താരത്തിന്റെ പേര് ഉപയോഗിച്ച് തട്ടിപ്പ്; മോഹന്ലാല് നല്കിയ ഹര്ജിയില് നിര്ണ്ണായക നീക്കം
മോഹന്ലാല് സമര്പ്പിച്ച ഹര്ജി കൂടാതെ സാമൂഹികമാധ്യമങ്ങളിലൂടെ താരത്തിന്റെ പേര് ഉപയോഗിച്ച് തട്ടിപ്പ് നടത്തിയവരെയും അപഹസിച്ചവരെയും കേസില് കക്ഷി ചേര്ക്കാനും ഇവര്ക്കെതിരെ നടപടിക്ക് ഉത്തരവിടാനും തയാറായി ഡല്ഹി ഹൈകോടതി. കോടതി പറഞ്ഞതിന്റെ അടിസ്ഥാനത്തില് മെറ്റയിലെ 10 ഉള്പ്പടെ അമ്പതോളം ലിങ്കുകള് മോഹന്ലാല് കോടതിയില് സമര്പ്പിച്ചു. പുതിയ അപേക്ഷ വെള്ളിയാഴ്ച്ച പരിഗണിക്കും. അതോടൊപ്പം മോഹന്ലാല് ഹര്ജിയില് ചൂണ്ടിക്കാട്ടിയ ലിങ്കുകള് മാറ്റാന് നിര്ദേശിക്കുമെന്നും കോടതി വ്യക്തമാക്കി.
അഞ്ചുപ്രധാനപ്പെട്ട വിഷയങ്ങളാണ് മോഹന്ലാല് ഹര്ജിയില് ഉന്നയിച്ചിരിക്കുന്നത്. അനധികൃതമായി സാധനങ്ങള് വില്ക്കുന്നതിന് ചിത്രങ്ങളും വീഡിയോകളും ഉപയോഗിക്കുന്നത്, ആള്മാറാട്ടത്തിലൂടെ തട്ടിപ്പ് നടത്തുന്നത്തിന് ചിത്രങ്ങളും വീഡിയോകളും ഉപയോഗിക്കുന്നത്, അനുമതിയില്ലാതെ ശബ്ദം ഉപയോഗിക്കുന്നത്, വോയിസ് ക്ലോണിങ് ഉള്പ്പടെയുള്ള സാങ്കേതിക വിദ്യ ഉപയോഗിച്ച് തട്ടിപ്പുനടത്തുന്നത്.
ഇതല്ലാതെ ഹര്ജിയില് ഉന്നയിച്ചിരിക്കുന്നത് അനുമതിയില്ലാതെ ഉത്പന്നങ്ങളും സേവനങ്ങളും വാണിജ്യപരമായി വില്ക്കുന്നതിന് തന്റെ ചിത്രങ്ങള് ഉപയോഗിക്കുന്നു. തന്റെ ബഹുമാനത്തിനും പ്രശസ്തിക്കും ഹാനികരമായ രീതിയില് ചിത്രങ്ങളും വീഡിയോകളും ഉപയോഗിക്കുന്നു, ബോഡി ഷെയ്മിങ് ഉള്പ്പടെ നടക്കുന്നു, നര്മ്മം, ആക്ഷേപഹാസ്യം അല്ലെങ്കില് ഡിജിറ്റല് ഉള്ളടക്കം എന്നിവയുടെ മറവില് തെറ്റായതോ തെറ്റിദ്ധരിപ്പിക്കുന്നതോ അടിസ്ഥാനരഹിതമോ ആയ കിംവദന്തികള് പ്രചരിപ്പിക്കുന്നു എന്നിവയാണ്. ഹര്ജിയില് മെറ്റ, ആമസോണ്, ഗൂഗിള് എന്നിവരെയാണ് പ്രധാനപ്പെട്ട കക്ഷികള് ആയി പരാമര്ശിച്ചിരുന്നത്.
എന്നാല്, കുറ്റക്കാര്ക്കെതിരെ നടപടി എടുക്കണമെങ്കില് വീഡിയോകള് അപ്ലോഡ് ചെയ്തവരെ കൂടി ഉള്പ്പെടുത്തണമെന്ന് കോടതി നിര്ദേശിച്ചു. മെറ്റയിലെ 10 ഉള്പ്പടെ അമ്പതോളം ലിങ്കുകളാണ് മോഹന്ലാല് കോടതിയില് സമര്പ്പിച്ചത്. അപ്ലോഡ് ചെയ്തവരില് പലരും കേരളത്തിലായതിനാല് മോഹന്ലാലിന്റെ ഹര്ജി ഡല്ഹി ഹൈക്കോടതി പരിഗണിക്കരുതെന്ന് മെറ്റയുടെ അഭിഭാഷകന് ആവശ്യപ്പെട്ടിരുന്നു.
https://www.facebook.com/Malayalivartha
