മണ്ഡലത്തിലെ അർഹരായ മുഴുവൻ ആളുകളെയും ജനപ്രതിനിധികളും ഉദ്യോഗസ്ഥരും കണ്ടെത്തി പട്ടയം ലഭ്യമാക്കാനുള്ള ഇടപെടലുകൾ നടത്തണമെന്ന് വി ആർ സുനിൽകുമാർ എം എൽ എ. കൊടുങ്ങല്ലൂർ മുനിസിപ്പൽ ടൗൺഹാളിൽ റവന്യു വകുപ്പ് സംഘടിപ്പിച്ച കൊടുങ്ങല്ലൂർ നിയോജക മണ്ഡല പട്ടയ അസംബ്ലിയിൽ അധ്യക്ഷത വഹിച്ച് സംസാരിക്കുകയായിരുന്നു എംഎൽഎ.

ഏതെല്ലാം മേഖലയിൽ ഏതെങ്കിലും രീതിയിലുള്ള പട്ടയങ്ങൾ അർഹതപ്പെട്ടവർക്ക് നൽകാനുണ്ടെങ്കിൽ അത് നൽകണമെന്നും അപേക്ഷ വെച്ചിട്ടില്ലാത്ത അർഹരെയും കണ്ടെത്തി പട്ടയം ലഭ്യമാക്കണം. ഏറ്റവും സുതാര്യമായ രീതിയിൽ എല്ലാവരുടെയും കൂട്ടായ്മയോടെ ഈ പ്രവർത്തനം മണ്ഡലത്തിൽ കാര്യക്ഷമമായി നിർവഹിക്കണം.

പട്ടയ അസംബ്ലിയോടനുബന്ധിച്ച് പഞ്ചായത്ത് തലത്തിൽ ബന്ധപ്പെട്ട ജനപ്രതിനിധികൾ, ഉദ്യോഗസ്ഥർ എന്നിവർ യോഗം ചേർന്ന് അർഹതപെട്ടവർക്ക് പട്ടയം ലഭ്യമാക്കാൻ ഇടപെടലുകൾ നടത്തുമെന്നും എം എൽ എ പറഞ്ഞു. പട്ടയം നൽകുന്നതിൽ വരുന്ന പ്രശ്നങ്ങൾ കണ്ടെത്തി അർഹരായവർക്ക് പട്ടയം അതിവേഗം വിതരണം ചെയ്യുന്നതിനാണ് റവന്യൂ വകുപ്പ് പട്ടയ മിഷന്റെ ഭാഗമായി മണ്ഡലാടിസ്ഥാനത്തിൽ പട്ടയ അസംബ്ലികൾ സംഘടിപ്പിക്കുന്നത്.

ചടങ്ങിൽ പട്ടയ മിഷൻ രൂപീകരണവും പ്രവർത്തന രീതിയും സംബന്ധിച്ച് എൽ ആർ ഡെപ്യൂട്ടി കലക്ടർ പി എ വിഭൂഷണൻ വിശദീകരിച്ചു.

ചടങ്ങിൽ ജില്ലാ പഞ്ചായത്ത് പ്രസിഡന്റ് പി കെ ഡേവീസ് മാസ്റ്റർ, ബ്ലോക്ക് പഞ്ചായത്ത് പ്രസിഡന്റുമാർ, ഗ്രാമ പഞ്ചായത്ത് പ്രസിഡന്റുമാർ, തഹസിൽദാർമാർ, കൊടുങ്ങല്ലൂർ നഗരസഭ കൗൺസിലർമാർ, വില്ലേജ് ഓഫീസർമാർ, മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.