പാര്‍ക്കിലും ബാച്ചിലുമെല്ലാം പോയാല്‍ നമ്മള്‍ സ്ഥിരമായി കാണുന്ന ചില കാഴ്ചകളുണ്ട്. അതിലൊന്നാണ് പ്രണയിക്കുന്നവരുടെ ചില കുസൃതികള്‍. എന്നാല്‍ ഇവര്‍ സല്ലപിക്കുന്നത് എല്ലാവരും ഒരേ രീതിയില്‍ എടുക്കണമെന്നില്ല. ചില സദാചാരക്കാര്‍ കമിതാക്കളെ പഞ്ഞിക്കിട്ട സംഭവങ്ങളും ഉണ്ടായിട്ടുണ്ട്.

ഇവിടെയിതാ നമ്മുടെ കടുത്തുരുത്തിയില്‍ കമിതാക്കള്‍ കാരണം നാട്ടുകാര്‍ക്കും പോലീസിനും എട്ടിന്റെ പണി കിട്ടിയ ഒരു സംഭവമാണ് ഇപ്പോള്‍ ചര്‍ച്ചാ വിഷയമായിരിക്കുന്നത്.

സാധാരണ പാര്‍ക്കും ബീച്ചുമെല്ലാമാണ് സല്ലപിക്കുന്ന സ്ഥിരം സ്ഥലമെങ്കിലും കടുത്തുരുത്തിയിലെ ഈ കമിതാക്കള്‍ തെരഞ്ഞെടുത്തത് ആരാധനാലയമായിരുന്നു. അവിടമാകുമ്പോള്‍ ചോദ്യങ്ങളുമായി ആരും എത്തില്ല എന്നുള്ള ആത്മവിശ്വാസത്തിലായിരിക്കും അങ്ങനെ ചെയ്തിട്ടുണ്ടാകുക. എന്തായാലും സംഗതി എട്ടുനിലയില്‍ പൊട്ടി എന്ന് പറഞ്ഞാല്‍ മതിയല്ലോ..

ആരാധനാലയത്തിന്റെ മുറ്റത്ത് സല്ലപിക്കാനെത്തിയ കമിതാക്കള്‍ നാട്ടുകാരെയും പോലീസിനെയും ശരിക്കും വലച്ചു. ആളുകളെക്കണ്ട് ഓടി രക്ഷപ്പെടാന്‍ ശ്രമിച്ച സംഘത്തെ പിടികൂടാന്‍ ശ്രമിച്ച നാട്ടുകാരനും കിട്ടി നല്ല എമണ്ടന്‍ പണി.

തിങ്കളാഴ്ച ഉച്ചയോടെയായിരുന്നു കമിതാക്കള്‍ കടുത്തുരുത്തിയിലെത്തിയത്. ഈ സംഘത്തില്‍ രണ്ട് പെണ്‍കുട്ടികളും രണ്ട് ആണ്‍കുട്ടികളുമാണ് ഉണ്ടായിരുന്നത്. ഇവരെ കണ്ട നാട്ടുകാര്‍ അടുത്തെത്തി ചോദ്യം ചെയ്യാന്‍ തുടങ്ങിയപ്പോള്‍ കമിതാക്കള്‍ക്ക് അപകടം മനസിലായി. പിന്നെ ഒന്നും നോക്കിയില്ല നാലുപേരും കണ്ടംവഴി ഓടുകയാണ് ഉണ്ടായത്. എന്നാല്‍ ഇവരെ അങ്ങനെ വിടാനുള്ള ഭാവമില്ലായിരുന്ന നാട്ടുകാര്‍ കുട്ടികളുടെ പിന്നാലെ വെച്ചുപിടിച്ചു. മാത്രമല്ല സമീപത്തെ ജങ്ഷനിലെത്തിയപ്പോള്‍ ഇവരെ തടഞ്ഞുവെക്കുകയും പോലീസിനെ വിവരമറിയിക്കുകയും ചെയ്തു.

പിന്നീടാണ് കളി കൈവിട്ടുപോയെന്ന് കമിതാക്കള്‍ക്ക് മനസിലായത്. ഉടന്‍ തന്നെ കിട്ടിയബസില്‍ അവര്‍ സ്ഥലം കാലിയാക്കി.

