോ ആഘോഷം', നമ്മുടെ പാരമ്പര്യം അനുസരിച്ച് നമ്മള്‍ ഒരു വര്‍ഷം കഴിയാതെ ആഘോഷിക്കാറില്ലല്ലോ' എന്ന് തുടങ്ങീ നിരവധി കമന്റുകളാണ് നവ്യയുടെ വിഷു ചിത്രങ്ങള്‍ക്ക് താഴെ എത്തുന്നത്.

എന്നാല്‍ നിരവധി പേര്‍ നവ്യയെ പിന്തുണച്ചും കമന്റ് ചെയ്യുന്നുണ്ട്. നാട്ടുകാരുടെ കാര്യം നോക്കാതെ സ്വന്തം കാര്യം നോക്കിക്കൂടെ, ആളുകള്‍ സന്തോഷമായിട്ട് ഇരിക്കുന്നതില്‍ എന്തിനാണ് ഇത്രേം വിഷമം, ആരെങ്കിലും മരിച്ചുപോയാല്‍ ജീവിതകാലം മുഴുവന്‍ ദുഃഖിച്ച് ഇരിക്കണോ എന്ന് തുടങ്ങീ നിരവധി കമന്റുകളും വിമര്‍ശനത്തിനെതിരെ വരുന്നുണ്ട്.