ആവേശ കൊടുങ്കാറ്റ്... ഐപിഎല് ചരിത്രത്തിലെ കൂറ്റന് സ്കോറിനു മുന്നില് പൊരുതിത്തോറ്റ് റോയല് ചലഞ്ചേഴ്സ് ബെംഗളൂരു; 41 പന്തില് 102 റണ്സെടുത്ത ട്രാവിസ് ഹെഡ് ഹൈദരാബാദിന്റെ കോട്ട കാത്തു; തിരിച്ചടിച്ച് കാര്ത്തിക് (83); പക്ഷെ ദയനീയമായി ബെംഗളൂരു
ടാവിസ് ഹെഡിന്റെ കൂറ്റനടിക്ക് സാക്ഷ്യമായി ഐപിഎല് വേദി. ഐപിഎല് ചരിത്രത്തിലെ കൂറ്റന് സ്കോറിനു മുന്നില് പൊരുതിത്തോറ്റ് റോയല് ചലഞ്ചേഴ്സ് ബെംഗളൂരു (ആര്സിബി). സണ്റൈസേഴ്സ് ഹൈദരാബാദ് (എസ്ആര്എച്ച്) ഉയര്ത്തിയ 288 റണ്സെന്ന വിജയലക്ഷ്യത്തിന് 25 റണ്സ് ബാക്കിനില്ക്കെയാണു ആര്സിബിയുടെ തോല്വി.
ഐപിഎലിലെ ഏറ്റവും വലിയ സ്കോര് (20 ഓവറില് 3 വിക്കറ്റ് നഷ്ടത്തില് 287 റണ്സ്) എന്നതിനൊപ്പം വമ്പന് വിജയവുമാണു സണ്റൈസേഴ്സ് സ്വന്തമാക്കിയത്. 41 പന്തില് 102 റണ്സെടുത്ത ട്രാവിസ് ഹെഡാണു ഹൈദരാബാദിന്റെ കളിയുടെ ഗതിതിരിച്ചത്. 31 പന്തില്നിന്ന് 67 റണ്സെടുത്ത ഹെന്റിച്ച് ക്ലാസനും ഹെഡിനു മികച്ച പിന്തുണ നല്കി. അബ്ദുല് സമദ് (37), അഭിഷേക് ശര്മ (34), എയ്ഡന് മാര്ക്രം (32) എന്നിവരും നല്ല പ്രകടനം പുറത്തെടുത്തു. 15 എക്സ്ട്രാസാണു റോയല് ചലഞ്ചേഴ്സ് ബോളര്മാര് എറിഞ്ഞത്. അരങ്ങേറ്റ മത്സരത്തില് 4 ഓവറില് 52 റണ്സ് വിട്ടുകൊടുത്ത ലോക്കി ഫെര്ഗൂസന് ബെംഗളൂരുവിനായി 2 വിക്കറ്റ് സ്വന്തമാക്കി.
4 ഓവറില് 68 റണ്സ് വിട്ടുകൊടുത്ത റീസ് ടേപ്പ്ലെ ഒരു വിക്കറ്റ് നേടി. മറുപടി ബാറ്റിങ്ങിനിറങ്ങിയ ബെംഗളൂരു ആത്മവിശ്വാസത്തോടെയാണു പന്തുകളെ നേരിട്ടത്. 20 പന്തില് 42 റണ്സെടുത്ത് വിരാട് കോലി ആക്രമണത്തിനു മൂര്ച്ച കൂട്ടി. ക്യാപ്റ്റന് ഫാഫ് ഡുപ്ലെസി 28 പന്തില്നിന്ന് 62 റണ്സ് അടിച്ചെടുത്തു. വിക്കറ്റുകള് വീണതോടെ കൈവിട്ടു പോയെന്നു കരുതിയ മത്സരത്തെ വിക്കറ്റ് കീപ്പര് ദിനേഷ് കാര്ത്തിക്കാണു തിരിച്ചുപിടിച്ചത്.
35 പന്തില്നിന്ന് 83 റണ്സെടുത്ത ദിനേഷ് കാര്ത്തിക്കും ഔട്ടായതോടെ ബെംഗളൂരുവിന്റെ പ്രതീക്ഷകള് മങ്ങി. അനുജ് റാവത്ത് (25), മഹിപാല് ലോംറോര് (19) എന്നിവരും രണ്ടക്കം കടന്നു. ഹൈദരാബാദിനു വേണ്ടി 4 ഓവറില് 43 റണ്സ് വിട്ടുനല്കി ക്യാപ്റ്റന് പാറ്റ് കമ്മിന്സ് 3 വിക്കറ്റ് നേടി. മായങ്ക് രണ്ടും നടരാജന് ഒരു വിക്കറ്റും സ്വന്തമാക്കി. ഹൈദരാബാദിനോടും റോയല് ചലഞ്ചേഴ്സ് പരാജയപ്പെട്ടതോടെ ആരാധകര് നിരാശയിലാണ്. ഹോം ഗ്രൗണ്ടായ ബെംഗളൂരു ചിന്നസ്വാമി സ്റ്റേഡിയത്തില്, ടോസ് നേടിയ ആര്സിബി ക്യാപ്റ്റന് ഹൈദരാബാദിനെ ബാറ്റിങ്ങിന് അയയ്ക്കുകയായിരുന്നു. മുഹമ്മദ് സിറാജ്, ഗ്ലെന് മാക്സ്വെല് എന്നിവരെ ഒഴിവാക്കിയാണ് ആര്സിബി ഇറങ്ങിയത്. ഹൈദരാബാദ് ടീമില് മാറ്റങ്ങളില്ലായിരുന്നു.
