രണ്ടാം ദിവസവും തമിഴ്നാട് വനം വകുപ്പിന് അരിക്കൊമ്പനെ പിടികൂടാനായില്ല... വനപാലകര്ക്ക് ജിപിഎസ് കോളറിലെ സിഗ്നല് കിട്ടിയെങ്കിലും നടന്ന് നീങ്ങുന്ന കൊമ്പന്റെ അടുത്തെത്താന് വനപാലകര്ക്ക് കഴിയുന്നില്ല
അരിക്കൊമ്പന് ജനവാസ മേഖലയിലിറങ്ങി പരിഭ്രാന്തി സൃഷ്ടിച്ചതിന് പിന്നാലെ മണിക്കൂറുകള്ക്കുള്ളിലാണ് ആനയെ മയക്കുവെടിവച്ച് പിടികൂടാന് തമിഴ്നാട് സര്ക്കാരിന്റെ ഉത്തരവിറങ്ങിയത്. എന്നാല് ദൗത്യത്തിന്റെ രണ്ടാം ദിവസവും തമിഴ്നാട് വനം വകുപ്പിന് അരിക്കൊമ്പനെ പിടികൂടാനായില്ല. മേഘമലയുടെ താഴ്വാരത്തെ വനത്തിലൂടെ നടന്ന് നീങ്ങുകയാണ് കൊമ്പനെന്നാണ് ജിപിഎസ് സിഗ്നലുകള് നല്കുന്ന സൂചന.
വെള്ളം കുടിക്കാന് ഷണ്മുഖ നദിയോരത്തെത്തിയാല് പിടികൂടാനാകുമോയെന്നാണ് വനപാലക!ര് നോക്കുന്നത്. ആന ജനവാസ മേഖലയിലേക്ക് ഇറങ്ങാതിരിക്കാനുള്ള മുന്കരുതലുകള് സ്വീകരിച്ചിട്ടുണ്ടെന്ന് കമ്പം എംഎല്എ എന് രാമകൃഷ്ണന് പറഞ്ഞു. അരിക്കൊമ്പനെ കണ്ടെത്താന് ശ്രമം നടക്കുകയാണെന്നും ആനയുടെ ലൊക്കേഷന് കിട്ടിയ സ്ഥലത്ത് നിന്ന് 300 മീറ്റര് അടുത്ത ട്രാക്കര്മാരുണ്ടെന്നും എംഎല്എ അറിയിച്ചു.
രണ്ട് ദിവസമായി കാര്യമായി വെള്ളം കിട്ടാത്തതിനാല് ക്ഷീണിതനാണെന്ന് കരുതുന്നുണ്ടെന്നും ഉദ്യോഗസ്ഥര് പറയുന്നു. തുമ്പിക്കയിലെ മുറിവും ബുദ്ധിമുട്ടിക്കുന്നുണ്ട്. കൂത്തനാച്ചി ക്ഷേത്രത്തിന്റെ പിന്നാമ്പുറത്തെ മലനിരകള്ക്ക് പിന്നിലൂടെ നടന്ന് നീങ്ങിയ കൊമ്പന് ഉച്ചയോടെയെത്തിയത് ഷണ്മുഖ നദി ഡാമിനടുത്തുള്ള മലമ്പ്രദേശത്താണ്. ഡാമിന്റെ ക്യാച്ച്മെന്റ് ഏരിയയില് വെള്ളം കുടിക്കാനെത്തുമെന്ന് കരുതി ഉദ്യോഗസ്ഥര് കെണിയൊരുക്കി കാത്തുനിന്നു. എന്നാല് അവരെ വെട്ടിച്ച് അരിക്കൊമ്പന് മലയടിവാരത്തിലൂടെ മറ്റൊരിടത്തക്ക് നീങ്ങി. ഇതോടെയാണ് രണ്ടാം ദിവസത്തെ ദൗത്യവും അനിശ്ചിതത്വത്തിലായത്.
ജനവാസ മേഖലയില് നിന്നും രണ്ട് കിലോമീറ്റര് മാറി വനത്തിനുള്ളില് നിന്നിരുന്ന കൊമ്പന് ഇന്ന് രാവിലെയാണ് താഴേക്കിറങ്ങി വന്നത്. 200 മീറ്റര് അടുത്തെത്തിയപ്പോള് തന്നെ വനപാലകര്ക്ക് ജിപിഎസ് കോളറിലെ സിഗ്നല് കിട്ടി. എന്നാല് നടന്ന് നീങ്ങുന്ന കൊമ്പന്റെ അടുത്തെത്താന് വനപാലകര്ക്ക് കഴിഞ്ഞതേയില്ല. കഴിഞ്ഞ ദിവസത്തേക്കാള് കൊമ്പന്റെ നടപ്പിന് വേഗത കുറഞ്ഞിട്ടുണ്ടെന്നാണ് ഉദ്യോഗസ്ഥര് പറഞ്ഞത്.
https://www.facebook.com/Malayalivartha
