വേളാങ്കണ്ണി തീര്‍ഥാടനം കഴിഞ്ഞു കുടുംബസമേതം മടങ്ങിയവര്‍ സഞ്ചരിച്ച ബസ് നാഗര്‍കോവിലിനു സമീപം ഡിവൈഡറില്‍ ഇടിച്ചു മറിഞ്ഞ് അഞ്ചു മലയാളികള്‍ ഉള്‍പ്പെടെ ഒന്‍പതു പേര്‍ മരിച്ചു. രണ്ടുപേര്‍ ഗുജറാത്തില്‍ നിന്നുള്ളവരും മൂന്നുപേര്‍ കന്യാകുമാരി ജില്ലക്കാരുമാണ്. തിരുവനന്തപുരം, കൊല്ലം ജില്ലകളില്‍ നിന്നുള്ള മൂന്നു കുടുംബങ്ങളിലായാണ് അഞ്ചുപേര്‍ മരിച്ചത്. 

ഇന്നലെ പുലര്‍ച്ചെ അഞ്ചരയ്ക്കു നാഗര്‍കോവിലില്‍ നിന്നു 41 കിലോമീറ്റര്‍ അകലെ തിരുനെല്‍വേലി പാതയില്‍ തെക്കുവള്ളിയൂരിനടുത്തു പ്ലാക്കോട്ടൈപാറയിലാണ് അപകടം. പരുക്കേറ്റു നാഗര്‍കോവിലിലെയും തിരുവനന്തപുരത്തെയും ആശുപത്രികളില്‍ കഴിയുന്ന 26 പേരില്‍ നാലുപേരുടെ നില ഗുരുതരമാണ്. 
ആറു ദിവസം മുന്‍പു മാത്രം വിവാഹിതരായ തിരുവനന്തപുരം വലിയതുറ കൊച്ചുതോപ്പ് ഫാത്തിമമാതാ പള്ളിക്കു സമീപം ആന്‍സി ഹൗസില്‍ വിനോദും (30), നവവധു ആന്‍സി (26)യും, കൊച്ചുതുറ ഇടത്തുറ പുരയിടത്തില്‍ ലിയോസില്‍വോറി ദമ്പതികളുടെ മകന്‍ സുജി (അഞ്ച്), കൊല്ലം മൂതാക്കര സെന്റ് പീറ്റേഴ്‌സ് പാരിഷ് ഹാളിനു സമീപം സ്‌ലം കോളനി ബിന്ദു സദനത്തില്‍ ബിജു മുത്തുനായകത്തിന്റെ ഭാര്യ മേരി ലിഷ (32), ഇളയ മകന്‍ ആല്‍റോയി (ഒന്നര) എന്നിവരാണു മരിച്ച മലയാളികള്‍. ബിജു (41)വിനും മൂത്ത മകന്‍ ആരോണിനും (മൂന്നര) ഗുരുതര പരുക്കേറ്റു. 
കന്യാകുമാരി തൂത്തൂര്‍ സ്വദേശി ജിമ്മി (33), തിക്കണംകോട് സ്വദേശി എഡ്വിന്‍ മൈക്കിള്‍ (32), ഗുജറാത്തില്‍ ഭുജ് സ്വദേശികളായ ആഞ്ജലിയോ (26), അഞ്ജലി (19) എന്നിവരാണു മരിച്ച മറ്റുള്ളവര്‍.
കഴിഞ്ഞ ശനിയാഴ്ച വിനോദ്ആന്‍സി ദമ്പതിമാരുടെ വിവാഹം നടന്ന അതേ ദേവാലയത്തില്‍ ബന്ധുക്കളും നാട്ടുകാരും ഇന്നലെ അന്ത്യകര്‍മങ്ങള്‍ക്കും സാക്ഷിയായി. കന്യാകുമാരിയില്‍ പിതാവിന്റെ 41–ാം അനുസ്മരണ പ്രാര്‍ഥനയിലും ദിവ്യബലിയിലും പങ്കെടുക്കാനും വേളാങ്കണ്ണിയില്‍ കുഞ്ഞിന്റെ തല മുണ്ഡനം ചെയ്യാനുമാണു ബിജുവും മേരി ലിഷയും മക്കളുമൊത്ത് യാത്രതിരിച്ചത്. കന്യാകുമാരി സെന്റ് റാംസണ്‍ പള്ളിക്കു സമീപം ലൂര്‍ദ്മാതാ സ്ട്രീറ്റില്‍ പരേതനായ പി. ജേസുവിന്റെയും സുബൈദയുടെയും മകളാണു മേരി ലിഷ. ഇവരുടെയും മകന്‍ ആല്‍റോയിയുടെയും സംസ്‌കാരം മൂതാക്കര പള്ളിയില്‍ നാളെ 11നു നടക്കും. 

മരിച്ച സുജിയുടെ മാതാവ് സെല്‍വോറിക്കു തലയിലേറ്റ പരുക്ക് ഗുരുതരമായതിനാല്‍ പിന്നീടു തിരുവനന്തപുരം മെഡിക്കല്‍ കോളജ് ആശുപത്രിയിലേക്കു മാറ്റി. സുജിയുടെ സഹോദരന്‍ സുദിന്‍ (ആറ്), സഹോദരി സുചിത്ര (ഒന്ന്), പിതാവ് ലിയോ എന്നിവര്‍ ചെറിയ പരുക്കുകളോടെ രക്ഷപ്പെട്ടു. വലിയതുറയില്‍ നിന്നുള്ള ആറംഗ കുടുംബത്തിനും വിഴിഞ്ഞത്തു നിന്നുള്ള മൂന്നംഗ കുടുംബത്തിനും പൂവാറില്‍ നിന്നുള്ള അഞ്ചംഗ കുടുംബത്തിനും പരുക്കേറ്റു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha