ഇത്തരം പരസ്യങ്ങൾ കവർന്നെടുക്കുന്നത് ആയിരക്കണക്കിന് ജീവനുകൾ. പതഞ്ജലിക്കെതിരെ ആഞ്ഞടിച്ച് ഡോ. സുൽഫി നൂഹു. അദ്ദേഹത്തിന്റെ വാക്കുകൾ ഇങ്ങനെ; "ലൈപിഡൊം" മാജിക്? ഡ്രഗ്സ്സ് ആൻഡ് മാജിക് റെമഡീസ് ,ഒബ്ജക്ഷനബിൾ അഡ്വെവെർടൈസ്മെൻറ് ആക്റ്റ് (1954 ) പ്രകാരം ആറ് മാസം കഠിന തടവ് പതഞ്ജലി അഡ്വവർടൈസ്മെൻറ് കൊടുത്ത ആളിന്.

പതാഞ്ജലി കമ്പനിയുടെ എല്ലാവർക്കും ആറുമാസം വീതം. അതാണ് രാജ്യത്തെ നിയമം. ഈ അത്ഭുത മരുന്ന് കൊളസ്ട്രോൾ കുറയ്ക്കുമെന്നും അതുവഴി രക്തസമ്മർദ്ദവും ഹൃദയാഘാതവും പക്ഷാഘാതവും തുടങ്ങി ലോകത്തെ സർവ്വ അസുഖങ്ങളും കുറയ്ക്കുമെന്ന് പരസ്യത്തിലൂടെ അവകാശപ്പെടുന്നു.

അതും പോട്ടെ അതിനുമപ്പുറം ആധുനിക വൈദ്യശാസ്ത്രത്തിൽ ഉപയോഗിക്കുന്ന ചില ജീവൻ രക്ഷിക്കുന്ന മരുന്നുകൾ നിങ്ങളുടെ സർവ്വ അവയവങ്ങളെയും നശിപ്പിച്ചുകളയുമെന്നും പരസ്യം. ഇതെന്താ വെള്ളരിക്കാ പട്ടണമാണോ? ഇത്തരമൊരു പരസ്യം ഇന്ത്യാമഹാരാജ്യത്ത് മാത്രമേ വിൽക്കുകയുള്ളൂ.

ലോകത്തെ ദശലക്ഷക്കണക്കിന് ആൾക്കാരിൽ നടന്ന കൃത്യമായ ശാസ്ത്രീയപഠനങ്ങൾ ആധുനിക വൈദ്യശാസ്ത്രത്തിൽ ഉപയോഗിക്കുന്ന ആസ്പിരിൻ, സ്റ്റാറ്റിൻ തുടങ്ങി കൊളസ്ട്രോൾ നിയന്ത്രിക്കുന്ന, രക്തം കട്ടപിടിക്കാതിരിക്കാൻ ഉപയോഗിക്കുന്ന മരുന്നുകളെല്ലാം ജീവൻ രക്ഷിച്ചു കൊണ്ടിരിക്കുന്നുവെന്ന് നിസ്സംശയം പറയുന്നു.

അപ്പോഴാണ് ഉടായിപ്പ് പരിപാടിയുമായി നിലവിലെ നിയമങ്ങളെയെല്ലാം ലംഘിച്ചുകൊണ്ടുള്ള ഒരു വ്യാജപരസ്യം. മറ്റ് സംസ്ഥാനങ്ങളിലൊക്കെ ചെലവഴിച്ച് കഴിഞ്ഞതിനുശേഷമാകണം മലയാളക്കരയിലും ഇങ്ങനെയൊന്ന് വിറ്റഴിക്കാൻ പതാഞ്ജലിയുടെ ശ്രമം. ഇത് മനുഷ്യൻറെ സാധാരണ ബോധത്തെ ചോദ്യം ചെയ്യുന്ന സാമാന്യബുദ്ധിയെ ചോദ്യം ചെയ്യുന്ന ശാസ്ത്രബോധത്തെ , സയൻറിഫിക് ടെമ്പറിനെ ചോദ്യംചെയ്യുന്ന പരസ്യം.

ഇത്തരം പരസ്യങ്ങൾ കവർന്നെടുക്കുന്നത് ആയിരക്കണക്കിന് ജീവനുകൾ. കൊളസ്ട്രോളിന് മരുന്ന് കഴിക്കുന്നത് കൊളസ്ട്രോൾ ലെവൽ കുറഞ്ഞ തോതിൽ നില നിർത്തുന്നതിന് മാത്രമല്ല മറിച്ച് രക്ത രക്തധമനികളിലെ എന്റൊതീലിയൽ ഡാമേജ് കുറയ്ക്കുവാനും കൂടിയാണ് എന്നറിയാൻ പതാഞ്ജലിയോട് അഭ്യർത്ഥന.

അതുകൊണ്ടുതന്നെ ഹാർട്ട് അറ്റാക്ക് ,സ്ട്രോക്ക് തുടങ്ങി മനുഷ്യനെ കൊന്നൊടുക്കുന്ന പല അസുഖങ്ങളെയും തടഞ്ഞു നിർത്തും ഈ കൊളസ്ട്രോൾ കുറയ്ക്കുന്ന മരുന്നുകൾ, ആസ്പിരിൻ പോലെയുള്ള ഗുളികകൾ രക്തം കട്ടപിടിക്കാതിരിക്കാൻ സഹായിക്കും അതുവഴി പക്ഷാഘാതവും ഹൃദയാഘാതവും തടയും. 

ആസ്പിരിൻ ടാബ്ലറ്റ് വില 1 രൂപ കൊളസ്ട്രോൾ കുറയ്ക്കുന്ന മരുന്നിനും ഏതാണ്ട് അതേ വില ഈ പതഞ്ജലിയുടെ അത്ഭുതം മരുന്നോ ഒന്ന് ചോദിച്ചു നോക്കൂ, തലകറങ്ങി വീഴും വില കിട്ടാൻ. ഇത്തരം പരസ്യങ്ങളിൽ നിയന്ത്രിക്കുവാൻ 1954ലെ മേൽപ്പറഞ്ഞ നിയമം പോര എന്നുള്ളത് ഒരു വസ്തുതയാണ്  നിയമം അവിടെ നിൽക്കട്ടെ.

സ്വന്തം സാമാന്യബോധത്തെ, സാമാന്യബുദ്ധിയെ, ചോദ്യം ചെയ്യുന്ന ഇത്തരം പരസ്യങ്ങളെ വലിച്ചു കീറി ചവറ്റുകുട്ടയിലിടണം ഇല്ലെങ്കിൽ ചിതയിൽ പോകുന്നത് ആയിരക്കണക്കിന് ജീവനുകൾ. ഡോ സുൽഫി നൂഹു. ഐ എം എ കേരള ഘടകം നിയുക്ത സംസ്ഥാന പ്രസിഡൻറ്. സമൂഹ മാധ്യമ വിഭാഗം ചെയർമാൻ, ഐ എം എ കേരള.