കേരളത്തില്‍ എയിംസ് സ്ഥാപിക്കാന്‍ തത്വത്തില്‍ അംഗീകാരം നല്‍കാന്‍ ആരോഗ്യ മന്ത്രാലയം ധനമന്ത്രാലയത്തോട് ശുപാര്‍ശ ചെയ്ത സാഹചര്യത്തില്‍ നടപടികള്‍ ത്വരിതത്തിലാക്കി സംസ്ഥാന സര്‍ക്കാര്‍...
കേരളത്തില്‍ ഓള്‍ ഇന്ത്യ ഇന്‍സ്റ്റ്യൂട്ട് ഓഫ് മെഡിക്കല്‍ സയന്‍സസ് (എയിംസ്) സ്ഥാപിക്കാന്‍ തത്വത്തില്‍ അംഗീകാരം നല്‍കാന്‍ ആരോഗ്യ മന്ത്രാലയം ധനമന്ത്രാലയത്തോട് ശുപാര്‍ശ ചെയ്ത സാഹചര്യത്തില്‍ നടപടികള്‍ ത്വരിതത്തിലാക്കി സംസ്ഥാന സര്‍ക്കാര്‍. ഭൂമി കൈമാറാനായി അനുമതി നല്‍കി പ്രിന്‍സിപ്പല്‍ സെക്രട്ടറി ഉത്തരവ് പുറത്തിറക്കി.
കോഴിക്കോട് എയിംസിനായി കണ്ടെത്തിയ കിനാലൂരിലെ ഭൂമി ആരോഗ്യ വകുപ്പിന് കൈമാറാനാണ് അനുമതി നല്‍കിയിരിക്കുന്നത്. വ്യവസായ വകുപ്പിന്റെ ഭൂമിയാണ് ആരോഗ്യ വകുപ്പിന് കൈമാറുക.
കേരളത്തില്‍ എയിംസ് സ്ഥാപിക്കാനുള്ള നടപടി തുടങ്ങിയതായാണ് രേഖാമൂലം കേന്ദ്ര ആരോഗ്യ മന്ത്രാലയം അറിയിച്ചിരിക്കുന്നത്. ഇക്കാര്യത്തില്‍ കേന്ദ്ര ധനമന്ത്രാലയത്തിന്റെ അനുമതിക്കായാണ് കാത്തിരിക്കുന്നതെന്ന് ആരോഗ്യ മന്ത്രാലയം വ്യക്തമാക്കി.
കിനാലൂരിനൊപ്പം തിരുവനന്തപുരത്തെ നെട്ടുകാല്‍ത്തോരി, കോട്ടയം മെഡിക്കല്‍ കോളേജ്, കളമശേരി എച്ച് എം ടി എന്നിവയും എയിംസ് സ്ഥാപിക്കാനുള്ള സ്ഥലങ്ങളുടെ പട്ടികയില്‍ സംസ്ഥാന സര്‍ക്കാര്‍ ഉള്‍പ്പെടുത്തിയിരുന്നു.
കിനാലൂരില്‍ കെ എസ് ഐ ഡി സിയുടെ 150 ഏക്കറിന് പുറമെ 100 ഏക്കര്‍ കൂടി ഏറ്റെടുത്ത് നല്‍കാമെന്ന കേരളത്തിന്റെ ശുപാര്‍ശയാണ് ഉത്തരവായി പുറത്തിറക്കിയിട്ടുള്ളത്.
അതേസമയം എല്ലാ സംസ്ഥാനങ്ങളിലും ഘട്ടം ഘട്ടമായി എയിംസ് സ്ഥാപിക്കുകയാണ് കേന്ദ്ര സര്‍ക്കാരിന്റെ നയം. കഴിഞ്ഞ പാര്‍ലമെന്റ് സമ്മേളനത്തിലാണ് കെ മുരളീധരന്‍ എംപി കോഴിക്കോട് കിനാലൂരില്‍ എയിംസ് സ്ഥാപിക്കുന്നതുമായി ബന്ധപ്പെട്ട ചോദ്യം ഉന്നയിച്ചത്.
എയിംസ് സ്ഥാപിക്കുന്നതുമായി ബന്ധപ്പെട്ട് അനുകൂലമായ സ്ഥലങ്ങള്‍ അറിയിക്കണമെന്ന് വ്യക്തമാക്കി കേരളത്തിന് കത്ത് നല്‍കിയിരുന്നു കേന്ദ്രം. ഇതുപ്രകാരം തിരുവനന്തപുരം, കോട്ടയം, കോഴിക്കോട് ജില്ലകളിലെ മൂന്ന് സ്ഥലങ്ങളാണ് സംസ്ഥാന സര്‍ക്കാര്‍ നിര്‍ദേശിച്ചത്.
"
https://www.facebook.com/Malayalivartha
