ഡിവൈഎഫ്ഐ സംസ്ഥാന പ്രസിഡന്റ് സ്ഥാനത്തേക്ക് വി വസീഫിനെ തെരഞ്ഞെടുത്തേക്കും... .ചിന്താ ജെറോം, ജെയ്ക് സി തോമസ് എന്നിവരുടെ പേരും പരിഗണനയില്‍... ഇന്ന് തുടങ്ങുന്ന ഡിവൈഎഫ്ഐ സംസ്ഥാന സമ്മേളനത്തിലാണ് പുതിയ പ്രസിഡന്റിനെ തെരഞ്ഞെടുക്കുക.

നിലവിലെ പ്രസിഡന്റ് എസ് സതീഷ് ഇന്ന് സ്ഥാനമൊഴിയും. നിലവിലെ സെക്രട്ടറി വികെ സനോജ് സെക്രട്ടറി സ്ഥാനത്ത് തുടരാനാണ് സാധ്യത. 29ന് ചേരുന്ന സിപിഐഎം സംസ്ഥാന സെക്രട്ടറിയേറ്റിനു ശേഷമെ ഭാരവാഹികളുടെ കാര്യത്തില്‍ അന്തിമ തീരുമാനമാവുകുകയുളളൂ. 30ന് നടക്കുന്ന പ്രതിനിധിയോഗത്തില്‍ പുതിയ സംസ്ഥാന കമ്മിറ്റിയെ തെരഞ്ഞെടുക്കും.

അതേസമയം ഇന്ന് ആരംഭിക്കുന്ന സംസ്ഥാന സമ്മേളനത്തിന് സിപിഐഎം ജില്ലാ സെക്രട്ടറി കെപി ഉദയഭാനു വൈകുന്നേരം പതാക ഉയര്‍ത്തും. സംസ്ഥാന ട്രഷറര്‍ എസ്‌കെ സജീഷ് പതാക ജാഥ നയിക്കും. ചിന്താ ജെറോം കൊടിമര ജാഥയും കെയു ജനീഷ്‌കുമാര്‍ എംഎല്‍എ നയിക്കുന്ന ദീപശിഖാ പ്രയാണവും ഇന്ന് സമ്മേളന നഗരിയില്‍ എത്തിച്ചേരും.


നാളെയാണ് പ്രതിനിധി സമ്മേളനം ആരംഭിക്കുക. ചിന്തകന്‍ സുനില്‍ പി ഇളയിടം പ്രതിനിധി സമ്മേളനം ഉദ്ഘാടനം ചെയ്യും. 30ന് ജില്ലാ സ്റ്റേഡിയത്തില്‍ നടക്കുന്ന സമാപന പൊതുസമ്മേളനം പിബി അംഗം വൃന്ദ കാരാട്ട് ഉദ്ഘാടനം ചെയ്യും. സമാപന സമ്മേളനത്തില്‍ പുതിയ ഭാരവാഹികളെ തെരഞ്ഞെടുക്കും.