കോടതി ജീവനക്കാരിക്ക് നേരെ ആസിഡ് ആക്രണം നടത്തിയയാള്‍ അറസ്റ്റില്‍. തളിപ്പറമ്ബ് നഗരത്തിലാണ് സംഭവം നടന്നത്. ജോലി കഴിഞ്ഞ് മടങ്ങുകയായിരുന്ന കോടതി ജീവനക്കാരിക്ക് നേരെയാണ് ആസിഡ് ആക്രമണം നടന്നത്. സര്‍ സയ്യിദ് കോളജ് ഓഫീസ് ക്ലര്‍ക് എംവി അശ്കര്‍ (52) ആണ് പിടിയിലായത്. മുന്‍സിഫ് കോടതി ജീവനക്കാരിയായ കൂവോട് സ്വദേശിനി കെ സാഹിദ (45) യ്ക്ക് നേരെയാണ് ആക്രമണമുണ്ടായത്. പൊളളലേറ്റ സാഹിദയെ തളിപ്പറമ്ബിലെ ആശുപത്രിയില്‍ പ്രവേശിപ്പിച്ചു. തിങ്കളാഴ്ച വൈകുന്നേരം തളിപ്പറമ്ബ് മാര്‍കറ്റിലെ ന്യൂസ് കോര്‍ണര്‍ ജന്‍ക്ഷനിലാണ് സംഭവം.

ആസിഡ് ആക്രമണത്തിനിടെ സമീപത്തുണ്ടായിരുന്ന കോടതി ജീവനക്കാരന്‍ പ്രവീണ്‍ തോമസ്, പത്ര വില്‍പനക്കാരനായ ജബ്ബാര്‍ എന്നിവര്‍ക്കും പരുക്കേറ്റു. ചിലരുടെ വസ്ത്രത്തില്‍ ആസിഡ് വീണുകത്തി. ആക്രമണത്തിനു ശേഷം ഓടിരക്ഷപ്പെടാന്‍ ശ്രമിച്ച അശ്കറിനെ പ്രദേശവാസികളാണ് പിടികൂടി തളിപ്പറമ്ബ് പൊലീസില്‍ ഏല്‍പ്പിച്ചത്. ഇയാളെ പൊലീസ് ചോദ്യം ചെയ്തുവരികയാണ്. അക്രമത്തിന് പിന്നിലുളള കാരണത്തെ കുറിച്ച് പൊലീസ് അന്വേഷിക്കുന്നുണ്ട്.