ഇത്തവണ പെട്ടുപോയി... കേരളം ഏറെ വേദനിച്ച നിമിഷങ്ങളില് ഉമ്മന്ചാണ്ടിക്കെതിരെ അധിക്ഷേപം നടത്തിയ നടന് വിനായകനെതിരെ പൊലീസ് കേസെടുത്തു; ഇനിയൊരാളും ചെയ്യാന് പാടില്ല
അത്രമേല് സ്നേഹിച്ച പ്രിയ നേതാവായിരുന്നു ഉമ്മന്ചാണ്ടി. അദ്ദേഹത്തിന്റെ വേര്പാടിന്റെ വേദന പലര്ക്കും പല തരത്തിലായിരുന്നു. അതിനിടയ്ക്ക് നടന് വിനായകന്റെ സോഷ്യല് മീഡിയ പോസ്റ്റ്. ഉമ്മന് ചാണ്ടിയെ സാമൂഹിക മാധ്യമത്തിലൂടെ അധിക്ഷേപിച്ച നടന് വിനായകനെതിരെ പൊലീസ് കേസെടുത്തു.
യൂത്ത് കോണ്ഗ്രസ് പ്രവര്ത്തകരുടെ പരാതിയില് എറണാകുളം നോര്ത്ത് പൊലീസാണ് വിനായകനെതിരെ കേസെടുത്തത്. ഉമ്മന്ചാണ്ടിയെ അധിക്ഷേപിച്ച് സാമൂഹിക മാധ്യമങ്ങളില് വീഡിയോ പ്രചരിപ്പിച്ചെന്നാണ് പരാതിയില് പറയുന്നത്. യൂത്ത് കോണ്ഗ്രസ് പ്രവര്ത്തകന് സോണി പനന്താനമാണ് കൊച്ചി എസിപിക്ക് പരാതി നല്കിയത്.
വിനായകനെതിരെ എറണാകുളം ഡിസിസി ജനറല് സെക്രട്ടറി അജിത്ത് അമീര് ബാവയും പൊലീസില് പരാതി നല്കിയിട്ടുണ്ട്. യൂത്ത് കോണ്ഗ്രസ് ജില്ലാ ജനറല് സെക്രട്ടറിയായ സതീഷ് ഡിജിപിക്കാണ് പരാതി നല്കിയത്. വിനായകന് സിനിമ മേഖലയിലെ ലഹരിമാഫിയയുടെ തലവനാണെന്നാണ് കൊച്ചി അസിസ്റ്റന്റ് പൊലീസ് കമ്മീഷണര്ക്ക് അജിത്ത് അമീര് ബാവ നല്കിയ പരാതിയില് ആരോപിക്കുന്നത്. വിനായകന്റെ ലഹരി - മാഫിയ ബന്ധങ്ങള് അന്വേഷിക്കണമെന്നും പരാതിയില് പറയുന്നു.
ആരാണ് ഈ ഉമ്മന് ചാണ്ടി, ഉമ്മന് ചാണ്ടി ചത്തു, എന്തിനാണ് മൂന്ന് ദിവസം അവധി എന്നൊക്കൊണ് ഫേസ്ബുക്ക് ലൈവിലൂടെ വിനായകന് ചോദിച്ചത്. 'ആരാണ് ഈ ഉമ്മന് ചാണ്ടി, എന്തിനാടോ മൂന്ന് ദിവസൊക്കെ, നിര്ത്തിയിട്ട് പോ പത്രക്കാരോടാണ് പറയുന്നത്. ഉമ്മന് ചാണ്ടി ചത്ത് അതിന് ഞങ്ങള് എന്ത് ചെയ്യണം എന്റെ അച്ഛനും ചത്തു നിങ്ങളുടെ അച്ഛനും ചത്തു. അതിനിപ്പോ ഞങ്ങളെന്ത് ചെയ്യണം. നല്ലവനാണെന്ന് നിങ്ങള് വിചാരിച്ചാലും ഞാന് വിചാരിക്കില്ല. കരുണാകരന്റെ കാര്യം നോക്കിയാല് നമ്മക്കറിയില്ലെ ഇയാള് ആരോക്കെയാണെന്ന്' എന്നാണ് വിനായകന് ലൈവില് ചോദിച്ചത്. വീഡിയോ സോഷ്യല് മീഡിയയില് വലിയ ചര്ച്ചയായതിന് പിന്നാലെ താരം പോസ്റ്റ് വലിച്ചിരുന്നു. എന്നാല്, അതിനകം വീഡിയോ സാമൂഹിക മാധ്യമങ്ങളില് വന് തോതില് ഷെയര് ചെയ്യപ്പെടുകയും കടുത്ത വിമര്ശനത്തിന് ഇടയാക്കുകയും ചെയ്തു.
