വിദ്യാർഥികളുടെയും യുവജനങ്ങളുടെയും നൂതന ആശയങ്ങൾ രാജ്യത്തിന്റെ വികസനത്തിത്തിൽ നിർണായക പങ്കാണ് വഹിക്കുകയെന്നും ഇവയെ പരമാവധി പ്രോത്സാഹിപ്പിക്കുകയാണ് സർക്കാർ നിലപാടെന്ന് ധനമന്ത്രി കെ എൻ ബാലഗോപാൽ. കേരള ഡെവലപ്മെന്റ് ആൻഡ് ഇന്നോവേഷൻ സ്ട്രാറ്റജിക് കൗൺസിൽ (കെ - ഡിസ്‌ക്) ഡിസ്ട്രിക്ട് ഇന്നോവേഷൻ കൗൺസിലിന്റെ ആഭിമുഖ്യത്തിൽ കൊട്ടാരക്കര പുലമൺ മാർത്തോമ ജൂബിലി മന്ദിരത്തിൽ നടന്ന യങ് ഇന്നോവേറ്റേഴ്സ് പ്രോഗ്രാം സംസ്ഥാനതല മീറ്റ് ഉദ്ഘാടനം നിർവഹിക്കുകയായിരുന്നു മന്ത്രി.

ആശയങ്ങളെ സാങ്കേതിക വിദ്യകളായും സംരംഭങ്ങളായും വളർത്താൻ ഏറ്റവും അനുയോജ്യമായ സാഹചര്യമാണ് നിലവിൽ കേരളത്തിലുള്ളത്. വൈ ഐ പി മാതൃകയിലുള്ള പദ്ധതികളിലൂടെ രൂപപ്പെടുന്ന മികച്ച ആശയങ്ങൾ നാടിന്റെ മുന്നോട്ടുള്ള കുതിപ്പിൽ ചാലകശക്തികളായി മാറുമെന്നും മന്ത്രി കൂട്ടിച്ചേർത്തു.

ശാസ്ത്ര സാങ്കേതിക മേഖലയിലെ യുവജനങ്ങളുടെ മുന്നേറ്റം വികസനത്തിന് മുതൽക്കൂട്ടാവുമെന്ന് അധ്യക്ഷയായ മൃഗസംരക്ഷണ- ക്ഷീരവികസന മന്ത്രി ജെ ചിഞ്ചുറാണി പറഞ്ഞു. ഭക്ഷ്യ ഉത്പ്പാദന വിതരണ മേഖലകളിൽ പോലും ഇത്തരം പുത്തൻ ആശയങ്ങളുടെ വിജയകരമായ സ്വാധീനം പ്രകടമാണ്.

മിൽമ ഉൾപ്പടെയുള്ള സ്ഥാപനങ്ങളിൽ യുവജനങ്ങളുടെ നൂതന ആശയങ്ങൾ സാങ്കേതിക മികവിനായി പ്രയോജനപ്പെടുത്തുമെന്നും മന്ത്രി ജെ ചിഞ്ചുറാണി വ്യക്തമാക്കി.

ജില്ലാ പഞ്ചായത്ത് പ്രസിഡന്റ് പി കെ ഗോപൻ കോളജ് വൈ ഐ പി ക്ലബും കൊട്ടാരക്കര നഗരസഭാ അധ്യക്ഷൻ എസ് ആർ രമേശ് സ്‌കൂൾ വൈ ഐ പി ക്ലബും ഉദ്ഘാടനം ചെയ്തു. വൈ ഐ പി അവാർഡ് ദാനം, പരിശീലനം, ലോഗോ പ്രകാശനം, എക്സിബിഷൻ എന്നിവയും അനുബന്ധമായി സംഘടിപ്പിച്ചു.

സാങ്കേതിക വിദ്യയിൽ പുതിയ ദിശകൾ സൃഷ്ടിക്കുക, സാങ്കേതികവിദ്യയുടെ സാമൂഹിക രൂപീകരണത്തിന് വഴിയൊരുക്കുക, പുത്തൻ ആശയങ്ങളെ ഉത്പന്നങ്ങളും പ്രക്രിയകളും സംരംഭങ്ങളുമായി മാറ്റാൻ അനുകൂലവും ആരോഗ്യപരവുമായ ആവാസ വ്യവസ്ഥ സൃഷ്ടിക്കുക എന്നിവയാണ് പദ്ധതിയുടെ ലക്ഷ്യം. 14 ജില്ലകളിൽ നിന്നായി 600 ലധികം വിദ്യാർഥികൾ പങ്കാളികളായി.

ജില്ലാ കലക്ടർ അഫ്‌സാന പർവീൺ, വൈ ഐ പി മേധാവി ഡോ. മനോജ്, കെ ഡിസ്‌ക് മെമ്പർ സെക്രട്ടറി ഡോ. പി വി ഉണ്ണികൃഷ്ണൻ, വൈ ഐ പി പ്രോഗ്രാം മാനേജർ ബിജു പരമേശ്വരൻ, ജനപ്രതിനിധികൾ, ഐ സി ടി പ്രധിനിധികൾ, വിദ്യാഭ്യാസ സ്ഥാപന മേധാവികൾ, ഉദ്യോഗസ്ഥർ തുടങ്ങിയവർ പങ്കെടുത്തു.