രോഗിയുടെ മരണം അറിയിച്ച മെഡിക്കല്‍ കോളേജ് ന്യൂറോ സര്‍ജനായ വനിതാ ഡോക്ടറെ രോഗിയുടെ ഭര്‍ത്താവ് ചവിട്ടി വീഴ്ത്തിയെന്ന കേസില്‍ പ്രതിയായ ഭര്‍ത്താവിനെതിരെ പോലീസ് കുറ്റപത്രം സമര്‍പ്പിച്ചു.


തിരുവനന്തപുരം അഡീ.ചീഫ് ജുഡീഷ്യല്‍ മജിസ്‌ട്രേട്ട് കോടതിയിലാണ് സിറ്റി മെഡിക്കല്‍ കോളേജ് പോലീസ് കുറ്റപത്രം സമര്‍പ്പിച്ചത്. ഓപ്പറേഷനെ തുടര്‍ന്ന് മരണപ്പെട്ട യുവതിയുടെ ഭര്‍ത്താവ് കൊല്ലം വളിച്ചെക്കാല റ്റി.ബി. ജംഗ്ഷന്‍ പുതുമനയില്‍ സെന്തില്‍ കുമാര്‍ (52) ആണ് ഏക പ്രതി. ന്യൂറോ ഐസിയുവിലുണ്ടായിരുന്ന രോഗി 2022 നവംബര്‍ 22 അര്‍ദ്ധ രാത്രിയാണ് മരിച്ചത്.

23 ന് പുലര്‍ച്ചെ 1.20 ന് ന്യൂറോ സര്‍ജറി വിഭാഗത്തിലെ സീനിയര്‍ റസിഡന്റ് ഡോക്ടര്‍ മേരി ഫ്രാന്‍സിസിനെ ആക്രമിച്ചെന്നാണ് കേസ്. സംഭവത്തില്‍ വനിതാ ഡോക്ടര്‍ക്ക് വയറ്റില്‍ പരിക്കേറ്റു. സൂപ്പര്‍ സ്‌പെഷ്യാലിറ്റി ബ്ലോക്കിലെ ന്യൂറോ വിഭാഗം ഓപ്പറേഷന്‍ തീയറ്ററിന് മുന്നിലാണ് സംഭവം നടന്നത്.

സെന്തിലിന്റെ ഭാര്യ ശുഭ (46) ക്ക് ബ്രെയിന്‍ ട്യൂമറായിരുന്നു. നവംബര്‍ 6 നാണ് സൂപ്പര്‍ സ്‌പെഷ്യാലിറ്റിയില്‍ പ്രവേശിപ്പിച്ചത്. 21 ന് ശസ്ത്രക്രിയ നടത്തി ഐ സി യു ( ഇന്റന്‍സീവ് കെയര്‍ യൂണിറ്റ് ) തീവ്ര പരിചരണ വിഭാഗത്തില്‍ കഴിയവേ മരണപ്പെട്ടു.
ഇത് പറയാന്‍ പുറത്തേക്ക് വന്ന ഡോക്ടര്‍ മരണവിവരം രോഗിയുടെ ഭര്‍ത്താവിനെ അറിയിച്ചതിന് പിന്നാലെയാണ് ആക്രമിച്ചത്.

പ്രകോപിതനായ ഭര്‍ത്താവ് ഡോക്ടറെ ചവിട്ടി വീഴ്ത്തുകയായിരുന്നു. പരിക്കേറ്റ ഡോക്ടര്‍ മെഡിക്കല്‍ കോളേജില്‍ ചികിത്സയിലായിരുന്നു.

അറസ്റ്റ് ഭയന്നുള്ള മുന്‍കൂര്‍ ജാമ്യ ഹര്‍ജിയില്‍ 2022 നവംബര്‍ 26 ന് സെന്തില്‍കുമാറിന് തിരുവനന്തപുരം അഡീ. ജില്ലാ സെഷന്‍സ് കോടതി ഉപാധികളോടെ മുന്‍കൂര്‍ ജാമ്യം അനുവദിച്ചിരുന്നു.

1860 ലെ ഇന്ത്യന്‍ ശിക്ഷാ നിയമത്തിലെ 332 (പൊതുസേവകന്റെ ഒദ്യോഗിക കൃത്യനിര്‍വ്വഹണം തടസ്സപ്പെടുത്തുതുന്നതിലേക്കായി സ്വേച്ഛയാ ദേഹോപദ്രവം ഏല്‍പ്പിക്കല്‍) , 2012 ലെ ഹെല്‍ത്ത് കെയര്‍ സര്‍വ്വീസ് പെന്‍ഷന്‍ ആന്റ് ഹെല്‍ത്ത് കെയര്‍ സര്‍വ്വീസ് ഇന്‍സ്റ്റിറ്റിയൂഷന്‍സ് ( പ്രിവന്‍ഷന്‍ ഓഫ് വയലന്‍സ് ആന്റ് ഡാമേജസ് റ്റു പ്രോപ്പര്‍ട്ടി ) നിയമത്തിലെ 3 ഉം 4 ഉം വകുപ്പുകള്‍ ചേര്‍ത്താണ് പോലീസ് സര്‍ക്കിള്‍ ഇന്‍സ്‌പെക്ടര്‍ കുറ്റപത്രം സമര്‍പ്പിച്ചത്.

സംഭവത്തില്‍ മെഡിക്കല്‍ കോളേജിലെ ഡോക്ടര്‍മാര്‍ അന്ന് പ്രതിഷേധിച്ചിരുന്നു. മെഡിക്കല്‍ കോളജ് സൂപ്രണ്ട് ഡോക്ടര്‍മാരുടെ പ്രതിനിധികളുടെ യോഗം വിളിച്ചു.ഡോക്ടര്‍മാര്‍ക്കു നേരെ തുടര്‍ച്ചയായി ഉണ്ടാകുന്ന അക്രമ സംഭവങ്ങള്‍ ചര്‍ച്ച ചെയ്യുമെന്നും ശക്തമായ നടപടി വേണമെന്ന് ആവശ്യപ്പെടുകയും ചെയ്യുമെന്ന് അധികൃതര്‍ പറഞ്ഞിരുന്നു.