തലസ്ഥാന നഗരത്തിലെ മുട്ടട ലഹരിക്കടത്ത് കേസ്... പേരൂര്‍ക്കട ജില്ലാ ആശുപത്രിയില്‍ നിന്ന് ഒ പി ടിക്കറ്റ് എടുത്ത് ഡോക്ടറുടെ വ്യാജ സീല്‍ ഉണ്ടാക്കി കുറിപ്പടി തയ്യാറാക്കും. ഇതുപയോഗിച്ച് മെഡിക്കല്‍ സ്റ്റോറുകളില്‍ നിന്ന് ഗുളികകള്‍ വാങ്ങി വില്‍പ്പന നടത്തുകയാണ് ചെയ്തിരുന്നത്. റാഫ എന്ന യുവതിയാണ് ഇത്തരത്തില്‍ മരുന്ന് വാങ്ങുന്നതിന് നേതൃത്വം നല്‍കിയിരുന്നത്.


തലസ്ഥാന നഗരത്തിലെ മുട്ടട ലഹരിക്കടത്ത് കേസില്‍ സിറ്റിയിലെ മയക്കുമരുന്ന് ലോബിയെ നിയന്ത്രിച്ചിരുന്ന നേതാവ് നഴ്‌സിംഗ് വിദ്യാര്‍ത്ഥിനി മുട്ടട സ്വദേശിനി 23 കാരി റാഫയടക്കം 3 പ്രതികള്‍ക്കെതിരെ എക്‌സൈസ് എന്‍ഫോഴ്‌സ്‌മെന്റ് ആന്റ് ആന്റി നര്‍കോട്ടിക് സ്‌ക്വാഡ് കുറ്റപത്രം സമര്‍പ്പിച്ചു. തിരുവനന്തപുരം ജില്ലാ സെഷന്‍സ് കോടതി മുമ്പാകെയാണ് അന്വേഷണ ഉദ്യോഗസ്ഥനായ അസി. കമ്മീഷണര്‍ കുറ്റപത്രം സമര്‍പ്പിച്ചത്.

2023 ജനുവരിയിലാണ് സംഭവം നടന്നത്. മുട്ടട ചാത്തിയോട് റോഡില്‍ രാത്രി വാഹനപരിശോധനയ്ക്കിടെ മയക്കുമരുന്നായി ഉപയോഗിക്കുന്ന ഗുളികകളും 0.23 ഗ്രാം എം ഡി എം എയും കഞ്ചാവും പിടികൂടുകയായിരുന്നു. ഓട്ടോറിക്ഷ ഡ്രൈവറായ മണ്ണന്തല കുളപ്പറക്കോണം രാജന്‍ നിവാസില്‍ അരവിന്ദ് (24), ഇടവക്കോട് സജി ഭവനില്‍ ജിത്ത് ജി എസ് (26), മുട്ടട കുശവര്‍ക്കല്‍ ദീപം വീട്ടില്‍ വാടകയ്ക്ക് താമസിക്കുന്ന റാഫ ടി പ്രദീപ് (23) എന്നിവരാണ് 1 മുതല്‍ 3 വരെ പ്രതികള്‍.
പേരൂര്‍ക്കട ജില്ലാ ആശുപത്രിയില്‍ നിന്ന് ഒ പി ടിക്കറ്റ് എടുത്ത് ഡോക്ടറുടെ വ്യാജ സീല്‍ ഉണ്ടാക്കി കുറിപ്പടി തയ്യാറാക്കും. ഇതുപയോഗിച്ച് മെഡിക്കല്‍ സ്റ്റോറുകളില്‍ നിന്ന് ഗുളികകള്‍ വാങ്ങി വില്‍പ്പന നടത്തുകയാണ് ചെയ്തിരുന്നത്. റാഫ എന്ന യുവതിയാണ് ഇത്തരത്തില്‍ മരുന്ന് വാങ്ങുന്നതിന് നേതൃത്വം നല്‍കിയിരുന്നത്. ഇവര്‍ നഴ്സിംഗ് പഠിച്ചിട്ടുണ്ട്. എന്നാല്‍ കോഴ്സ് പൂര്‍ത്തിയാക്കിയിരുന്നില്ല. ഒ പി ടിക്കറ്റില്‍ കുറിപ്പടി എഴുതിച്ചേര്‍ക്കുന്നത് ഇവരാണ്. വ്യാജ സീലും ജില്ലാ ആശുപത്രിയിലെ ഒ പി ടിക്കറ്റും ഇവരില്‍ നിന്ന് കണ്ടെടുത്തു. പ്രതികളിലൊരാളായ അരവിന്ദ് പോക്സോ കേസിലും പ്രതിയാണ്.