മണിപ്പൂർ കലാപത്തിൽ എൽ.ഡി.എഫ് പ്രക്ഷോഭത്തിനൊരുങ്ങുന്നു. മണിപ്പൂർ ജനതയ്ക്ക് ഐക്യദാർഢ്യം പ്രഖ്യാപിച്ച് സേവ് മണിപ്പൂര്‍ എന്ന മുദ്രാവക്യമുയര്‍ത്തി ജനകീയ കൂട്ടായ്മ നടത്താന്‍ എല്‍ ഡി എഫ് തീരുമാനിച്ചു. 27 ന് 140 മണ്ഡലങ്ങളിലും ആയിരങ്ങളെ അണിനിരത്തിയുള്ള പരിപാടിയാണു നടക്കുകയെന്നു കണ്‍വീനര്‍ ഇ പി ജയരാജന്‍ വാര്‍ത്താ സമ്മേളനത്തില്‍ അറിയിച്ചു. രാവിലെ 10 മുതല്‍ ഉച്ചവരെയാണു പരിപാടി നടക്കുക

 

ഇതിന്റെ ഭാഗമായി നാളെ എൽ.ഡി.എഫ് ജില്ലാകമ്മിറ്റികൾ ചേരും. സ്ത്രീകൾക്ക് മാനവും മര്യാദയ്ക്കും ജീവിക്കാൻ കഴിയാത്ത സാഹചര്യമാണ് മണിപ്പൂരിലുണ്ടായിരിക്കുന്നതെന്ന് എൽ.ഡി.എഫ് കൺവീനർ ഇ.പി. ജയരാജൻ വാർത്താസമ്മേളനത്തിൽ പറഞ്ഞു. സ്ത്രീ സംരക്ഷണം ഉറപ്പുവരുത്താനുള്ള ജനകീയ കൂട്ടായ്മയാണിതെന്ന് ഇ.പി ജയരാജൻ പറഞ്ഞു.

 
മണിപ്പൂര്‍ കലാപത്തിന്റെ പേരില്‍ ഇന്ത്യ ലോകത്തിനു മുമ്പില്‍ അപമാനിക്കപ്പെടുന്നു.സ്ത്രീകളെ തട്ടിക്കൊണ്ടുപോവുക, നഗ്നനയാക്കി നടത്തുക, കൂട്ടബലാല്‍സംഗം ചെയ്യുക തുടങ്ങിയ കാര്യങ്ങള്‍ നടക്കുന്നു. കാര്‍ഗില്‍ യുദ്ധത്തില്‍ സേവനം നടത്തിയ പട്ടാളക്കാരന്റെ ഭാര്യയെപോലും ബലാത്സംഗത്തിനിരയാക്കിയ ഞെട്ടിപ്പിക്കുന്ന വാര്‍ത്ത പുറത്തു വരുന്നു. അവിടെ നടക്കുന്ന കാര്യങ്ങളുടെ ചെറിയ ഭാഗം മാത്രമാണ് പുറത്തുവരുന്നത്

ലോകത്തിന് മുന്നിൽ ഇന്ത്യ തല കുനിക്കേണ്ട അവസ്ഥയാണ് ബി.ജെ.പി സർക്കാർ സൃഷ്ടിച്ചിരിക്കുന്നത്. ഇത്തരം ഭീകര സാഹചര്യത്തിൽ മനുഷ്യമനഃസാക്ഷിയെ തട്ടിയുണർത്താനാണ് എൽ.ഡി.എഫ് പ്രതിഷേധവുമായി രംഗത്ത് വരുന്നതെന്നും അദ്ദേഹം വ്യക്തമാക്കി.

എൽ.ഡി.എഫ് സർക്കാരിന്റെ വികസന നേട്ടങ്ങൾ ജനങ്ങളിൽ എത്തിക്കാൻ നവംബർ‌ ഒന്നുമുതൽ ഏഴുവരെ കേരളീയം എന്നപേരിൽ പ്രചാരണ പരിപാടി സംഘടിപ്പിക്കുമെന്നും ഇ.പി. ജയരാജൻ അറിയിച്ചു. സ്ത്രീ സംരക്ഷണത്തിനു വേണ്ടിയുള്ള കേരള ജനതയുടെ കൂട്ടായ്മയാണിതെന്നും അദ്ദേഹം പറഞ്ഞു.