വാക്കുപറഞ്ഞാല് വാക്ക്... സര്ക്കാരിനും സര്വകലാശാലയ്ക്കും കനത്ത തിരിച്ചടിയായി 15 സെനറ്റ് അംഗങ്ങളെ പിന്വലിച്ച് ഗസറ്റ് വിജ്ഞാപനം ചെയ്ത് ഗവര്ണര്; പുറത്താക്കപ്പെട്ട സെനറ്റ് അംഗങ്ങള് ഗവര്ണര്ക്കെതിരെ ഇന്ന് ഹൈക്കോടതിയില്
ഗവര്ണര്ക്ക് ഒരു വാക്കേയുള്ളൂ. പറഞ്ഞാല് പറഞ്ഞത് നടപ്പിലാക്കിയിരിക്കും. സെനറ്റര്മാരെ വച്ച് കളിച്ച കേരള സര്വകലാശാലയ്ക്ക് വലിയ പണിയാണ് കിട്ടിയത്. കളിക്കാന് കൂട്ടുനിന്ന സെനറ്റ് അംഗങ്ങള് വെട്ടിലാകുകയും ചെയ്തു.
ഗവര്ണറും കേരള സര്വകലാശാലയും തമ്മിലെ പോര് പാരമ്യത്തില് . 15 സെനറ്റ് അംഗങ്ങളെ പിന്വലിച്ച് രാജ്ഭവന് ഇന്നലെ ഗസറ്റ് വിജ്ഞാപനം ഇറക്കിയിരുന്നു. എന്നാല് അംഗങ്ങളെ പിന്വലിക്കണമെന്ന ഉത്തരവ് വിസി തള്ളിയിരുന്നു. അതിനിടെ പിന്വലിക്കപ്പെട്ട 15 പേരും ഗവര്ണ്ണര്ക്കെതിരെ ഇന്ന് ഹൈക്കോടതിയെ സമീപിക്കും. വിശദീകരണം ചോദിക്കാതെയുള്ള നടപടി ചട്ടവിരുദ്ധം എന്നാണ് വാദം. തന്റെ നിര്ദേശം നിരന്തരം ലംഘിക്കുന്ന വി സിക്കെതിരെയും ഗവര്ണര് ഇനി നടപടി എടുക്കുമോ ആകാംക്ഷ
അസാധാരണ നടപടിയുമായി വീണ്ടും കേരള ഗവര്ണര് ആരിഫ് മുഹമ്മദ് ഖാന് ഇന്നലെ രംഗത്തെത്തിയത്. കേരള സര്വകലാശാല സെനറ്റിലെ 15 അംഗങ്ങളെ പിന്വലിച്ച് രാജ്ഭവന് ഉത്തരവിറക്കി. സെനറ്റ് അംഗങ്ങളെ പിന്വലിച്ച് ഇന്ന് ഉത്തരവ് ഇറക്കണമെന്ന് ഗവര്ണര് കേരള വിസിക്ക് വീണ്ടും അന്ത്യശാസനം നല്കിയിരുന്നു. ഇത് വിസി തള്ളിയതിന് പിന്നാലെയാണ് രാജ്ഭവന് തന്നെ നേരിട്ട് ഉത്തരവിറക്കിയത്. ഗസറ്റ് വിജ്ഞാപനം ഇറക്കിയ രാജ്ഭവന്, ഇക്കാര്യം വൈസ് ചാന്സലറെ അറിയിച്ചു.
ചാന്സലറെന്ന അധികാരം പ്രയോഗിച്ചാണ് താന് നോമിനേറ്റ് ചെയ്ത അംഗങ്ങളെ അസാധാരണ നടപടിയിലൂടെ ഗവര്ണര് നേരത്തെ പിന്വലിച്ചത്. വിസി നിര്ണയ സമിതിയിലേക്കുള്ള കേരള സര്വകലാശാല പ്രതിനിധിയെ നിര്ദ്ദേശിക്കാന് ചേര്ന്ന സെനറ്റ് യോഗത്തില് നിന്നും വിട്ടു നിന്ന അംഗങ്ങളെയാണ് ചാന്സലര് അയോഗ്യരാക്കിയത്. നാല് വകുപ്പ് മേധാവിമാരെയും രണ്ട് സിന്റിക്കേറ്റ് അംഗങ്ങളെയും ഉള്പ്പെടെയാണ് പിന്വലിച്ചത്. പിന്നീട് ഇക്കാര്യത്തില് ഉത്തരവിറക്കാന് കേരള സര്വകലാശാല വിസിയോട് ഗവര്ണര് നിര്ദേശിച്ചിരുന്നു.
