ടി20 ക്രിക്കറ്റില്‍ ചരിത്ര നേട്ടവുമായി ഇന്ത്യന്‍ വനിതാ ടീം വൈസ് ക്യാപ്റ്റനും ഓപ്പണറുമായ സ്മൃതി മന്ധാന. അന്താരാഷ്ട്ര ടി20 ഫോര്‍മാറ്റില്‍ ഏറ്റവും കൂടുതല്‍ റണ്‍സ് നേടുന്ന ഇന്ത്യന്‍ താരമെന്ന നേട്ടവുമായി സ്മൃതി. പുരുഷ, വനിതാ താരങ്ങളില്‍ സ്മൃതിയാണ് മുന്നില്‍ എന്നതാണ് റെക്കോര്‍ഡിന്റെ തിളക്കം വർദ്ധിപ്പിക്കുന്നത്.

മുന്‍ ഇന്ത്യന്‍ ക്യാപ്റ്റന്‍ രോഹിത് ശര്‍മയുടെ നേട്ടമാണ് സ്മൃതി സ്വന്തം പേരിലേക്ക് മാറ്റിയത്. ദക്ഷിണാഫ്രിക്ക വനിതാ ടീമിനെതിരെ ടി20 പരമ്പരയിലെ ആദ്യ പോരില്‍ 1 റണ്‍സെടുത്താണ് സ്മൃതി നേട്ടത്തിലെത്തിയത്.

മത്സരത്തില്‍ പക്ഷേ സ്മൃതിയ്ക്കു തിളങ്ങാൻ കഴിഞ്ഞില്ല. താരം 13 റണ്‍സുമായി മടങ്ങുകയായിരുന്നു. നിലവില്‍ 4,244 റണ്‍സാണ് താരം സ്വന്തമാക്കിയത്. രോഹിത് 4,231 റണ്‍സാണ് ടി20 ഫോര്‍മാറ്റില്‍ അടിച്ചെടുത്തത്. 161 മത്സരങ്ങളില്‍ നിന്നാണ് സ്മൃതി 4,244 റണ്‍സിലെത്തിയത്. സ്‌ട്രൈക്ക് റേറ്റ് 124.45. ആവറേജ് 30.53. ഒരു സെഞ്ച്വറിയും 33 അര്‍ധ സെഞ്ച്വറികളും ടി20 ഫോര്‍മാറ്റില്‍ സ്മൃതി കരസ്ഥമാക്കിയിട്ടുണ്ട്.