മണ്ഡല പുനര്‍നിര്‍ണയം ചില സംസ്ഥാനങ്ങള്‍ക്ക് തിരിച്ചടിയാകുമെന്ന് കോണ്‍ഗ്രസ് നുണ പ്രചരിപ്പിച്ചുവെന്ന് പ്രധാനമന്ത്രി നരേന്ദ്രമോദി. എല്ലാ സംസ്ഥാനങ്ങളുടെയും സീറ്റ് നില ഒരേ അനുപാതത്തില്‍ ആയിരിക്കും വര്‍ധിക്കുക. എല്ലാവര്‍ക്കും ഒരു അവസരമായിരുന്നു. ബില്ല് പാസായാല്‍ കേരളത്തിലും തമിഴ്‌നാട്ടിലും ബീഹാറിലും ബംഗാളിലും സീറ്റുകള്‍ വര്‍ധിക്കുമായിരുന്നു. സ്ത്രീകളുടെ അവകാശങ്ങള്‍ കൊള്ളയടിക്കുകയാണ് കോണ്‍ഗ്രസ് ചെയ്യുന്നതെന്ന് അദ്ദേഹം രാജ്യത്തെ അഭിസംബോധന ചെയ്തുകൊണ്ട് സംസാരിച്ചു.

ബില്ല് പാസായിരുന്നുവെങ്കില്‍ ഡിഎംകെയ്ക്ക് കൂടുതല്‍ തമിഴരെ പാര്‍ലമെന്റിലേക്ക് കൊണ്ടുവരാമായിരുന്നു. തൃണമൂല്‍ കോണ്‍ഗ്രസിനും ഇതേ അവസരം ഉണ്ടായിരുന്നു. സമാജവാദി പാര്‍ട്ടിക്കും സാധിക്കുമായിരുന്നു, കേരളമടക്കം എല്ലാ സംസ്ഥാനങ്ങളും സീറ്റ് വര്‍ധിക്കുമായിരുന്നു. എന്നാല്‍ ഇവര്‍ സ്വന്തം സംസ്ഥാനങ്ങളെയാണ് വഞ്ചിച്ചത്. കോണ്‍ഗ്രസ് വികസനങ്ങളെയും പരിഷ്‌കാരങ്ങളെയും എതിര്‍ക്കുന്ന പാര്‍ട്ടിയാണ്. യു.പിയിലെ ജനങ്ങള്‍ സമാജ് വാദി പാര്‍ട്ടിയോട് പൊറുക്കില്ല. ഡിഎംകെ തമിഴ്‌നാടിനെ വഞ്ചിച്ചുവെന്നും പ്രധാനമന്ത്രി കുറ്റപ്പെടുത്തി.

മുത്തലാഖ് നിരോധിക്കുന്നതും ആര്‍ട്ടിക്കിള്‍ 370 റദ്ദാക്കുന്നതും യുസിസി യും കോണ്‍ഗ്രസ് എതിര്‍ത്തു. പരിഷ്‌കാരങ്ങള്‍ എന്ന് കേട്ടാലേ കോണ്‍ഗ്രസിന് വെറുപ്പാണ്. ഡിജിറ്റല്‍ പണമിടപാട്, ജി.എസ്.ടി എന്നിവയെ കോണ്‍ഗ്രസ് എതിര്‍ത്തു.ഒരു രാജ്യം ഒരു തിരഞ്ഞെടുപ്പിനെ എതിര്‍ക്കുന്നു,എസ്.ഐ.ആറിനെ എതിര്‍ക്കുന്നു
നുഴഞ്ഞുകയറ്റക്കാരെ പുറത്താക്കുന്നത് എതിര്‍ക്കുന്നു. രാജ്യത്തിന്റെ നല്ലതിനായി കൊണ്ട് വരുന്ന എല്ലാത്തിനെയും എതിര്‍ക്കുന്നു. മാവോയിസ്റ്റ് മുക്തമാക്കാനുള്ള ശ്രമങ്ങള്‍ കോണ്‍ഗ്രസ് എതിര്‍ക്കുകയാണ് ചെയ്തതെന്നും അദ്ദേഹം പറഞ്ഞു.

1947 ല്‍ ഇന്ത്യക്കൊപ്പം മറ്റു പല രാജ്യങ്ങളും സ്വാതന്ത്ര്യം നേടി എന്നാല്‍ പലരും ഇന്ത്യയെക്കാള്‍ ഒരുപാട് മുന്നേറി.വികസനങ്ങളെയും പരിഷ്‌കാരങ്ങളെയും എതിര്‍ക്കുന്ന കോണ്‍ഗ്രസിന്റെ സമീപനമാണ് എല്ലാത്തിനും കാരണം. കോണ്‍ഗ്രസിന്റെ ഈ നെഗറ്റീവ് രാഷ്ട്രീയമാണ് രാജ്യത്തിന്റെ വളര്‍ച്ച തടഞ്ഞത്. പരിഷ്‌കാരങ്ങളെ കുറിച്ച് നുണയും ഒഴിവു കഴിവുകളും കോണ്‍ഗ്രസ് പറഞ്ഞു. പോരാട്ടം കോണ്‍ഗ്രസിന്റെ വികസന വിരുദ്ധ നയങ്ങള്‍ക്ക് എതിരെയാണെന്നും പ്രധാനമന്ത്രി കൂട്ടിച്ചേര്‍ത്തു.