വാഹനയാത്രക്കാര്‍ റോഡ് നിയമങ്ങള്‍ ലംഘിക്കുന്നത് കണ്ടെത്തുന്നതിനായി മുക്കിനും മൂലയ്ക്കും വരെ ക്യാമറകള്‍ സ്ഥാപിച്ചിരിക്കുകയാണ് പോലീസും മോട്ടോര്‍ വാഹന വകുപ്പും. എന്നാല്‍ ഇതേ ക്യാമറ കാരണം ബുദ്ധിമുട്ടിലായിരിക്കുകയാണ് ഒരു യാത്രക്കാരന്‍. ഉടമസ്ഥൻ റോഡിൽ ഇറക്കി ഓടിക്കാത്ത കാറില്‍ ഹെല്‍മറ്റ് വയ്ക്കാതെ സഞ്ചരിച്ചതിന് മോട്ടോര്‍ വാഹന വകുപ്പിന്റെ അഞ്ഞൂറുരൂപ പിഴ. തിരുവനന്തപുരം വെഞ്ഞാറമൂട്ടിലാണ് വിചിത്രമായ ഈ പിഴ ചുമത്തൽ.

തിരുവനന്തപുരം വെഞ്ഞാറമൂട് മൂക്കുന്നൂര്‍ സ്വദേശി എ. അജിത്കുമാറിനാണ് വിചിത്രമായ പിഴ നോട്ടിസ് കിട്ടിയത്. അജിത്തിന് സ്വന്തമായി ബൈക്കില്ല. ഉള്ളതാകട്ടെ ഒരു കാറാണ്. കാറിന്റെ റജിസ്ട്രേഷന്‍ നമ്പരിലെ വിലാസത്തിലാണ് മോട്ടോര്‍ വാഹനവകുപ്പിന്റെ നോട്ടിസ് ലഭിച്ചത്. ഗതാഗത നിയമ ലംഘനത്തിന് മോട്ടോര്‍വാഹന വകുപ്പ് നല്‍കിയ നോട്ടിസില്‍ വാഹനം കൃത്യമായി പറയുന്നുണ്ട്. മോട്ടോര്‍ കാര്‍ LMV എന്നാണ് രേഖപ്പെടുത്തിയിരിക്കുന്നത്.

കുറേനാളായി ഉപയോ​ഗിക്കാതെ ഒതുക്കിയിട്ടിരിക്കുന്ന ആൾട്ടോ കാറാണ് അജിത്തിനുള്ളത്. ഈ ആൾട്ടോ കാറിന്റെ നമ്പർ വെച്ചാണ് ഹെൽമെറ്റ് വയ്ക്കാത്തതിന് 500 രൂപ പെറ്റിയടിച്ചത്. അതായത് കാറിന്റെ കെഎൽ 21 ഡി 9877 എന്ന നമ്പരിലാണ് പെറ്റിവന്നതെന്ന് സാരം. ഒരാഴ്ച്ചയ്ക്ക് മുമ്പാണ് പെറ്റി അടയ്ക്കണമെന്ന് പറഞ്ഞ് ഫോണിൽ മെസേജ് വന്നത്.

എന്നാൽ അഞ്ഞൂറുരൂപ പിഴയ്ക്ക് കാരണം പറഞ്ഞിരിക്കുന്നത് ഹെല്‍മറ്റ് ധരിക്കാത്തതിനാല്‍ എന്നാണ്. ഈ കാരണം നോട്ടീസിൽ കണ്ട് അന്തംവിട്ടിരിക്കുകയാണ് അജിത് കുമാറും കുടുംബവും. നോട്ടിസിലെ വാഹന റജിസ്ട്രേഷന്‍ നമ്പരും വിലാസവും അജിത്തിന്റേത് തന്നെയാണ്. പതിപ്പിച്ച ചിത്രമാകട്ടെ വേറെ റജിസ്ട്രേഷന്‍ നമ്പരുള്ള ബൈക്കിന്റേതും.

ബൈക്ക് യാത്രയ്ക്കിടെ ഹെൽമറ്റ് ധരിച്ചില്ല എന്ന കാരണത്താൽ 500 രൂപ പിഴ അടയ്ക്കണം എന്നാണ് നോട്ടിസില്‍ പറയുന്നത്. ബൈക്കിലിരുന്ന് സഞ്ചരിക്കുന്ന ഏതോ ഒരാളുടെ ഫോട്ടോയുമുണ്ട്. അജിത്തിൻ്റെ കാർ KL 21 D 9877 ആണ്. നമ്പരിൽ എത്തിയ നോട്ടീസിൽ വാഹനം കാർ എന്നു രേഖപ്പെടുത്തിയിട്ടുണ്ടെങ്കിലും കുറ്റം ഹെൽമറ്റ് വയ്ക്കാത്തതാണ്.

ക്യാമറയുടെ സാങ്കേതിക തകരാറാവാം ഇങ്ങനെയൊരു പിഴവിനു കാരണമെന്നാണ് നിഗമനം. മറ്റാരോ നിയമം തെറ്റിച്ചതിന് താന്‍ 500 രൂപ പിഴ അടക്കേണ്ടി വരുമോ എന്ന ചിന്തയിലാണ് അജിത്ത്. ഏതായാലും ട്രാഫിക്ക് പോലീസിനെക്കണ്ട് കാര്യം ബോധ്യപ്പെടുത്താനുള്ള ശ്രമത്തിലാണ് ഹെൽമറ്റ് വയ്ക്കാത്തതിന് ഈ പിഴ കിട്ടിയ ഈ കാറുടമ. ഇതെങ്ങനെ സംഭവിച്ചുവെന്നാണ് മനസിലാകാത്ത് മോട്ടോര്‍വാഹന വകുപ്പിന് പരാതി നല്‍കാനൊരുങ്ങുകയാണ് അജിത് എന്നാണ് ഒരു മാധ്യമത്തോട് പ്രതികരിച്ചപ്പോൾ വ്യക്തമാക്കിയത്. 

എന്തായാലും ട്രാഫിക് പൊലീസിന് വലിയ നാണക്കേടുണ്ടാക്കിയിരിക്കുകയാണ് ഈ സംഭവം. 250 കോടി മുടക്കിയാണ് ഈയിടെ 726 ഇടങ്ങളിൽ ആർട്ടിഫിഷ്യൽ ഇന്റലിജൻസ് ക്യാമറ സ്ഥാപിച്ചത്. കെൽട്രോണാണ് പദ്ധതി നടപ്പിലാക്കുന്നത്. പൊതുവിലുള്ള ട്രാഫിക് നിയമലംഘനങ്ങളും പാർക്കിങ്‌ നിയമലംഘനങ്ങളും കണ്ടെത്തുന്നതിനായാണ് ഈ ക്യാമറകൾ ഉപയോ​ഗിക്കുന്നത്. ഹെൽമറ്റ് ധരിക്കാത്തതും രണ്ടിലേറെ പേരുമായി സഞ്ചരിക്കുന്നതുമായ ഇരുചക്രവാഹനങ്ങളുടെ ദൃശ്യം ക്യാമറയിൽ പതിയും.