കേരള മെഡിക്കല്‍ സര്‍വീസ് കോര്‍പ്പറേഷന്‍ വിലക്കിയ ബ്ലീച്ചിങ് പൗഡര്‍ സംസ്ഥാനത്തെ ആശുപത്രികളിലെത്തി. ഇതോടെ ബ്ലീച്ചിങ് പൗഡര്‍ കത്തുമോയെന്ന ഭയത്തില്‍ ആശുപത്രികളും. മെഡിക്കല്‍ സര്‍വീസസ് കോര്‍പറേഷന്റെ കൊല്ലത്തേയും തിരുവനന്തപുരത്തേയും ഗോഡൗണുകളിലാണ് തീ പിടിച്ചത്. ബ്ലീച്ചിങ് പൗഡറില്‍ തീ പിടിച്ചതാണ് കാരണമെന്ന വാദമാണ് ഇപ്പോഴും നിലനില്‍ക്കുന്നത്. ഇവിടെ ശേഖരിച്ചിരുന്ന ബ്ലീച്ചിങ് പൗഡറാണ് ആശുപ്ര്തികളില്‍ എത്തിയിരിക്കുന്നത്. വിലക്കിന് തൊട്ടുമുമ്പാണ് ജില്ലാ സംഭരണശാലകളില്‍ നിന്ന് ആശുപത്രികളിലേക്ക് ബ്ലീച്ചിങ് പൗഡറുകള്‍ എത്തിച്ചത്. അഗ്‌നിരക്ഷാ സംവിധാനങ്ങള്‍പോലും ആവശ്യത്തിനില്ലാത്ത ആശുപത്രികളില്‍ ഇത് സൂക്ഷിക്കുന്നതില്‍ ആശങ്ക ഉയര്‍ന്നുകഴിഞ്ഞു.

തിരുവനന്തപുരം, കൊല്ലം, ആലപ്പുഴ എന്നിവിടങ്ങളിലെ മരുന്നുസംഭരണശാലകളിലെ തീപ്പിടിത്തത്തിനുപിന്നാലെയാണ് കാരുണ്യ കമ്യൂണിറ്റി ഫാര്‍മസികള്‍വഴി വിതരണംചെയ്ത 59 ബാച്ച് ബ്ലീച്ചിങ് പൗഡറിന്റെ വിതരണം വിലക്കിയത്. 10,000 മുതല്‍ 20,000 കിലോവരെയുള്ളതാണ് ഒരു ബാച്ച്. ഒരുവര്‍ഷത്തെ ഉപയോഗത്തിനുള്ള ബ്ലീച്ചിങ് പൗഡറിന്റെ 50 ശതമാനത്തോളം ഒറ്റത്തവണയായി ആശുപത്രികളിലേക്കു വിതരണംചെയ്തുകഴിഞ്ഞു. ആരോഗ്യസ്ഥാപനങ്ങള്‍ ആവശ്യപ്പെട്ട മരുന്നുകള്‍ പലതും വാഹനമില്ലെന്നകാരണത്താല്‍ കെ.എം.എസ്.സി.എല്‍. സമയത്ത് എത്തിക്കാറില്ല. ഇതുമൂലം ഇടയ്ക്കിടെ മരുന്നുക്ഷാമവും അനുഭവപ്പെടുന്നുണ്ട്. മരുന്നില്ലെങ്കിലും ബ്ലീച്ചിങ് പൗഡര്‍ ആവശ്യത്തിലേറെ എത്തുന്നതെങ്ങനെയെന്നാണ് ചോദ്യം.

