വീട് ആക്രമിച്ചതിനെതിരെ നല്കിയ പരാതി പിന്വലിക്കാന് തയ്യാറെന്ന് നടന് വിനായകന്
ഉമ്മന്ചാണ്ടിയെ അധിക്ഷേപിച്ച സംഭവത്തില് യൂത്ത് കോണ്ഗ്രസ് പ്രവര്ത്തകര് വീട് ആക്രമിച്ചതിനെതിരെ നല്കിയ പരാതി പിന്വലിക്കാന് തയ്യാറെന്ന് നടന് വിനായകന്. പരാതി പിന്വലിക്കാന് തയ്യാറെന്ന് വിനായകന് പൊലീസിനെ അറിയിച്ചു. മുന് മുഖ്യമന്ത്രി ഉമ്മന് ചാണ്ടിക്കെതിരെ വിനായകന് സോഷ്യല് മീഡിയയിലൂടെ അധിക്ഷേപകരമായ പരാമര്ശങ്ങള് നടത്തിയത് വ്യാപക വിമര്ശനങ്ങള്ക്ക് ഇടയാക്കിയിരുന്നു. ഇതിനു പിന്നാലെയാണ് വിനായകന്റെ കൊച്ചിയിലെ ഫ്ലാറ്റിന് നേരെ അക്രമമുണ്ടായത്.
കൊച്ചി കലൂര് സ്റ്റേഡിയത്തിന് പിന്നിലെ സ്റ്റേഡിയം ലിങ്ക് റോഡിലെ ഫ്ലാറ്റിലെത്തിയ സംഘമാണ് ആക്രമണം നടത്തിയത്. വൈകിട്ട് നാല് മണിയോടെ ആയിരുന്നു സംഭവം. സംഘം ജനല്ച്ചില്ലുകള് അടിച്ച് തകര്ക്കുകയും വാതില് തകര്ക്കാന് ശ്രമിക്കുകയും ചെയ്തു. അക്രമം നടത്തിയവര് ഉമ്മന്ചാണ്ടിക്ക് അനുകൂലമായി മുദ്രാവാക്യം വിളിച്ചുകൊണ്ടാണ് എത്തിയത്. പൊലീസും ഫ്ലാറ്റിലെ സുരക്ഷാജീവനക്കാരും ചേര്ന്നാണ് ഇവരെ പിടിച്ച് മാറ്റിയത്.
അതേസമയം അധിക്ഷേപ പരാമര്ശത്തില് വിനായകനെതിരെ എറണാകുളം നോര്ത്ത് പൊലീസ് കേസ് എടുത്തിട്ടുണ്ട്. യൂത്ത് കോണ്ഗ്രസ് പ്രവര്ത്തകരുടെ പരാതിയിലാണ് കേസ് എടുത്തിരിക്കുന്നത്. ഉമ്മന്ചാണ്ടിയെ അധിക്ഷേപിച്ച് സാമൂഹിക മാധ്യമങ്ങളില് വീഡിയോ പ്രചരിപ്പിച്ചെന്നാണ് പരാതിയില് പറയുന്നത്.
ഉമ്മന്ചാണ്ടിയെ അധിക്ഷേപിച്ചെന്ന കേസില് നടന് വിനായകനെ കൊച്ചി സിറ്റി പൊലീസ് ഇന്ന് ചോദ്യം ചെയ്തു. ഇദ്ദേഹത്തിന്റെ മൊബൈല് ഫോണ് നിര്ണായക തെളിവായി പൊലീസ് പിടിച്ചെടുത്തു. കലൂരിലെ വിനായകന്റെ വീട്ടിലെത്തിയാണ് പൊലീസ് സംഘം ചോദ്യം ചെയ്തത്. എറണാകുളം ടൗണ് നോര്ത്ത് പൊലീസാണ് വിനായകനെതിരായ പരാതികള് അന്വേഷിക്കുന്നത്. ചോദ്യം ചെയ്യലില് വിനായകന് കുറ്റം സമ്മതിച്ചു. പ്രകോപനം കൊണ്ടാണ് അത്തരത്തില് ഫേസ്ബുക്കില് ലൈവ് നടത്തിയതെന്ന് വിനായകന് പോലീസിനോട് പറഞ്ഞതായാണ് വിവരം.
വിലാപയാത്രക്കിടെയാണ് നടന് വിനായകന് സമൂഹ മാധ്യമങ്ങളില് ഉമ്മന് ചാണ്ടിയെ അധിക്ഷേപിക്കുന്ന വിധത്തില് പോസ്റ്റിട്ടത്. ഇതിനെതിരെ നിരവധി പരാതികള് എത്തിയതോടെയാണ് എറണാകുളം നോര്ത്ത് പൊലീസ് കേസെടുത്തത്. പ്രകോപനപരമായി സംസാരിക്കല്, മൃതദേഹത്തോട് അനാദരവ് തുടങ്ങിയ വകുപ്പുകള് ചുമത്തിയാണ് കേസ്. ജാമ്യം കിട്ടാവുന്ന വകുപ്പുകളാണ് വിനായകനെതിരെ ചുമത്തിയിട്ടുള്ളത്. വിനായകനെ അറസ്റ്റ് ചെയ്യണം എന്നാവശ്യപ്പെട്ട് പരാതിക്കാരനായ സനല് നെടിയതറ പൊലീസ് സ്റ്റേഷന് മുമ്പില് ഒറ്റയാള് സമരം നടത്തിയിരുന്നു.
https://www.facebook.com/Malayalivartha
