മഞ്ഞ കാര്‍ഡുകാര്‍ക്ക് മാത്രം ഓണക്കിറ്റ്? മുന്‍കാലങ്ങളില്‍ വാങ്ങിയ സാധനങ്ങള്‍ക്ക് പണം നല്‍കാനായിട്ടില്ല. വിതരണക്കാര്‍ മുഖംതിരിച്ചു നില്‍ക്കുന്നതിനാല്‍ പല സാധനങ്ങളുടെയും ശേഖരം തീര്‍ന്നിരിക്കുകയാണ്.


ഓണക്കിറ്റ് മഞ്ഞക്കാര്‍ഡുകാര്‍ക്ക് മാത്രമായി ചുരുക്കാനും തത്ത്വത്തില്‍ ധാരണയായി. ഒരു കിറ്റിന് 450 രൂപയാണ് ചെലവ് കണക്കാക്കിയിരിക്കുന്നത്. അതിനും പ്രത്യേകവിഹിതം വേണം. ഈയാഴ്ച ചേരുന്ന മന്ത്രിസഭായോഗം ഇക്കാര്യം പരിഗണിക്കുന്നതാണ്.

2000 കോടി രൂപയാണ് സപ്ലൈകോയ്ക്കുള്ള സര്‍ക്കാര്‍ കുടിശ്ശിക. ഉടന്‍ 1500 കോടി അനുവദിക്കണമെന്ന് ഭക്ഷ്യവകുപ്പ് അഭ്യര്‍ഥിച്ചിട്ടും 250 കോടി രൂപ നല്‍കാനേ ധനവകുപ്പ് സമ്മതിച്ചിട്ടുള്ളൂ. ഈയാഴ്ച പ്രശ്നം പരിഹരിക്കുമെന്ന് ഭക്ഷ്യവകുപ്പ് അധികൃതര്‍ പറഞ്ഞു.


സബ്‌സിഡിക്ക് വില്‍ക്കുന്നതില്‍ വെളിച്ചെണ്ണ, പഞ്ചസാര, മല്ലി, ഉഴുന്ന് തുടങ്ങിയ സാധനങ്ങള്‍ മാത്രമേ സപ്ലൈകോയില്‍ ശേഖരമുള്ളൂ. നേരത്തേ സാധനങ്ങള്‍ വാങ്ങിയതില്‍ 600 കോടി രൂപയാണ് വിതരണക്കാര്‍ക്കുള്ള കുടിശ്ശിക. ശേഖരം തീര്‍ന്ന സാധനങ്ങള്‍ വാങ്ങാന്‍ ഇ-ടെന്‍ഡര്‍ വിളിച്ചപ്പോള്‍ വിതരണക്കാരും മടിച്ചു. ശേഖരം തീര്‍ന്ന സാധനങ്ങള്‍ കര്‍ണാടക, തമിഴ്‌നാട്, മഹാരാഷ്ട്ര എന്നിവിടങ്ങളിലെ സ്വകാര്യ വിതരണക്കാര്‍ ഉടന്‍ ലഭ്യമാക്കുമെന്ന് ഭക്ഷ്യവകുപ്പ്.