വാഹനാപകടത്തില്‍ 90 ശതമാനം സ്ഥിരം വൈകല്യമുണ്ടായ യുവാവിന് 1.58 കോടി നഷ്ടപരിഹാരം വിധിച്ച് കോടതി. ബൈക്ക് അപകടത്തില്‍ ഗുരുതരമായി പരിക്കേറ്റ പ്രക്കാനം കുട്ടിപ്ലാക്കല്‍ അഖില്‍ കെ.ബോബിക്കാണ് വന്‍തുക നഷ്ടപരിഹാരം ലഭിച്ചത്.

പത്തനംതിട്ട മോട്ടര്‍ ആക്‌സിഡന്റ് ക്ലെയിം ട്രൈബ്യൂണല്‍ ജഡ്ജി ജി.പി.ജയകൃഷ്ണനാണ് 1,58,76,192 രൂപ നഷ്ടപരിഹാരം നല്‍കാന്‍ ഉത്തരവിട്ടത്. 2017 ജൂലൈ 25നാണ് അപകടമുണ്ടായത്.

അഖില്‍ ഓടിച്ചിരുന്ന ബൈക്കില്‍ എതിരെ വന്ന മറ്റൊരു ബൈക്ക് ഇടിക്കുകയായിരുന്നു. ഗുരുതരമായി പരിക്കേറ്റ അഖിലിനെ ആദ്യം കോഴഞ്ചേരിയിലെ സ്വകാര്യ ആശുപത്രിയിലും പിന്നീട് വിദഗ്ധ ചികിത്സയ്ക്കായി വെല്ലൂര്‍ ക്രിസ്ത്യന്‍ മെഡിക്കല്‍ കോളജിലും പ്രവേശിപ്പിച്ചു. നട്ടെല്ലിന് ഗുരുതരമായി പരിക്കേറ്റതിനെ തുടര്‍ന്ന് 90 ശതമാനം സ്ഥിരം വൈകല്യം ഉണ്ടായി. ഇതിന്റെ മെഡിക്കല്‍ ബോര്‍ഡ് സര്‍ട്ടിഫിക്കറ്റും കോടതിയില്‍ ഹാജരാക്കിയിട്ടുണ്ടായിരുന്നു.

വിദേശത്തു ജോലി ചെയ്തിരുന്ന അഖില്‍ അവധിക്കു നാട്ടിലെത്തിയപ്പോഴാണ് അപകടം സംഭവിച്ചത്. അപകടം നടക്കുമ്പോള്‍ 24 വയസ്സായിരുന്നു അഖിലിന്. കോടതി ഉത്തരവ് പ്രകാരം 1,02,49,444 രൂപ കേസ് ഫയല്‍ ചെയ്ത 2018 മാര്‍ച്ച് 14 മുതല്‍ നാളിതു വരെയുള്ള 9 ശതമാനം പലിശയും കോടതിച്ചെലവായ 6,17, 333 രൂപയും സഹിതം 1,58,76,192 രൂപ ഇന്‍ഷുറന്‍സ് കമ്പനി നല്‍കുകയും വേണം.

കേസില്‍ എതിര്‍കക്ഷിയായ നാഷനല്‍ ഇന്‍ഷുറന്‍സ് കമ്പനി പത്തനംതിട്ട ബ്രാഞ്ചില്‍ നിന്നു നഷ്ടപരിഹാരത്തുക ഒരു മാസത്തിനുള്ളില്‍ ഹര്‍ജിക്കാരനു നല്‍കാനും കോടതി നിര്‍ദേശിച്ചു. ബൈക്ക് അപകടത്തില്‍ പരിക്കേറ്റ സംഭവങ്ങളില്‍ സംസ്ഥാനത്ത് വിധിക്കുന്ന ഏറ്റവും വലിയ നഷ്ടപരിഹാരത്തുകയാണ് ഇതെന്നാണ് സൂചനകള്‍. ഹര്‍ജിക്കാരനുവേണ്ടി ഹാജരായത് അഡ്വ.എന്‍.ബാബു വര്‍ഗീസാണ് .