സ്വപ്ന സുരേഷ് വലതുകാല്‍ വച്ച് ജോലിയില്‍ പ്രവേശിച്ച അന്നു തന്നെ വിവാദമുണ്ടായി. സ്വപ്നയെ പിരിച്ചുവിടും എന്ന തരത്തിലുള്ള വാര്‍ത്തയും വന്നു. ഇതിനിടെ സ്വപ്ന ജോലി ചെയ്യുന്ന സ്ഥാപനത്തിനെതിരെ കേസുമായി. അതിനിടെ സ്വപ്ന സുരേഷ് വിവാദത്തില്‍ പ്രതികരിച്ചു.

തനിക്കു ലഭിച്ച ജോലി സംബന്ധിച്ച വിവാദങ്ങള്‍ക്കു പിന്നിലും മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കര്‍ ആണെന്ന ആരോപണവുമായാണ് സ്വപ്ന സുരേഷ് രംഗത്ത് വന്നത്. 'ഇപ്പോഴത്തെ എല്ലാ ആരോപണങ്ങള്‍ക്കു പിന്നിലും എന്തൊക്കെയോ ഉദ്ദേശ്യമുണ്ട്. എം.ശിവശങ്കറിനോട് എനിക്ക് ഒന്നേ പറയാനുള്ളൂ, നിങ്ങള്‍ക്ക് എന്നെ കൊല്ലാനുള്ള എല്ലാ അവകാശവുമുണ്ട്. എനിക്കും കുട്ടികള്‍ക്കും അമ്മയ്ക്കും കുറച്ചു വിഷം നല്‍കി കൊല്ലുക. നിങ്ങള്‍ നല്‍കുന്ന വിഷം കഴിച്ച് മരിക്കാന്‍ ഞങ്ങള്‍ക്കു സന്തോഷമേയുള്ളൂ. അല്ലാതെ ഇങ്ങനെ ഉപദ്രവിക്കരുത്' എന്നും സ്വപ്ന പറഞ്ഞു.

ജോലി തന്ന എച്ച്ആര്‍ഡിഎസിന് രാഷ്ട്രീയ ബന്ധമുണ്ടെന്ന ആരോപണം സ്വപ്ന തള്ളി. അവര്‍ നല്‍കിയ ഓഫര്‍ താന്‍ സ്വീകരിക്കുകയായിരുന്നു. അവര്‍ക്ക് രാഷ്ട്രീയ ബന്ധമുണ്ടോയെന്നൊന്നും അറിയില്ല. ജീവിക്കാന്‍ നിവൃത്തിയില്ലാതെ നില്‍ക്കുന്ന തനിക്ക് ജോലി തിരഞ്ഞെടുക്കാന്‍ ഒരുപാട് അവസരങ്ങളൊന്നുമില്ല. ജീവിക്കാന്‍ അനുവദിക്കണമെന്ന് അപേക്ഷിക്കുകയാണ് എല്ലാവരോടും. ജോലിയില്‍ മാറ്റമൊന്നുമില്ലെന്നു കമ്പനി അറിയിച്ചതായും സ്വപ്ന പറഞ്ഞു.


പുതിയ ജോലി ലഭിച്ചതിനു പിന്നിലെ വിവാദങ്ങളെക്കുറിച്ച് ഒന്നും അറിയില്ലെന്നു സ്വപ്ന സുരേഷ് പറഞ്ഞു. വെള്ളിയാഴ്ചയാണു സ്വപ്ന തൊടുപുഴയിലെ ഓഫിസിലെത്തി എച്ച്ആര്‍ഡിഎസ് ഡയറക്ടറായി ചുമതലയേറ്റത്. ഇപ്പോള്‍ താന്‍ എച്ച്ആര്‍ഡിഎസിന്റെ ജോലിക്കാരിയാണെന്നു സ്വപ്ന പ്രതികരിച്ചു.



ഈ സ്ഥാപനവുമായി നേരത്തേ ഒരു ബന്ധവും ഉണ്ടായിരുന്നില്ല. പ്രതിസന്ധി ഘട്ടത്തില്‍ ലഭിച്ച സഹായമാണു ജോലിയെന്നും സ്വപ്നപറഞ്ഞു. ജോലി ലഭിക്കുന്നതിനായി ഒരുപാടു പേരെ സമീപിച്ചിരുന്നു. ജോലി തരാന്‍ പേടിയാണെന്നു പലരും പറഞ്ഞു. അനില്‍ എന്നൊരു സുഹൃത്ത് വഴിയാണ് എച്ച്ആര്‍ഡിഎസില്‍ ജോലിക്ക് അവസരം കിട്ടിയത്.

രണ്ടു റൗണ്ട് അഭിമുഖങ്ങള്‍ക്കു ശേഷമായിരുന്നു നിയമനം. സ്ഥാപനത്തിന്റെ രാഷ്ട്രീയത്തെക്കുറിച്ച് അറിയില്ല. എന്റെ നിയമനത്തിലേക്ക് എന്തിനാണ് എല്ലാവരും രാഷ്ട്രീയം വലിച്ചിടുന്നത് വരുമാനം ഉണ്ടായാലേ മക്കളുടെ കാര്യങ്ങള്‍ നോക്കാനാകൂ. എന്നെ കൊല്ലണമെങ്കില്‍ കൊല്ലൂ, അല്ലാതെ ഇങ്ങനെ ദ്രോഹിക്കരുത്. ഞാനെന്റെ മക്കളെ വളര്‍ത്തട്ടെ, ജീവിക്കാന്‍ അനുവദിക്കണമെന്നും സ്വപ്ന പറഞ്ഞു.

സ്വപ്ന പുതിയ ജോലിയില്‍ പ്രവേശിച്ചതിനു പിന്നാലെ അവരുടെ നിയമനം റദ്ദാക്കാന്‍ തീരുമാനിച്ചിരുന്നു. സ്വപ്നയ്ക്കു ജോലി നല്‍കിയതു നിയമവിരുദ്ധമാണെന്നും തനിക്കോ ബോര്‍ഡിനോ പങ്കില്ലെന്നും ഡല്‍ഹി ആസ്ഥാനമായ സര്‍ക്കാരിതര സംഘടനയായ എച്ച്ആര്‍ഡിഎസിന്റെ കോര്‍പറേറ്റ് സോഷ്യല്‍ റെസ്‌പോണ്‍സിബിലിറ്റി ചെയര്‍മാനും ബിജെപി നേതാവുമായ എസ്.കൃഷ്ണകുമാര്‍ പറഞ്ഞു.

അതിനിടെ ആദിവാസികളുടെ പേരില്‍ എന്‍ജിഒകള്‍ നടത്തുന്ന ഫണ്ട് വിനിയോഗത്തെക്കുറിച്ച് സമഗ്ര അന്വേഷണം വേണമെന്ന് കേന്ദ്ര സംസ്ഥാന സര്‍ക്കാരുകളോട് ആവശ്യപ്പെടുമെന്ന് സംസ്ഥാന എസ്‌സി, എസ്ടി കമ്മിഷന്‍. ആരെയും കണക്ക് ബോധിപ്പിക്കാതെ പലരും കോടികളുടെ തട്ടിപ്പാണ് നടത്തുന്നത്. ആദിവാസി മേഖലകളില്‍ സാമൂഹിക സേവനം നടത്തുന്ന എച്ച്ആര്‍ഡിഎസിനെതിരെ കമ്മിഷന്‍ കേസെടുത്തതില്‍ രാഷ്ട്രീയമില്ലെന്നും അംഗം എസ്.അജയകുമാര്‍ പറഞ്ഞു.