കൊച്ചി ആസ്ഥാനമായ കുന്നത്ത് കെമിക്കല്‍സ് പ്രൈവറ്റ് ലിമിറ്റഡ് എന്ന സ്ഥാപനമാണ് സ്ഥിരമായി കെ.എം.എസ്.സി.എലിന് ബ്ലീച്ചിങ് പൗഡര്‍ വിതരണം ചെയ്തിരുന്നത്. ഇവരെ ഒഴിവാക്കിയാണ് ലഖ്‌നൗവിലെ ബാങ്കെ ബെഹാരി കെമിക്കല്‍സില്‍ നിന്ന് ബ്ലീച്ചിങ് പൗഡര്‍ വാങ്ങാന്‍ തുടങ്ങിയത്. ബ്ലീച്ചിങ് പൗഡറിന്റെ വിതരണം മരവിപ്പിച്ചുകൊണ്ടുള്ള കെ.എം.എസ്.സി.എലിന്റെ മെമ്മോയില്‍ ബാങ്കെ ബെഹാരിയുടെ ബ്ലീച്ചിങ് പൗഡറാണെന്ന് എടുത്തുപറയുന്നുണ്ട്. 'കണ്‍സിസ്റ്റന്‍സി സ്റ്റഡി'ക്കുവേണ്ടി എന്നതാണ് കാരണമായി പറഞ്ഞിരിക്കുന്നത്. ഉത്പന്നത്തിന്റെ രാസഘടനയില്‍ വ്യത്യാസമുണ്ടായിരിക്കാന്‍ ഇടയുണ്ടെന്ന സംശയത്തിലാണിത്. സ്ഥിരം ബ്ലീച്ചിങ് പൗഡര്‍ വാങ്ങിയിരുന്ന കമ്പനിയെ ഒഴിവാക്കി ലക്‌നൗവിലെ കമ്പനിയെ സമീപിക്കാന്‍ കാരണമെന്ത്. എന്താണ് ഇതിന് പിന്നില്‍ നടന്നിരിക്കുന്നത് തുടങ്ങി വലിയ ചോദ്യമാണ് ഉയര്‍ന്നിരിക്കുന്നത്. ബ്ലീച്ചിങ് പൗഡറിപ്പോള്‍ വില്ലനായി മാറിയിരിക്കുകയാണ്. മുന്‍പൊരിക്കലും ഇങ്ങനൊരു പ്രതിസന്ധി ഉണ്ടായിട്ടില്ല. എന്നാല്‍ ഇപ്പോള്‍ ബ്ലീച്ചിഹ് പൗഡറെനന് കേട്ടാലേ കത്തുന്ന ഒരു വസ്തു എന്ന പ്രതീതിയാണ് ഉണ്ടാക്കി വെച്ചിരിക്കുന്നത്. ആര്‍ഡിഎക്‌സ് ഒന്നുമല്ലല്ലോ അതില്‍ മിക്‌സ് ചെയതിരിക്കുന്നതെന്ന പരിഹാസമാണ് സര്‍ക്കാരിന് നേരെ ഉയരുന്നത്.

സംസ്ഥാനത്ത് ബ്ലീച്ചിങ് പൗഡറിന് ക്ഷാമം നേരിട്ടാല്‍ മഴക്കാല മുന്നൊരുക്കം പ്രതിസന്ധിയിലാകും. ശുചീകരണത്തിനായി ആരോഗ്യവകുപ്പ് പ്രധാനമായും വിതരണംചെയ്യുന്നത് ബ്ലീച്ചിങ് പൗഡറാണ്. മഴക്കാലം പടിവാതില്‍ക്കല്‍ എത്തിക്കഴിഞ്ഞു. ഇതോടെ ആരോഗ്യ വകുപ്പ് ഓട്ടം തുടങ്ങിയിട്ടുണ്ട്. ബ്ലീച്ചിങ്പൗഡര്‍ സ്വയം കത്തുന്നതോ മറ്റുവസ്തുക്കളെ കത്താന്‍ സഹായിക്കുന്നതോ ആയ ഒരു രാസവസ്തുവല്ല. എന്നാല്‍, ബ്ലീച്ചിങ് പൗഡര്‍ ഈര്‍പ്പംതട്ടി ചൂടായി ക്ലോറിന്‍ ബഹിര്‍ഗമിച്ചാല്‍ അടച്ചിട്ട അന്തരീക്ഷത്തില്‍ ജ്വലനത്തെ സഹായിക്കുന്ന മറ്റുവസ്തുക്കളുമായി പ്രതിപ്രവര്‍ത്തിക്കുമ്പോള്‍ തീപ്പിടിത്തമുണ്ടാകാം. ഡോ. എം.പി. സുകുമാരന്‍ നായര്‍, ട്രാവന്‍കൂര്‍ കൊച്ചിന്‍ കെമിക്കല്‍സ് മുന്‍ മാനേജിങ് ഡയറക്ടര്‍