അതേസമയം മുന് മുഖ്യമന്ത്രി ഉമ്മന് ചാണ്ടിക്ക് വിട ചൊല്ലി കേരളം. രാപ്പകലില്ലാതെ ജനങ്ങള്ക്കിടയില് ജീവിച്ച പുതുപ്പള്ളിക്കാരന് കുഞ്ഞൂഞ്ഞിന് ഇനി സെന്റ് ജോര്ജ് വലിയ പള്ളിയില് ഒരുക്കിയ പ്രത്യേക കലറയില് അന്ത്യ വിശ്രമം. തിരുനക്കരയില് നിന്ന് വള്ളക്കാലിലെ വീട്ടിലേക്കും തുടര്ന്ന് പള്ളിയിലേക്കും ജനസാഗരത്തിന്റെ അകമ്പടിയോടെയാണ് ഉമ്മന് ചാണ്ടിയുടെ മൃതശശീരം വഹിച്ചുകൊണ്ടുള്ള വിലാപയാത്രയെത്തിയത്. രാഹുല് ഗാന്ധിയടക്കമുള്ള നേതാക്കള് വിലാപയാത്രയുടെ ഭാഗമായി. പള്ളിയിലെ അന്ത്യ ശുശ്രൂഷകള്ക്ക് ശേഷം ഉമ്മന് ചാണ്ടിയുടെ മകന് ചാണ്ടി ഉമ്മന് എല്ലാവര്ക്കും നന്ദിയറിയിച്ചു.
ഉമ്മന്ചാണ്ടിയെന്ന നേതാവിനെ കേരളത്തിന് സമ്മാനിച്ച കോട്ടയം, സമാനതകളില്ലാത്ത യാത്രാമൊഴിയാണ് ആ ജനനായകന് നല്കിയത്. കേരളത്തിന്റെ എല്ലാ ഭാഗത്തുനിന്നുമായി പതിനായിരങ്ങള് ഒഴുകിയെത്തിയപ്പോള് തിരുനക്കര ആള്ക്കടലായി മാറി. ആചാരവെടിയും ഔദ്യോഗിക ബഹുമതിയും വേണ്ടെന്നുവച്ച നേതാവിന് ആദരമായി ആയിരക്കണക്കിന് സാധാരണക്കാര് കണ്ണീര്പ്പൂക്കള് സമ്മാനിച്ചു. 28 മണിക്കൂര് എടുത്ത് അഞ്ച് ജില്ലകളിലെ ജനപ്രവാഹത്തെ മുറിച്ചുകടന്ന് രാവിലെ 11 നാണ് വിലാപയാത്ര കോട്ടയം തിരുനക്കരയില് എത്തിയത്. അക്ഷരാര്ത്ഥത്തില്, മണ്ണ് നുള്ളിയിട്ടാല് താഴാത്ത ജനസമുദ്രമായിരുന്നു തിരുനക്കരയിലും പുതുപ്പളിയിലേക്കുള്ള വഴിയോരത്തും കാണാന് കഴിഞ്ഞത്.
അധികാരത്തെ എന്നും അപരനോടുള്ള കരുണയാക്കിയ നേതാവിനെ യാത്രയാക്കാന് രാഷ്ട്രീയ നേതാക്കളും താരങ്ങളും തിരുനക്കരയില് കാത്തുനിന്നിരുന്നു. കൈനിറയെ പൂക്കളും മനസ്സ് നിറയെ ഓര്മകളുമായി ഇന്നലെ മുതല് കാത്തുനില്ക്കുകായിരുന്ന ജനക്കൂട്ടം ഒഴുകിക്കയറി. മൂന്നര മണിക്കൂര് നീണ്ട പൊതുദര്ശനം അധികൃതര് ഉച്ചയ്ക്ക് രണ്ടരയ്ക്ക് കണിശതയോടെ അവസാനിപ്പിക്കുമ്പോഴും ഇരട്ടിയോളം ജനം പുറത്ത് ബാക്കിയായിരുന്നു. പുതുപ്പള്ളി തറവാട്ടിലെ പ്രാര്ത്ഥനയ്ക്ക് ശേഷം പുതിയ വീട് പണിയുന്ന സ്ഥലത്തെ പൊതുദര്ശനത്തിലും നിരവധി ജനങ്ങളെത്തി. ഭവനത്തിലെ പ്രാര്ത്ഥനാ ചടങ്ങികള്ക്ക് ശേഷം നേതാവിന്റെ മൃതദേഹം പള്ളിയിലേക്ക് കൊണ്ട് പോകുമ്പോഴും പിരിയാനാവതെ ജനം ഒപ്പം നിന്നു.
"
https://www.facebook.com/Malayalivartha
