ഉമ്മന്‍ചാണ്ടിയുടെ മരണത്തെ തുടര്‍ന്ന് പുതുപ്പള്ളി നിയോജക മണ്ഡലത്തില്‍ നടക്കാന്‍ പോകുന്ന ഉപതിരഞ്ഞെടുപ്പിന് ഒരുക്കങ്ങള്‍ നടത്താന്‍ സിപിഎം സംസ്ഥാന സെക്ട്രറിയേറ്റ് ഇന്ന് കൂടുന്നു. സെക്രട്ടറിയേറ്റിന്റെ പ്രധാന ചര്‍ച്ച പുതുപ്പള്ളി ഉപതിരഞ്ഞെടുപ്പ് തന്നെയാണ് .ഉമ്മന്‍ചാണ്ടിയുടെ മരണത്തെ തുടര്‍ന്നുണ്ടായ സഹതാപ തരംഗത്തെയാണ് സിപിഎം ഭയപ്പെടുന്നത്. ഉമ്മന്‍ചാണ്ടി പരാജയം അറിയാതെ ജയിച്ചു കയറിയ പുതുപ്പള്ളിയില്‍ ഉമ്മന്‍ചാണ്ടിയില്ലാത്ത ആദ്യതിരഞ്ഞെടുപ്പാണ് സിപിഎമ്മിന് മുന്നിലുള്ളത്. അതുകൊണ്ട് സംസ്ഥാന സെക്രട്ടറിയേറ്റില്‍ വിശദമായ ചര്‍ച്ച നടക്കുമെന്നാണറിയുന്നത്. അടു്ത്ത മാസം ആദ്യം നടക്കുന്ന സംസ്ഥാന കമ്മിറ്റിയില്‍ തിരഞ്ഞെടുപ്പ് സംബന്ധിച്ച അന്തിമ തീരുമാനമുണ്ടാക്കാനാണ് നീക്കം.

വിവാദങ്ങള്‍ക്കും ചര്‍ച്ചകള്‍ക്കുമിടെ ഏകീകൃത സിവില്‍ കോഡില്‍ സി പി എം സംഘടിപ്പിച്ച ജനകീയ സെമിനാറിനെതിരെ ഉയര്‍ന്നുവന്ന ആരോപണങ്ങളും സംസ്ഥാന സെക്രട്ടറിയേറ്റ് ചര്‍ച്ച ചെയ്‌തേക്കും. സിപിഎം ജനറല്‍ സെക്രട്ടറി സീതാറാം യെച്ചൂരി ഉന്നയിച്ച ഏകസിവില്‍ കോഡ് വിഷയത്തിലെ സംശയങ്ങളും ചര്‍ച്ച ചെയ്യുന്നുണ്ട്.
കോണ്‍ഗ്രസിനെ മാറ്റിനിര്‍ത്തി മുസ്‌ലിം ലീഗിനെ സെമിനാറിലേക്ക് ക്ഷണിച്ചതോടെയായിരുന്നു വിഷയത്തില്‍ വിവാദങ്ങള്‍ ഉടലെടുത്തത്. സെമിനാറില്‍ ലീഗിനെ എത്തിക്കാന്‍ കഴിഞ്ഞാല്‍ അത് നേട്ടമാകുമെന്ന് സി പി എം കണക്ക് കൂട്ടിയിരുന്നു. എന്നാല്‍ ലീഗ് ക്ഷണം നിരസിച്ചത് സി പി എമ്മിന് തിരിച്ചടിയായി. അതേസമയം സമസ്ത ഉല്‍പ്പെടെയുള്ള ഇസ്ലാം സംഘടനകള്‍ സെമിനാറില്‍ പങ്കെടുത്തത് സിപിഎമ്മിന് നേട്ടം തന്നെയാണ്.

