ഭാര്യയെ തീ കൊളുത്തി കൊന്ന ശേഷം ഭര്‍ത്താവ് ജീവനൊടുക്കിയ സംഭവത്തില്‍ പൊള്ളലേറ്റ് ചികിത്സയില്‍ കഴിയുന്ന മകള്‍ ശ്രീധന്യയുടെ (18) നില അതീവ ഗുരുതരമായി തുടരുന്നു. ശ്വാസതടസം രൂക്ഷമായതോടെ പെണ്‍കുട്ടിയെ വെന്റിലേറ്ററിലേയ്ക്ക് മാറ്റി.


83 ശതമാനം പൊള്ളലേറ്റ ശ്രീധന്യ കോട്ടയം മെഡിക്കല്‍ കോളേജിലാണ് ചികിത്സയിലുള്ളത്. മജിസ്‌ട്രേറ്റ് തിങ്കളാഴ്ച ആശുപത്രിയില്‍ നേരിട്ടെത്തി പെണ്‍കുട്ടിയുടെ മൊഴി രേഖപ്പെടുത്തിയിട്ടുണ്ടായിരുന്നു.

കിടപ്പു മുറിയില്‍ തീ ആളിപ്പടര്‍ന്നപ്പോള്‍ മാതാപിതാക്കളെ രക്ഷിക്കാന്‍ ശ്രമിച്ചപ്പോഴാണ് തന്റെ ദേഹത്തും തീ പടര്‍ന്നതെന്നാണ് പെണ്‍കുട്ടി ഡോക്ടര്‍ക്ക് നല്‍കിയ മൊഴിയെന്ന് സൂചനകള്‍.

പുറ്റടി ഹോളി ക്രോസ്സ് കോളേജിന് അടുത്തായി താമസിക്കുന്ന ഇലവനാതൊടികയില്‍ രവീന്ദ്രന്‍ (50), ഭാര്യ ഉഷ (45) എന്നിവരാണ് തിങ്കളാഴ്ച പുലര്‍ച്ചെ പൊള്ളലേറ്റ് മരിച്ചത്. ഉറങ്ങിക്കിടന്ന ഉഷയെ തീ കൊളുത്തി കൊലപ്പെടുത്തിയ ശേഷം രവീന്ദ്രനും തീ കൊളുത്തി ആത്മഹത്യ ചെയ്യുകയായിരുന്നു.

അതേസമയം കുടുംബ പ്രശ്‌നങ്ങളെ തുടര്‍ന്നാണ് വ്യാപാരി കൂടിയായ രവീന്ദ്രന്‍ ഈ കടുംകൈ ചെയ്തത് എന്നാണ് പോലീസ് പറയുന്നത്. ആത്മഹത്യ ചെയ്യുന്നതിന് മുന്‍പ് രവീന്ദ്രന്‍ വാട്ട്‌സ്ആപ്പ് വഴി സുഹൃത്തിനും കുടുംബാംഗങ്ങള്‍ അടങ്ങിയ ഗ്രൂപ്പിലും മരിക്കാന്‍ പോകുന്നുവെന്ന സൂചന നല്‍കി സന്ദേശം അയച്ചിരുന്നതായി പറയുന്നു. ഇത്തരത്തില്‍ കുടുംബത്തോടെ ജീവനൊടുക്കുവാന്‍ രവീന്ദ്രനെ പേരിപ്പിച്ച പ്രശ്‌നങ്ങള്‍ എന്താണ് എന്നും പോലീസ് അന്വേഷിച്ചു വരുന്നു.

ഭാര്യ ഉഷയെ തീ കൊളുത്തി കൊലപ്പെടുത്തി സ്വയം ജീവനൊടുക്കുന്നതിന് രവീന്ദ്രന്‍ ഉപയോഗിച്ചത് പെട്രോള്‍ ആയിരിക്കാമെന്ന് പോലീസ് പറയുന്നത്. മണ്ണെണ്ണ ഉപയോഗിച്ചായിരിക്കാം കൃത്യം നടത്തിയത് എന്നായിരുന്നു പോലീസിന്റെ മുന്‍നിഗമനം. എന്നാല്‍ രവീന്ദ്രന്‍ കറുത്ത കന്നാസുമായി അണക്കരയിലെ പമ്പില്‍ എത്തി പെട്രോള്‍ വാങ്ങുന്ന സിസിടിവി ദൃശ്യം പോലീസിന് ലഭിച്ചതായി സൂചനകളുണ്ട്. എന്നാല്‍ ഇത് അന്വേഷണ ഉദ്യോഗസ്ഥര്‍ സ്ഥിരീകരിച്ചിട്ടില്ല.

ഫോറന്‍സിക് വിദഗ്ധരുടെ അന്തിമ റിപ്പോര്‍ട്ട് ലഭിച്ചെങ്കില്‍ മാത്രമേ കൃത്യത്തിന് ഉപയോഗിച്ച ഇന്ധനം ഏതാണെന്ന് വ്യക്തമാക്കാന്‍ സാധിക്കൂകയുള്ളൂ.