ഇന്ത്യ സഖ്യത്തിനെതിരെ ആഞ്ഞടിച്ച് ഇന്ത്യൻ പ്രധാനമന്ത്രി നരേന്ദ്രമോദി. ഇന്ത്യ എന്ന് പേരിട്ടത് കൊണ്ട് മാത്രം കാര്യമില്ല എന്ന് പ്രധാനമന്ത്രി പറഞ്ഞു. ഈസ്റ്റ് ഇന്ത്യ കമ്പനിയിലും ഇന്ത്യൻ മുജാഹിദീനിലും ഇന്ത്യ ഉണ്ട്. ദിശ ബോധമില്ലാത്ത പ്രതിപക്ഷം ആണെന്നും പ്രധാനമന്ത്രി വിമർശിച്ചു. പാർലമെന്ററി പാർട്ടി യോഗത്തിലാണ് പ്രധാനമന്ത്രി ഇത്തരത്തിൽ വിമർശനമുന്നയിച്ചത്. അതിനിടയിൽ അവിശ്വാസപ്രമേയം കൊണ്ടുവരാൻ പ്രതിപക്ഷം നീക്കം നടത്തുന്നുണ്ട് . ഇക്കാര്യം ഇന്ത്യ സഖ്യം ചർച്ച ചെയ്തു

2024 പൊതുതെരഞ്ഞെടുപ്പ് ലക്ഷ്യമിട്ട് രൂപീകരിച്ചതാണ് വിശാല പ്രതിപക്ഷ സഖ്യം. സഖ്യത്തിനു നൽകിയ INDIA എന്ന പേരിൽ പരാതി ഉയർന്നിരുന്നു. സഖ്യത്തിന്റെ ഭാഗമായ 26 കക്ഷിനേതാക്കൾക്കെതിരെ ഡൽഹി പൊലീസിൽ പരാതി രജിസ്റ്റർ ചെയ്തിരുന്നു . രാജ്യത്തിന്റെ പേര് രാഷ്ട്രീയ സഖ്യത്തിനിടുന്നത് അനുചിതമാണെന്നും തെരഞ്ഞെടുപ്പിലടക്കം തെറ്റായ സ്വാധീനമുണ്ടാക്കുന്നതാണിതെന്നും പരാതിയിൽ ചൂണ്ടിക്കാട്ടിയിരുന്നു

ഡോ. അവിനിഷ് മിശ്ര എന്നയാളാണ് സഖ്യത്തിനെതിരെ ഡൽഹി പൊലീസിൽ പരാതി നൽകിയത്. ഭരണഘടനയുടെ ആമുഖവും പേരും(അനുചിതമായി ഉപയോഗിക്കുന്നത് തടയുന്ന) നിയമത്തിലെ വിവിധ വകുപ്പുകൾ ചൂണ്ടിക്കാട്ടിയായിരുന്നു പരാതി. ഏതു വ്യക്തിയും ഇന്ത്യ എന്ന പേര് ഉപയോഗിക്കുന്നത് നിയമം വിലക്കിയിട്ടുണ്ടെന്ന് പരാതിക്കാരൻ ചൂണ്ടിക്കാട്ടിയിരുന്നു.