പ്ലേയിങ് ഇലവന്: സണ്റൈസേഴ്സ് ഹൈദരാബാദ്- ട്രാവിസ് ഹെഡ്, അഭിഷേക് ശര്മ, എയ്ഡന് മാര്ക്രം, ഹെന്ട്രിച്ച് ക്ലാസന് (വിക്കറ്റ് കീപ്പര്), അബ്ദുല് സമദ്, നിതീഷ് റെഡ്ഡി, ഷഹബാസ് അഹമ്മദ്, പാറ്റ് കമ്മിന്സ് (ക്യാപ്റ്റന്), ഭുവനേശ്വര് കുമാര്, ജയദേവ് ഉനദ്കട്ട്, ടി.നടരാജന്.
റോയല് ചലഞ്ചേഴ്സ് ബെംഗളൂരു- വിരാട് കോലി, ഫാഫ് ഡുപ്ലെസി (ക്യാപ്റ്റന്), വില് ജാക്സ്, രജത് പാട്ടിധാര്, ദിനേഷ് കാര്ത്തിക് (വിക്കറ്റ് കീപ്പര്), എസ്. ചൗഹാന്, മഹിപാല് ലൊംറോര്, റീസ് ടേപ്പ്ലെ, വിജയ്കുമാര് വൈശാഖ്, ഫെര്ഗൂസന്, ദയാല്.
അതേസമയം ചെന്നൈ സൂപ്പര് കിങ്സിനെതിരെ മുംബൈ ഇന്ത്യന്സ് ക്യാപ്റ്റന് ഹാര്ദിക് പാണ്ഡ്യയുടെ ബോളിങ് പ്രകടനത്തില് കടുത്ത അതൃപ്തി അറിയിച്ച് മുന് ഇന്ത്യന് താരം ഇര്ഫാന് പഠാന്. ആകാശ് മഡ്വാളിനോടുള്ള വിശ്വാസം ഇല്ലായ്മയും ഡെത്ത് ഓവര് ബോളറെന്ന നിലയില് പാണ്ഡ്യയുടെ കഴിവില്ലായ്മയുമാണ് അവസാന ഓവറില് കണ്ടതെന്ന് ഇര്ഫാന് പഠാന് പ്രതികരിച്ചു. മത്സരത്തില് മുംബൈ ഇന്ത്യന്സ് 20 റണ്സിന്റെ തോല്വി വഴങ്ങിയതോടെയാണ് ഇര്ഫാന് എക്സ് പ്ലാറ്റ്ഫോമില് തന്റെ നിലപാടു വ്യക്തമാക്കിയത്.
ആദ്യം ബാറ്റു ചെയ്ത ചെന്നൈയ്ക്കെതിരെ പാണ്ഡ്യ മൂന്ന് ഓവറുകള് പന്തെറിഞ്ഞ് രണ്ടു വിക്കറ്റുകള് വീഴ്ത്തിയിരുന്നു. പക്ഷേ താരം 43 റണ്സാണ് 18 പന്തുകളില് വഴങ്ങിയത്. മുംബൈ നിരയില് കൂടുതല് റണ്സ് വഴങ്ങിയ ബോളറും പാണ്ഡ്യയാണ്. ഹാര്ദിക് പാണ്ഡ്യയെറിഞ്ഞ 20ാം ഓവര് കളിയില് നിര്ണായകമായി. പാണ്ഡ്യയെറിഞ്ഞ ആറു പന്തുകളില്നിന്ന് ചെന്നൈ ബാറ്റര്മാര് അടിച്ചെടുത്തത് 26 റണ്സായിരുന്നു.
പാണ്ഡ്യയുടെ അവസാന ഓവറില് ധോണി മൂന്നു സിക്സറുകള് പറത്തി. മറുപടി ബാറ്റിങ്ങില് ആറു പന്തില് പാണ്ഡ്യ നേടിയത് വെറും രണ്ട് റണ്സ്. തുഷാര് ദേശ്പാണ്ഡെയുടെ പന്തില് രവീന്ദ്ര ജഡേജ ക്യാച്ചെടുത്താണ് പാണ്ഡ്യയെ പുറത്താക്കിയത്. വെസ്റ്റിന്ഡീസ് ഓള് റൗണ്ടറായ റൊമാരിയോ ഷെഫേര്ഡ് രണ്ട് ഓവറുകള് മാത്രമാണ് മുംബൈയ്ക്കു വേണ്ടി പന്തെറിഞ്ഞത്. ഹാര്ദിക് പാണ്ഡ്യയുടെ ബോളിങ്ങിനെതിരെ മുന് ഇന്ത്യന് താരം സുനില് ഗാവസ്കറും രംഗത്തെത്തി. ''അടുത്ത കാലത്ത് കണ്ട ഏറ്റവും മോശം ഡെത്ത് ഓവര് ബോളിങ്ങാണിത്. ശരാശരി ബോളിങ്ങും ക്യാപ്റ്റന്സിയും മാത്രം. ചെന്നൈ സൂപ്പര് കിങ്സ് സ്കോര് 185ല് നിര്ത്തണമായിരുന്നു.'' എന്നായിരുന്നു ഗാവസ്കറുടെ പ്രതികരണം.
"
https://www.facebook.com/Malayalivartha