എന്നാല് നിയമപരമായ നടപടിയല്ല ഉണ്ടായതെന്ന് വ്യക്തമാക്കി വിസി ഈ നിര്ദേശം തള്ളി. പിന്നാലെ ഗവര്ണര് അന്ത്യശാസനം നല്കിയെങ്കിലും സെനറ്റ് അംഗങ്ങളെ പിന്വലിച്ച ഗവര്ണറുടെ നടപടി ചട്ട വിരുദ്ധമാണെന്നും അംഗങ്ങളെ പിന്വലിക്കാന് കഴിയില്ലെന്നും വൈസ് ചാന്സലര് മറുപടി നല്കുകയായിരുന്നു. ഈ സാഹചര്യത്തിലാണ് ഇന്ന് വീണ്ടും ഗവര്ണര് വിസിക്ക് അന്ത്യശാസനം നല്കിയത്. ഇന്ന് വൈകീട്ടത്തേക്ക് മുന്നേ ഉത്തരവ് ഇറക്കണമെന്നതായിരുന്നു നിര്ദേശം. ഇത് വിസി അനുസരിക്കാതെ വന്നതോടെയാണ് അസാധാരണ നടപടിയുമായി രാജ്ഭവന് രംഗത്തെത്തിയത്.
ഗവര്ണറുടെ നടപടിക്കെതിരെ നേരത്തെ മന്ത്രിമാര് രംഗത്തെത്തിയിരുന്നു. ഇനി വിമര്ശിച്ചാല് മന്ത്രിമാരെ പിന്വലിക്കുമെന്ന ഭീഷണിയായിരുന്നു ഗവര്ണറുടെ മറുപടി. ഇതിനു പിന്നാലെ, ഇല്ലാത്ത അധികാരം ഉണ്ടെന്ന് ഭാവിച്ച് ജനമധ്യത്തില് അപഹാസ്യനാകരുതെന്ന് വ്യക്തമാക്കി മുഖ്യമന്ത്രിയും രംഗത്തെത്തി. സെനറ്റ് അംഗങ്ങളെ പുറത്താക്കിയ നടപടി നിയമവിരുദ്ധമാണെന്നും മുഖ്യമന്ത്രി പ്രതികരിച്ചിരുന്നു. എന്നാല് അസാധാരണ ഉത്തരവ് പുറത്തിറക്കുക വഴി അയയില്ലെന്ന സൂചന ശക്തമാക്കിയിരിക്കുകയാണ് ഗവര്ണര്.
അതേസമയം ഉന്നത വിദ്യാഭ്യാസമേഖലയില് സംസ്ഥാന സര്ക്കാര് സ്വജനപക്ഷപാതം നടപ്പാക്കുകയാണെന്ന് പ്രതിപക്ഷ നേതാവ് വി.ഡി.സതീശന് പറഞ്ഞു. സര്വകലാശാലകളുടെ സ്വയംഭരണാവകാശം സര്ക്കാര് നിലനിര്ത്തണം. അനധികൃത നിയമനങ്ങള്ക്ക് സര്ക്കാര് കൂട്ടുനില്ക്കുകയാണെന്നും സതീശന് പറഞ്ഞു. പ്രതിപക്ഷ അധ്യാപക, അനധ്യാപക സര്വീസ് സംഘടനകളുടെ ആഭിമുഖ്യത്തിലുള്ള സെനറ്റ് അംഗങ്ങളുടെ ധര്ണ ഉദ്ഘാടനം ചെയ്യുകയായിരുന്നു അദ്ദേഹം.
സര്വകലാശാലകളിലെ അധ്യാപക നിയമനം ബന്ധുക്കള്ക്കായി മന്ത്രിമാരും മറ്റും സംവരണം ചെയ്തിരിക്കുകയാണ്. നിലവിലെ വൈസ് ചാന്സലറുടെ കാലാവധി 24-ന് അവസാനിക്കാറായിട്ടും പുതിയ വി.സി.യെ തിരഞ്ഞെടുക്കാനാകാത്തത് ശരിയല്ല. വി.സി.യെ തിരഞ്ഞെടുക്കുന്നതിനുള്ള നിയമപരമായ നടപടിക്രമങ്ങള് സര്വകലാശാല പാലിക്കണം. ഗവര്ണര് ഭരണഘടനാപരമായ കടമകള് ചെയ്യുന്നതിനെ പ്രതിപക്ഷം പിന്തുണയ്ക്കുമെന്നും പ്രതിപക്ഷനേതാവ് പറഞ്ഞു.
"
https://www.facebook.com/Malayalivartha