ഇനിയാണ് ഈ കഥയില്‍ ട്വിസ്റ്റ് സംഭവിക്കുന്നത്. എനിക്ക് എന്തിന്റെ കേടായിരുന്നു എന്ന് തമാശക്കൊക്കെ നമ്മള്‍ പറയാറില്ലെ.. ആ അവസ്ഥയിലായിരുന്നു പിന്നീട് നാട്ടുകാര്‍.

എന്തൊരു പ്രശ്‌നം ഉണ്ടാകുമ്പോഴും കാര്യമറിയാതെ, പ്രതികരിക്കുന്ന ചില കഥാപാത്രങ്ങള്‍ പ്രത്യക്ഷപ്പെടുന്നത് കാണാറില്ലെ. ഇവിടേയും അതുപോലൊരു അജ്ഞാത വ്യക്തി വന്നിരുന്നു. കമിതാക്കള്‍ കൈവിട്ടുപോയല്ലോ എന്ന വിഷമത്തില്‍ അന്തംവിട്ട് നില്‍ക്കുകയായിരുന്ന നാട്ടുകാരുടെ ഇടയിലേക്ക് ഇരച്ചുകയറിയ ആ അഞ്ജാതന്‍ നാട്ടുകാരില്‍ ഒരാളുടെ കരണത്ത് അടിച്ചു. ശേഷമാണ് എന്താണ് വിഷയം എന്ന് ആരായുന്നത്. പെണ്‍കുട്ടികളുടെ വിഷയമാണ് പോലീസിനെ വിളിച്ചിട്ടുണ്ട് എന്നൊക്കെ അറിഞ്ഞതോടെ അജ്ഞാതന്‍ വണ്ടിയുമെടുത്ത് സ്ഥലം വിട്ടു. അയാള്‍ ആരാണെന്നോ എവിടെ നിന്ന് വന്നു എങ്ങോട്ട് പോയി എന്നൊന്നും നാട്ടുകാര്‍ക്ക് അറിയില്ല.

ഇതിനിടെ പോലീസെത്തി പെണ്‍കുട്ടികളെ കണ്ടുപിടിച്ച് സ്റ്റേഷനിലെത്തിച്ചു. ഇവിടെയും നാട്ടുകാര്‍ക്ക് തന്നെ കിട്ടി 'പണി'. അതായത്, സ്റ്റേഷനിലെത്തിയ പെണ്‍കുട്ടികളില്‍ ഒരാള്‍ വഴിയില്‍ വെച്ച് ഒരു നാട്ടുകാരന്‍ തന്നെ ഉപദ്രവിച്ചുവെന്നും ഇത് ചോദ്യം ചെയ്ത സുഹൃത്തുക്കളെ അടിച്ചെന്നും പോലീസിനോട് പറഞ്ഞു. എന്നാല്‍ പോലീസിന് കാര്യങ്ങളുടെ കിടപ്പുവശം ഏതാണ്ട് മനസിലായതുകൊണ്ട് നാട്ടുകാര്‍ രക്ഷപ്പെട്ടു.

മാത്രമല്ല ഈ സംഭവം നടന്നതോടെ മറ്റ് ചില വിവരങ്ങള്‍ കൂടി പുറത്തുവന്നു. പെണ്‍കുട്ടികള്‍ക്കൊപ്പമുണ്ടായിരുന്ന ആണ്‍കുട്ടികളിലൊരാള്‍ ഒരു പോക്‌സോ കേസിലെ പ്രതിയാണ്. പോലീസ് ഇതെല്ലാം ആ കുട്ടികളെ പറഞ്ഞ് മനസിലാക്കുകയും പിന്നീട് വീട്ടുകാരെ വിളിച്ചുവരുത്തി പെണ്‍കുട്ടികളെ പറഞ്ഞയക്കുകയും ചെയ്തു.

നാട്ടുകാരെ കണ്ടപ്പോള്‍ ഓടിരക്ഷപ്പെടാന്‍ ശ്രമിച്ചത് പോലീസിന്റെ പിടിയില്‍ ഇനിയും വീഴാതിരിക്കാനുള്ള തന്ത്രമായിരുന്നു.