പോലിസ് തലപ്പത്ത് അഴിച്ചുപണി... നടിയെ ആക്രമിച്ച കേസ് വഴിത്തിരിവില് എത്തിനില്ക്കേയാണ് പുതിയ അഴിച്ചുപണി; ക്രൈംബ്രാഞ്ച് മേധാവി എസ്.ശ്രീജിത്തിനെ ട്രാന്സ്പോര്ട്ട് കമ്മീഷണറായാണ് മാറ്റി
കൊച്ചിയില് നടിയെ ആക്രമിച്ച കേസ് വഴിത്തിരിവില് എത്തിനില്ക്കേ ക്രൈം ബ്രാഞ്ച് മേധാവിയെ അടക്കം മാറ്റി പോലിസ് തലപ്പത്ത് അഴിച്ചുപണി. ദിലീപിന്റെ അഭിഭാഷകനെതിരായ ചോദ്യം ചെയ്യല് നീക്കത്തെ തുടര്ന്നുള്ള പരാതികളാണ് ക്രൈം ബ്രാഞ്ച് മേധാവിയെ മാറ്റാന് കാരണമെന്നാണ് ഉയരുന്ന ആരോപണം. കേസില് എല്ലാ തെളിവുകളും നടന് ദിലീപിനെതിരേയാണെന്നാണ് വിലയിരുത്തല്.
ക്രൈംബ്രാഞ്ച് മേധാവി എസ്.ശ്രീജിത്തിനെ ട്രാന്സ്പോര്ട്ട് കമ്മീഷണറായാണ് മാറ്റി നിയമിച്ചിരിക്കുന്നത്. ഒപ്പം വിജിലന്സ് ഡയറക്ടറെയും ജയില് മേധാവിയെയും ട്രാന്സ്പോര്ട്ട് കമ്മീഷണറെയും മാറ്റിയിട്ടുണ്ട്. സുദേഷ് കുമാര് ജയില് മേധാവിയാകും. ജയില് മേധാവി സ്ഥാനത്ത് നിന്ന് മാറുന്ന ഷെയ്ക്ക് ധര്വേസ് സാഹിബാണ് പുതിയ ക്രൈം ബ്രാഞ്ച് മേധാവി. ട്രാന്സ്പോര്ട്ട് കമ്മീഷണറായിരുന്ന എം.ആര് അജിത് കുമാര് വിജിലന്സ് മേധാവിയാകും.
പാലത്തായിയില് പ്രായപൂര്ത്തിയാവാത്ത പെണ്കുട്ടിയെ ബിജെപി നേതാവ് പീഡിപ്പിച്ച കേസിന്റെ അന്വേഷണത്തിലും ശ്രീജിത്തിനെതിരേ വ്യാപക പരാതി ഉയര്ന്നിരുന്നു. പീഡനക്കേസില് പ്രതിയായ ബിജെപി നേതാവ് പത്മരാജനെ സംരക്ഷിക്കാന് പെണ്കുട്ടിയെ പൊതുമധ്യത്തില് അപമാനിക്കുന്ന നിലപാടാണ് ശ്രീജിത്ത് സ്വീകരിച്ചതെന്ന് ആരോപണം ഉയര്ന്നു.
വിജിലന്സ് ഡയറക്ടര് സുദേഷ് കുമാറിനെതിരെ ഡിജിപി ടോമിന് തച്ചങ്കരി പരാതി നല്കിയിരുന്നു. പ്രമുഖ സ്വര്ണാഭരണ ശാലയില് നിന്നും ആഭരണം വാങ്ങിയ ശേഷം കുറഞ്ഞ തുക നല്കിയെന്ന പരാതിയും വിജിലന്സ് ഡയറക്ടര്ക്കെതിരെയുണ്ടായിരുന്നു. ആഭ്യന്തര സെക്രട്ടറി നടത്തിയ പ്രാഥമിക അന്വേഷണത്തില് പരാതിയി കഴമ്പുണ്ടെന്ന് തെളിഞ്ഞതോടെയാണ് മാറ്റം.
https://www.facebook.com/Malayalivartha
