ദേവികുളം സബ്കളക്ടർ രാഹുൽ കൃഷ്ണ ശർമ്മയ്‌ക്കെതിരായ തെമ്മാടി പരാമർശത്തിൽ എംഎം മണി എംഎൽഎയ്‌ക്കെതിരെ രൂക്ഷ വിമർശനം.ദേവികുളത്ത് സിപിഎം സംഘടിപ്പിച്ച ആർഡിഒ ഓഫിസ് വളയൽ സമരം ഉദ്ഘാടനം ചെയ്യുമ്പോഴായിരുന്നു മണിയുടെ പരാമർശം. ഇതിൽ പ്രതിഷേധിച്ച് കേരള ഐഎഎസ് ഓഫിസേഴ്സ് അസോസിയേഷൻ രംഗത്ത്.

എംഎം മണിയുടെ തെമ്മാടി പരാമർശം ഉദ്യോഗസ്ഥന്റെ ആത്മവീര്യം തകർക്കുന്നതാണെന്ന് അസോസിയേഷൻ നൽകിയ പരാതിയിൽ പറയുന്നു. വിമർശനങ്ങളോടു തുറന്ന മനസ്സാണ്. എന്നാൽ വിമർശിക്കുമ്പോൾ ഭാഷയിലും പെരുമാറ്റത്തിലും പാലിക്കേണ്ട മര്യാദകളുണ്ട്. പരാമർശം എംഎം മണി പിൻവലിക്കണം. ഇത്തരം പരാമർശങ്ങൾ ഇനി മേലിൽ ആവർത്തിക്കരുത്. ഇതിനായി മുഖ്യമന്ത്രി ഇടപെടണമെന്നും പരാതിയിൽ പരാതിയിൽ അസോസിയേഷൻ പ്രസിഡന്റ് ഡോ. ബി. അശോക്, സെക്രട്ടറി എം.ജി.രാജമാണിക്യം എന്നിവർ ആവശ്യപ്പെട്ടു.

ഇടുക്കി ജില്ലയിലെ ഭൂമി പ്രശ്നത്തിൽ റവന്യു വകുപ്പിന്റെ നടപടി നിർത്തിവയ്ക്കണമെന്ന മുഖ്യമന്ത്രിയുടെ നിർദേശം അവഗണിച്ച് ഇടുക്കി കലക്ടറും ദേവികുളം സബ് കലക്ടറും നടപടികൾ തുടരുകയാണെന്നായിരുന്നു മണിയുടെ വിമർശനം. തുടർന്ന് മണി പറഞ്ഞത് ഇങ്ങനെ: ‘‘സബ് കലക്ടർ, തെമ്മാടി, മുഖ്യമന്ത്രിയുടെ വാക്കിനു വിലയുണ്ടോ എന്നു ഞങ്ങൾ കാണിച്ചുതരാം.’’