സംശയാസ്പദമായി കണ്ട വാഹനം പരിശോധിക്കുന്നതിനിടെ എസ്ഐയ്ക്ക് നേരെ ആക്രമണം. കോഴിക്കോട് കസബ പൊലീസ് സ്റ്റേഷനിലെ എസ്‌ഐ എസ്. അഭിഷേകിനും ഡ്രൈവർ മുഹമ്മദ് സക്കറിയയ്ക്കുമാണ് പരുക്കേറ്റത്. പുലർച്ചെ മൂന്നു മണിക്ക് പാളയത്തുവച്ചാണ് സംഭവം.

കാര്യങ്ങൾ ചോദിച്ച് അറിയുന്നതിനിടെ വാഹനത്തിന്റെ പേപ്പറുകൾ ഹാജരാക്കാൻ ആവശ്യപ്പെട്ടു. തുടർന്നായിരുന്നു മദ്യലഹരിയിൽ യുവാക്കൾ ആക്രമിച്ചത്. എസ്ഐയുടെ കൈയ്ക്കും ഡ്രൈവറുടെ തലയ്ക്കുമാണ് പരുക്കേറ്റത്.

സംഭവത്തിൽ കോട്ടപ്പറമ്പ് സ്വദേശി വിപിൻ പത്മനാഭൻ, പുതിയാപ്പ സ്വദേശി ശിഹാബ് എന്നിവരെ അറസ്റ്റ് ചെയ്തു. കൃത്യനിർവഹണം തടസ്സപ്പെടുത്തിയത് ഉൾപ്പെടെയുള്ള വകുപ്പുകൾ ചുമത്തിയാണ് ഇവർക്കെതിരെ കേസ് എടുത്തത്. വൈദ്യപരിശോധനയ്ക്കു ശേഷം ഇവരെ കോടതിയിൽ ഹാജരാക്കും.