ബിജെപിയുടെ ഭാഗമായ ബി ഡി ജെ എസിനെ സെമിനാറില്‍ പങ്കെടുപ്പിച്ചെങ്കിലും സെമിനാറിന് ശേഷം വെള്ളാപ്പള്ളി നടേശന്‍ കളംമാറി ചവിട്ടയത് സിപിഎമ്മിന് വലിയ തിരിച്ചടിയായിട്ടുണ്ട്. ഏക സിവില്‍ കോഡ് ബില്ലിന്റെ കരട് വരും മുന്‍പാണ് വിഷയത്തില്‍ തമ്മില്‍ തല്ല് നടക്കുന്നതെന്നും ഏകദേശ രൂപവും തോന്നലുകള്‍ വെച്ചുള്ള ചര്‍ച്ചകളും സംവാദങ്ങളുമാണ് ഇപ്പോള്‍ നടക്കുന്നതെന്നുമാണ് വെള്ളാപ്പള്ളി പ്രതികരിച്ചത്. വെള്ളാപ്പള്ളിയുടെ പ്രതികരണം സിപിഎമ്മിനെ ഒറ്റപ്പെടുത്തിയതില്‍ പിണറായി വിജയന്‍ തന്നെ ഉത്തരം പറയേണ്ടി വരും.

ഏകസിവില്‍ കോഡ് സെമിനാറില്‍ സിപി ഐ യെ ഒഴിവാക്കി കേരള കോണ്‍ഗ്രസ് മാണി വിഭാഗത്തെ ക്ഷണിച്ചതിലും വിമര്‍ശനം ഉയരുന്നുണ്ട്. എല്ലാറ്റിനേക്കാളുമുപരി ഏകസിവില്‍ കോഡ് സെമിനാറില്‍ നിന്ന് ഇ.പി.ജയരാജന്‍ വിട്ടുനിന്നത് ചര്‍ച്ചയാകുമെന്നാണറിയുന്നത്. സംസ്ഥാന സെക്രട്ടറി എം.വി.ഗോവിന്ദന്‍ നയിച്ച സംസ്ഥാന ജാഥയില്‍ നിന്നും ഇ പി ജയരാജന്‍ വിട്ടു നിന്നിരുന്നു. എല്‍ഡിഎഫ് കണ്‍വീനറായ ഇ.പി പാര്‍ട്ടി പരിപാടികളില്‍ നിന്നും തുടര്‍ച്ചയായി മാറി നില്ക്കുന്ന സാഹചര്യം പാര്‍ട്ടിയ്ക്ക് വലിയ ക്ഷീണമാണുണ്ടായിരിക്കുന്നതെന്നാണ് വിലയിരുത്തല്‍. എല്‍ഡിഎഫ് വിളിച്ചു കൂട്ടുകയോ ഭരണപരമോ നയപരമോ ആയ കാര്യങ്ങള്‍ ചര്‍ച്ച ചെയ്യാത്തതില്‍ ഘടകകക്ഷികള്‍ക്ക് അമര്‍ഷമുണ്ടെന്നതിന്റെ അടിസ്ഥാനത്തിലാണ് ചര്‍്ച്ച.

