സ്റ്റേഷനില് ഓടിക്കയറി വിറപ്പിച്ചു... കേരള ഭാഗ്യക്കുറിയുടെ ഒന്നാം സമ്മാനമായി ഒരു കോടി രൂപ അടിച്ച ബംഗാളി നാട്ടിലേക്കൊരു പോക്ക് പോകും; പട്ടിണിപ്പാവങ്ങളുടെ നാട്ടില് കോടീശ്വരനായി എത്തുമ്പോഴുള്ള അവസ്ഥയോര്ത്ത് ബിര്ഷുവിന് പേടിപ്പനി പിടിച്ചു; സംരക്ഷകരായി പോലീസ്
കേരള ഭാഗ്യക്കുറിയുടെ ഒന്നാം സമ്മാനം നേടിയയാളെ കാത്തിരിക്കുകയായിരുന്നു മാധ്യമങ്ങളും ജനങ്ങളും. എന്നാല് കോടീശ്വരനാകാനുള്ള ഭാഗ്യം മലയാളികള്ക്കായില്ല. അതും ബംഗാളികള്ക്കായി. ഇപ്പോള് കോടീശ്വരനായി നാട്ടില് പോകാനുള്ള തയ്യാറെടുപ്പിലാണ്. അതോര്ത്തിട്ടോ എന്തോ പനിയിലാണ് ബംഗാള് സ്വദേശി ബിര്ഷു.
അതേസമയം കേരള ഭാഗ്യക്കുറിയുടെ ഒന്നാം സമ്മാനമായി ഒരു കോടി രൂപ അടിച്ചതിന്റെ ഞെട്ടലില് സംരക്ഷണം തേടി പൊലീസ് സ്റ്റേഷനിലേക്ക് ഓടിക്കയറിയ ബംഗാള് സ്വദേശി ബിര്ഷുവിന്റെ താമസം പൊലീസ് ഇടപെട്ട് മറ്റൊരിടത്തേക്കു മാറ്റി.
സമ്മാനത്തുക തട്ടിയെടുക്കാന് തന്നെ ആരെങ്കിലും അപായപ്പെടുത്തുമെന്ന ഭയം കാരണം ബിര്ഷുവിന് ഇന്നലെ പനിയും വിറയലും ആയിരുന്നു. ഇതെത്തുടര്ന്നാണ് സ്ഥലം മാറ്റിയതെന്ന് തമ്പാനൂര് എസ്എച്ച്ഒ എസ്.പ്രകാശ് പറഞ്ഞു. സമ്മാനത്തുക വാങ്ങി ബിര്ഷു നാട്ടിലേക്കു മടങ്ങുംവരെ പൊലീസ് നിരീക്ഷണമുണ്ടാകും.
ലോട്ടറി അടിച്ചതറിഞ്ഞ് ഇതര സംസ്ഥാനക്കാരായ ഒട്ടേറെ സുഹൃത്തുക്കള് ബിര്ഷുവിനെ തേടിയെത്തിയിരുന്നു. ഇതോടെയാണ് ഇയാള് ഭയപ്പെട്ടതെന്നും പൊലീസ് പറഞ്ഞു. 'സര്, മുച്ഛേ ബചാവോ'....എന്നു നിലവിളിച്ചു കൊണ്ട് ബുധനാഴ്ച വൈകിട്ടാണ് ഇയാള് തമ്പാനൂര് പൊലീസ് സ്റ്റേഷനിലേക്ക് ഓടിക്കയറിയത്.
തിങ്കളാഴ്ച തമ്പാനൂരിലെ ഒരു ലോട്ടറിക്കച്ചവടക്കാരനില് നിന്നാണ് ബിര്ഷു ഫിഫ്റ്റി ഫിഫ്റ്റിയുടെ 5 ടിക്കറ്റുകള് എടുത്തത്. സമ്മാനം അടിച്ചോ എന്നറിയാന് ബുധനാഴ്ച വൈകിട്ട് ഇതേ ലോട്ടറിക്കച്ചവടക്കാരനെ ബിര്ഷു സമീപിച്ചു. കടക്കാരന് ടിക്കറ്റ് വാങ്ങി നോക്കിയപ്പോഴാണ് ഒന്നാം സമ്മാനം ബിര്ഷുവിനാണ് എന്നറിഞ്ഞത്. അറിഞ്ഞപാടേ ടിക്കറ്റുമായി ഓടി പൊലീസ് സ്റ്റേഷനില് അഭയം തേടുകയായിരുന്നു.
