നിയമലംഘനങ്ങള്‍ക്ക് പിഴ ഈടാക്കാനൊരുങ്ങി മോട്ടര്‍ വാഹന വകുപ്പ്.... സംസ്ഥാനത്തെ റോഡുകളില്‍ സ്ഥാപിച്ച 675 എഐ ക്യാമറകള്‍ വഴി കണ്ടെത്തുന്ന നിയമലംഘനങ്ങള്‍ക്ക് പിഴ .ഇതിനായി സംസ്ഥാന സര്‍ക്കാരിന്റെ അനുമതി തേടി. അടുത്ത മന്ത്രിസഭാ യോഗത്തില്‍ ഇക്കാര്യം പരിഗണിക്കുമെന്നാണ് സൂചനകള്‍.

അനുവാദം ലഭിച്ചാല്‍ രണ്ടാഴ്ചയ്ക്കുള്ളില്‍ പിഴ ഈടാക്കിത്തുടങ്ങാനാണ് തീരുമാനം. സംസ്ഥാനത്താകെ 675 എഐ ക്യാമറകളാണ് സ്ഥാപിച്ചിരിക്കുന്നത്. കെല്‍ട്രോണ്‍ നേരിട്ടു സ്ഥാപിച്ച ക്യാമറകളില്‍ നിന്ന് കഴിഞ്ഞ ഏപ്രില്‍ മുതല്‍ ദൃശ്യങ്ങള്‍ ശേഖരിക്കുന്നുണ്ടെങ്കിലും പ്രവര്‍ത്തനാനുമതി ലഭിച്ചിട്ടില്ലാത്തതിനാല്‍ പിഴ ഈടാക്കാന്‍ കഴിഞ്ഞിട്ടില്ല.

30 ലക്ഷം രൂപ വീതം ചെലവഴിച്ചാണ് ഓരോ ക്യാമറയും സ്ഥാപിച്ചത്. എഐ ക്യാമറകള്‍ക്ക് പുറമേ റെഡ് ലൈറ്റ് വയലേഷന്‍, പാര്‍ക്കിങ് വയലേഷന്‍ ഡിറ്റക്ഷന്‍ ക്യാമറകളും ഉള്‍പ്പെടെ 725 ഗതാഗത നിരീക്ഷണ ക്യാമറകള്‍ സ്ഥാപിക്കുന്നതിനായി 235 കോടി രൂപയാണ് സേഫ് കേരള പദ്ധതിയില്‍ ചെലവഴിച്ചിട്ടുള്ളത്.

ആദ്യഘട്ടത്തില്‍ മോട്ടര്‍ വാഹന വകുപ്പിന്റെ എം പരിവാഹന്‍ ആപ്പുമായി ക്യാമറകള്‍ ബന്ധിപ്പിക്കുന്നതിനും അനുബന്ധ ജോലികള്‍ പൂര്‍ത്തിയാക്കുന്നതിനും കാലതാമസം നേരിട്ടിരുന്നു. എന്നാല്‍, കെല്‍ട്രോണ്‍ തന്നെ ആവശ്യമായ ജീവനക്കാരെ നിയമിക്കുകയും സാങ്കേതിക ജോലികള്‍ പൂര്‍ത്തിയാക്കി ട്രയല്‍ റണ്‍ നടത്തുകയും ചെയ്തു. പിന്നീട് കെല്‍ട്രോണും മോട്ടര്‍ വാഹന വകുപ്പും സംയുക്തമായി പൂര്‍ത്തിയാക്കേണ്ട പരിശോധനകള്‍ വൈകിയത് വീണ്ടും തിരിച്ചടിയായി.

ഈ കടമ്പയും കടന്ന് പദ്ധതി പ്രവര്‍ത്തനാനുമതിക്കായി ധനവകുപ്പിന്റെ മുന്നിലെത്തിയെങ്കിലും അന്തിമാനുമതി വീണ്ടും വൈകി. കെല്‍ട്രോണ്‍ തന്നെയാണ് ഇവയുടെ 8 വര്‍ഷത്തേക്കുള്ള അറ്റകുറ്റപ്പണികളും നിര്‍വഹിക്കുന്നത്. പിഴത്തുക നിശ്ചിത വര്‍ഷം കെല്‍ട്രോണിനു ലഭിക്കുന്ന തരത്തിലാണു പദ്ധതി വിഭാവനം ചെയ്തിട്ടുള്ള്ത്.