പുതുപ്പള്ളി ഉപതിരഞ്ഞെടുപ്പിന് തൊട്ടുപിന്നാലെ വരുന്ന പൊതുതിരഞ്ഞെടുപ്പിനും എല്‍ഡിഎഫിനെ സജ്ജമാക്കേണ്ടതാണെന്ന അഭിപ്രായങ്ങള്‍ ഉയര്‍ന്നു കഴിഞ്ഞു. എന്‍സിപി പിളര്‍ന്നതിനാല്‍ കേരളഘടകത്തിന്റെ ഭാവിയും അനിശ്ചിതത്വത്തിലാണെന്ന വിലയിരുത്തപ്പെടുന്നുണ്ട്. ഇടതുപക്ഷത്തേയ്ക്ക് മുസ്ലീംലീഗിനെ കൊണ്ടു വരാന്‍ നടത്തിയ ശ്രമങ്ങള്‍ അതിരു കടന്നെന്നും അത് മ്റ്റു വിഭാഗങ്ങളുടെ എതിര്‍പ്പിന് കാരണമായിട്ടുണ്ടെന്നും കണ്ടെത്തിയിട്ടുണ്ട്. ലീഗിനെ കൂടെ കൂട്ടുക അല്ലെങ്കില്‍ പിളര്‍ത്തുകയെന്ന ലക്ഷ്യത്തില്‍ നിന്നും പിന്നോട്ട് പോകാന്‍ സാധ്യതയില്ല. മന്ത്രിമാരുടെ പ്രവര്‍ത്തന ശൈലിയില്‍ മാറ്റം വേണമെന്ന അഭിപ്രായവും ചര്‍ച്ച ചെയ്യപ്പെടും. ഉമ്മന്‍ചാണ്ടി ലഭിച്ച മരണാനന്തര ബഹുമതിയും ആദരവും ഇടത് നേതാക്കള്‍ക്കാണ് ലഭിക്കേണ്ടിയിരുന്നതെന്ന തിരിച്ചറിവില്‍ മന്ത്രിമാരും നേതാക്കളും കൂടുതല്‍ ജനകീയമാകുന്നതിനെ കുറിച്ചുള്ള വിഷയങ്ങളുെ സെക്രട്ടറിയേറ്റില്‍ ചര്‍ച്ച ചെയ്യുമെന്നാണ് വിവരം.

പൊതു തിരഞ്ഞെടുപ്പില്‍ ഇന്‍ന്ത്യ യെന്ന സഖ്യത്തില്‍ കേരളത്തെ ഉള്‍പ്പെടുത്താന്‍ കഴിയില്ലെന്ന ധാരണയില്‍ തന്നെയാണ് സംസ്ഥാന സെക്രട്ടറിയേറ്റും എത്തി നില്ക്കുന്നത്. കേരളത്തില്‍ രാഷ്ട്രീയ സാഹചര്യം വ്യത്യസ്തമാണെന്ന് സഖ്യനേതാക്കളെ അറിയിച്ചിട്ടുണ്ട്. ബിജെപിയെ തോല്പിക്കുന്നതിനായി രണ്ട് ചേരിയില്‍ നിന്ന് മത്സരിക്കാന്‍ തന്നെയാണ് തീരുമാനം. എന്നാല്‍ പുതുപ്പളളി ഉപതിരഞ്ഞെടുപ്പ് പൊതുതിരഞ്ഞെടുപ്പിന് മുന്‍പുള്ള ഒരു റിഹേഴ്‌സലായി മാറുമെന്ന ആശങ്ക സിപിഎമ്മിനെ അലട്ടുന്നുണ്ട്. അതുകൊണ്ട് സര്‍വ്വസമ്മതനായ സ്ഥാനാര്‍ത്ഥി വേണോ, അതോ രണ്ടു തവണ മത്സരിച്ച ജെയ്ക് സി തോമസിനെ തന്നെ മത്സരിപ്പിക്കണോയെന്ന കാര്യത്തിലും ഏകദേശ ധാരണയുണ്ടാകുമെന്നാണറിയുന്നത്.

തൃക്കാക്കരയില്‍ പൊതുസമ്മതന്‍ എന്ന ലേബലില്‍ അവതരിപ്പിച്ച സ്ഥാനാര്‍ത്ഥിയെ ജനം സ്വീകരി്ച്ചില്ലെന്നു മാത്രമല്ല അത് പാര്‍്ട്ടിയ്ക്ക് വലിയ ക്ഷീണവുമാണ് നല്കിയത്. അതു കൊണ്ട് പുതുപ്പള്ളിയില്‍ വളരെ ആലോചിച്ച ശേഷമായിരിക്കും തീരുമാനത്തെലെത്തുകയെന്ന നയമാണുണ്ടാവുക. എന്തായാലും ഉമ്മന്‍ചാണ്ടിയുടെ ജനപ്രീതി സിപിഎം നേതാക്കള്‍ കണ്ടു പഠിക്കേണ്ടതാണെന്ന അഭിപ്രായം രഹസ്യമായെങ്കിലും സിപിഎം നേതാക്കള്‍ ഉയര്‍ത്തുന്നുണ്ട്.