ടിക്കറ്റ് ബാങ്കിലോ ലോട്ടറി വകുപ്പിലോ ഏല്പിക്കാന് സഹായം വേണമെന്നും അതുവരെ തനിക്ക് സുരക്ഷ നല്കണം എന്നുമായിരുന്നു ബിര്ഷുവിന്റെ ആവശ്യം. ബിര്ഷു പറഞ്ഞത് മുഴുവന് കേട്ട തമ്പാനൂര് എസ്എച്ച്ഒ ഉടന് തന്നെ ഫെഡറല് ബാങ്ക് മാനേജരെ വിളിച്ചുവരുത്തി ടിക്കറ്റ് ഏല്പിക്കുകയായിരുന്നു. ഒരേ നമ്പറിലെ 5 സീരീസ് ടിക്കറ്റുകള് വാങ്ങിയതു കാരണം 8000 രൂപയുടെ 4 സമാശ്വാസ സമ്മാനങ്ങളും ബിര്ഷുവിനു ലഭിച്ചു.
ലോട്ടറിയടിച്ചെങ്കിലും ഇതര സംസ്ഥാനക്കാര്ക്ക് പണം കിട്ടാന് നടപടിക്രമങ്ങള് ഏറെയാണ്. മലയാളികള്ക്കു ലോട്ടറി അടിച്ചാല് ബാങ്കിലോ ലോട്ടറി വകുപ്പിലോ ടിക്കറ്റ് നല്കി അധികം വൈകാതെ പണം മാറിയെടുക്കാം. എന്നാല് ഇതര സംസ്ഥാനക്കാര്ക്കാണ് ലോട്ടറി അടിക്കുന്നതെങ്കില് പണം കൈപ്പറ്റാന് നടപടിക്രമങ്ങള് ലളിതമല്ല. ഒരു ലക്ഷം രൂപ വരെയുള്ള ടിക്കറ്റ് ജില്ലാ ലോട്ടറി ഓഫിസില് നിന്ന് ആര്ക്കും മാറിയെടുക്കാം.
എന്നാല്, ഇതര സംസ്ഥാന മേല്വിലാസക്കാരാണെങ്കില് തിരുവനന്തപുരത്തെ ലോട്ടറി ഡയറക്ടറേറ്റില് നോട്ടറൈസ് ചെയ്ത രേഖകളുമായി എത്തണം. ഇവിടെയുള്ള സമിതി പരിശോധിച്ച ശേഷമേ സമ്മാനം നല്കൂ. കാരണം, കേരള ലോട്ടറി മറ്റു സംസ്ഥാനങ്ങളില് വില്ക്കാന് പാടില്ല. അതിനാല് ലോട്ടറി കേരളത്തിലെത്തിയപ്പോള് വാങ്ങിയതാണെന്നു വാങ്ങിയ ആള് തെളിയിക്കേണ്ടതുണ്ട്. അതിനാലാണ് ഇതര സംസ്ഥാന മേല്വിലാസക്കാര്ക്കു മാത്രമായി ഈ നടപടിക്രമം.
കഴിഞ്ഞ ദിവസമാണ് പട്ടാപ്പകല് സ്റ്റേഷനിലേക്ക് എന്നെ രക്ഷിക്കൂ എന്നുപറഞ്ഞുകൊണ്ട് ഓടിക്കയറി എത്തിയ ഇതര സംസ്ഥാന തൊഴിലാളിയെ കണ്ട് പൊലീസുകാര് കുഴങ്ങിയത്. കാര്യങ്ങള് ചോദിച്ചറിയാന് തുടങ്ങിയപ്പോള് പോക്കറ്റില് നിന്നൊരു ലോട്ടറിയായിരുന്നു ആ ഇതര സംസ്ഥാന തൊഴിലാളി പൊലീസുകാരെ കാട്ടിക്കൊടുത്തത്. അതാകട്ടെ കേരള സര്ക്കാര് വ്യാഴാഴ്ച നറുക്കെടുത്ത ഫിഫ്റ്റി-ഫിഫ്റ്റി ലോട്ടറിയില് ഒന്നാം സമ്മാനത്തിന് അര്ഹമായ ടിക്കറ്റായിരുന്നു. തിരുവനന്തപുരം തമ്പാനൂര് പൊലീസ് സ്റ്റേഷനിലാണ് ലോട്ടറി ടിക്കറ്റില് ബംപര് സമ്മാനമടിച്ച പശ്ചിമ ബംഗാള് സ്വദേശിയായ ബിര്ഷു റാബ പൊലീസ് സുരക്ഷയും അഭയവും തേടിയെത്തിയത്. തങ്ങളുടെ ഫേസ്ബുക്ക് പേജിലൂടെ കേരള പൊലീസ് തന്നെയാണ് ഇക്കാര്യം അറിയച്ചത്.
"
https://www.facebook.com/Malayalivartha
