ദലിത് വിദ്യാര്ത്ഥികള്ക്ക് മഹാരാജാസ് കോളേജില് പ്രവേശനം നിഷേധിച്ചു; വിദ്യാര്ത്ഥികള് കുടില്കെട്ടി സമരത്തില്
നിയമവിധേയമല്ലാത്ത കാരണങ്ങള് പറഞ്ഞ് ദലിത് വിദ്യാര്ത്ഥികള്ക്ക് എറണാകുളം മഹാരാജാസ് കോളേജ് പ്രിന്സിപ്പാളും മാനേജ്മെന്റ് അധികൃതരും ബിരുദ പ്രവേശനം നിഷേധിച്ചതായി പരാതി. പ്രശ്നം പരിഹരിക്കമെന്നാവശ്യപ്പെട്ട് ആക്ഷന് കൗണ്സിലിന്റെ നേതൃത്വത്തില് വിദ്യാര്ത്ഥികള് കുടില് കെട്ടി അനിശ്ചിതകാല സമരം നടത്തുകയാണ്.
മൂന്ന് പട്ടിക ജാതി വിദ്യാര്ത്ഥികള്ക്കും രണ്ട് പിന്നോക്ക വിദ്യാര്ത്ഥികള്ക്കും ബിരുദ കോഴ്സുകളിലേക്കുള്ള പ്രവേശനത്തിന് 22 വയസ് കഴിഞ്ഞു എന്ന കാരണം പറഞ്ഞാണ് എറണാകുളം മഹാരാജാസ് കോളേജില് അധികൃതര് പ്രവേശനം നിഷേധിച്ചിരിക്കുന്നത്. സ്വാതി സംഗീത്, സേതു കൃഷ്ണന്, സനല് വി എസ്, ജോബിന് പി ജോസ്, കിരണ് ദാസ് എന്നിവര് 2015-16 അദ്ധ്യയന വര്ഷത്തിലെ ബിരുദ കോഴ്സുകള്ക്ക് ഓണ്ലൈനായി അപേക്ഷിക്കുകയും അപേക്ഷ സ്വീകരിക്കപ്പെട്ടതിനെ തുടര്ന്ന് ഫെഡറല് ബാങ്ക് ശാഖയില് അപേക്ഷ ഫീസ് അടക്കുകയും ചെയ്തു.
അഡ്മിഷനായി മഹാരാജാസ് കോളേജ് പ്രസിദ്ധികരിച്ച റാങ്ക് ലിസ്റ്റിലും അലോട്ട്മെന്റ് ലിസ്റ്റിലും ഇവരുടെ പേരുകള് വരുകയും ചെയ്തു. അതേ തുടര്ന്ന് പ്രവേശനത്തിനായി രക്ഷകര്ത്താക്കളുമായി കോളേജില് എത്തിയപ്പോഴാണ് പ്രായ പരിധി പറഞ്ഞ് അധികൃതര് ഇവരെ മടക്കി അയച്ചത്.
കേരള സര്ക്കാരും എംജി യൂണിവേഴ്സിറ്റിയും നിഷ്കര്ഷിക്കുന്ന നിയമങ്ങള്ക്കും നിയന്ത്രണങ്ങള്ക്കും വിധേയമായാണ് എറണാകുളം മഹാരാജാസ് പ്രവര്ത്തിക്കേണ്ടത്. പ്രവേശനത്തിന് എംജി യൂണിവേഴ്സിറ്റി നിഷ്കര്ഷിച്ചിരിക്കുന്ന അടിസ്ഥാന യോഗ്യത പ്ലസ്ടുവോ തത്തുല്യമായ കോഴ്സോ പാസായിരിക്കണമെന്നു മാത്രവും. പ്രായപരിധി സംബന്ധിച്ച യാതൊരു നിര്ദേശവും നല്കുന്നുമില്ല. നിയമവിധേയമല്ലാത്ത കാരണങ്ങള് പറഞ്ഞ് തങ്ങള്ക്ക് പ്രവേശനം നിഷേധിച്ച മഹാരാജാസ് അധികൃതര്ക്കെതിരെ വിദ്യാര്ത്ഥികള് ആക്ഷന് കൗണ്സിലിന്റെ നേതൃത്വത്തില് കോളജിന് എതിര്വശത്ത് കുടില് കെട്ടി സമരം ചെയ്യുകയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
