പ്രശസ്ത നടിയും മോഡലുമായ ​ഹർഷിൽ കാലിയ (30) വാഹനാപകടത്തിൽ മരിച്ചു. രാജസ്ഥാനിലെ ജയ്പുരിലുണ്ടായ വാഹനാപകടത്തിലാണ് ദാരുണാന്ത്യമുണ്ടായത്. നടി സഞ്ചരിച്ച കാർ നിയന്ത്രണം വിട്ട് റോഡിലെ ഡിവൈഡറിലിടിച്ച് മറിയുകയായിരുന്നുവെന്നാണ് റിപ്പോർട്ടുകളുള്ളത്.

ഇന്നലെ രാത്രി 11.30ഓടെയാണ് അപകടം സംഭവിച്ചത്.

ജോലി കഴിഞ്ഞു വീട്ടിലേക്ക് മടങ്ങുകയായിരുന്ന ഹർഷിലിന്റെ വാഹനം ഡിവൈഡറിൽ ഇടിച്ച് മറിയുകയായിരുന്നു. അപകടം സംഭവിച്ച ഉടൻ തന്നെ പ്രദേശ വാസികൾ ഓടിയെത്തി വാഹനം ഉയർത്തുകയും ഹർഷിലിനെ പുറത്തെടുത്ത് സ്വകാര്യ ആശുപത്രിയിൽ എത്തിക്കുകയും ചെയ്തു. തലയ്ക്ക് ഗുരുതരമായി പരിക്കേറ്റ ഹർഷിലിനെ ആശുപത്രിയിൽ എത്തിച്ചെങ്കിലും അപ്പോഴേക്കും ജീവൻ നഷ്ടപ്പെട്ടിരുന്നു.അപകടത്തിന്റെ കൃത്യമായ കാരണം കണ്ടെത്താനുള്ള ശ്രമത്തിലാണ് പൊലീസ്.

വാഹനം അമിത വേഗതയിലായിരുന്നോ അതോ മറ്റൊരു വാഹനം മറികടക്കാൻ ശ്രമിച്ചതാണോ അപകടത്തിന് കാരണമായതെന്ന് എന്നതിൽ അന്വേഷണം തുടരുകയാണ്. ഹർഷിലിന്റെ പോസ്റ്റുമോർട്ടം നടപടികൾ പൂർത്തിയാക്കി മൃതദേഹം ബന്ധുക്കൾക്ക് വിട്ടുനൽകുകയും ചെയ്തു.
അതേസമയം അഭിനയരംഗത്ത് മാത്രമല്ല മോഡലിങ് രം​ഗത്തും സജീവമായിരുന്നു ഹർഷിൽ കാലിയ. ക്രൈം നെക്സ്റ്റ് ഡോർ വെബ് സീരീസിലും നിരവധി രാജസ്ഥാനി ഗാനങ്ങളിലും പ്രധാന വേഷം ചെയ്തിട്ടുണ്ട്.