നവകേരള നിർമ്മിതിയ്ക്കായി സർക്കാർ മുന്നോട്ടു വയ്ക്കുന്ന നയങ്ങളും നടപ്പാക്കുന്ന പ്രവർത്തനങ്ങളും ഗവർണർ ഇന്ന് സഭയിൽ അവതരിപ്പിച്ചുവെന്ന് വ്യക്തമാക്കി മുഖ്യമന്ത്രി പിണറായി വിജയൻ. അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ; പുതിയ കാലത്തെ വെല്ലുവിളികൾ ഏറ്റെടുത്ത് കേരളത്തിൻ്റെ പുരോഗതിയ്ക്ക് ഊർജ്ജം പകരുക, സാമൂഹ്യക്ഷേമം കൂടുതൽ സമഗ്രവും ഫലപ്രദവുമാക്കുക, സുസ്ഥിരവികസനം പൂർണതയോടെ കൈവരിക്കാൻ സാധിക്കുക -

ഈ ലക്ഷ്യങ്ങളിൽ ഊന്നിയാണ് കേരള സർക്കാർ മുന്നോട്ടു പോകുന്നതെന്ന് നിയമസഭ സമ്മേളനത്തിനു മുന്നോടിയായി നടന്ന നയപ്രഖ്യാപന പ്രസംഗത്തിൽ ബഹുമാനപ്പെട്ട ഗവർണർ ആരിഫ് മുഹമ്മദ് ഖാൻ വ്യക്തമാക്കി. ഈ കാലയളവിൽ പ്രതിസന്ധികൾ നിരവധിയുണ്ടായിട്ടും നീതി ആയോഗിൻ്റെ സുസ്ഥിര വികസന സൂചിക ഉൾപ്പെടെ നിരവധി സൂചികകളിൽ കേരളം ഒന്നാമതെത്തിയത് ഈ ലക്ഷ്യത്തോട് സർക്കാർ പുലർത്തുന്ന ആത്‌മാർഥമായ സമീപനത്തിൻ്റെ പ്രതിഫലനമാണ്.

വിദ്യാഭ്യാസം, ആരോഗ്യം, ശുചിത്വം, പ്രകൃതിവിഭവ പരിപാലനം തുടങ്ങിയ സുപ്രധാന മേഖലകളെ പുതിയ ഉയരങ്ങളിലേയ്ക്ക് കൊണ്ടുപോകുന്നതിനൊപ്പം മെച്ചപ്പെട്ട ഉത്പാദനത്തിലൂടെയും വർദ്ധിച്ച തൊഴിൽ അവസരങ്ങളിലൂടെയും സംസ്ഥാനത്തിൻ്റെ സമ്പദ് വ്യവസ്ഥ ശക്തമാക്കുക എന്നതാണ് സർക്കാരിൻ്റെ നയമെന്ന് ഗവർണർ വിശദീകരിച്ചു.

കേന്ദ്രീകൃതവും കാര്യക്ഷമവുമായ ഭരണനിർവഹണം ഉറപ്പു വരുത്താനും അതിനെ ജനകീയവൽക്കരിക്കാനും സർക്കാർ പ്രതിജ്ഞാബദ്ധമാണ്. കാലാനുസൃതമായ ഇടപെടലുകളിലൂടെ കേരളത്തിനു അനുഗുണമായ വിജ്ഞാനസമ്പദ് വ്യവസ്ഥ പടുത്തുയർത്താൻ ആവശ്യമായ ശ്രമങ്ങളും കൂടുതൽ ഊർജ്ജിതമാക്കും. ഇത്തരത്തിൽ നവകേരള നിർമ്മിതിയ്ക്കായി സർക്കാർ മുന്നോട്ടു വയ്ക്കുന്ന നയങ്ങളും നടപ്പാക്കുന്ന പ്രവർത്തനങ്ങളും ഗവർണർ ഇന്ന് സഭയിൽ അവതരിപ്പിച്ചു.