വല്ലാത്തൊരു തിരിച്ചടി... സിക്സറുകളും ഫോറുകളുമായി കളം നിറഞ്ഞ ക്യാപ്റ്റന് സഞ്ജു മനോഹരമായ ഇന്നിങ്സ് കാഴ്ചവച്ചെങ്കിലും അവസാനം കാലിടറി; സഞ്ജുവിനെ ടിവി അമ്പയര് ചതിച്ചു, സിക്സ് അടിച്ച പന്തില് ഔട്ട്; സഞ്ജു വീണതോടെ രാജസ്ഥാന് ചീട്ട് കൊട്ടാരമായി
ഇന്നലത്തെ കളി രാജസ്ഥാനെ സംബന്ധിച്ചും മലയാളികളെ സംബന്ധിച്ചും നിരാശയായിരുന്നു. സിക്സറുകളും ഫോറുകളുമായി കളം നിറഞ്ഞ ക്യാപ്റ്റന് സഞ്ജു മനോഹരമായ ഇന്നിങ്സ് കാഴ്ചവച്ചെങ്കിലും രാജസ്ഥാനെ വിജയത്തിലേക്ക് എത്തിക്കാനായില്ല. അപ്രതീക്ഷിതമായി സഞ്ജു പുറത്തായതിന്റെ ആഘാതത്തില്നിന്ന് രാജസ്ഥാന് കരകയറാനാകാതെ വന്നപ്പോള് ഡല്ഹിക്ക് 20 റണ്സിന്റെ മിന്നും ജയം. ഇതോടെ 11 മത്സരങ്ങളില്നിന്ന് 16 പോയന്റുമായി രാജസ്ഥാന് പട്ടികയില് രണ്ടാമതായി തുടരും. 12 മത്സരങ്ങളില്നിന്ന് 12 പോയന്റുമായി അഞ്ചാം സ്ഥാനത്താണ് ഡല്ഹി.
അതേസമയം ഐപിഎല്ലില് വീണ്ടും അമ്പയറിംഗ് വിവാദമുണ്ടായി. ഡല്ഹി ക്യാപിറ്റല്സിനെതിരായ മത്സരത്തില് രാജസ്ഥാന് റോയല്സിനെ ഒറ്റക്ക് വിജയത്തിലേക്ക് നയിക്കുയായിരുന്ന ക്യാപ്റ്റന് സഞ്ജു സാംസണ് സിക്സ് അടിച്ച പന്തില് ഔട്ട് വിധിച്ചതാണ് വിവാദമായത്. പതിനാറാം ഓവറില് മുകേഷ് കുമാര് എറിഞ്ഞ പന്തില് സഞ്ജു ലോംഗ് ഓണിലേക്ക് സിക്സ് അടിച്ച പന്ത് ബൗണ്ടറിക്ക് അരികില് ഡല്ഹി ഫീല്ഡര് ഷായ് ഹോപ്പ് കൈയിലൊതുക്കി.
എന്നാല് ക്യാച്ചെടുത്തശേഷം നിയന്ത്രണം നഷ്ടമായ ഷായ് ഹോപ്പ് ബൗണ്ടറി ലൈനില് ചവിട്ടിയെങ്കിലും ദൃശ്യങ്ങള് പരിശോധിച്ച ടിവി അമ്പയര് ഔട്ട് വിധിച്ചത് ആരാധകരെ അമ്പരപ്പിച്ചു. ഷായ് ഹോപ്പിന്റെ കാല് ബൗണ്ടറി ലൈനിലെ കുഷ്യനില് തട്ടുന്നത് റീപ്ലേകളില് വ്യക്തമായിട്ടും അമ്പയര് ഔട്ട് വിധിച്ചതോടെ സഞ്ജു പ്രതിഷേധവുമായി ഫീല്ഡ് അമ്പയറും മലയാളിയുമായ കെ എന് അനന്തപത്മനാഭന് അടുത്തെത്തി തര്ക്കിച്ചു.
എന്നാല് അമ്പയറുടെ തീരുമാനം അന്തിമമാണെന്ന നിലപാടാണ് അനന്തപദ്മനാഭന് സ്വീകരിച്ചത്. ഈ സമയം ഡല്ഹി ക്യാപിറ്റല്സ് ഉടമ പാര്ഥ് ജിന്ഡാല് ഗ്യാലറിയിലിരുന്ന് സഞ്ജുവിനോട് കയറിപ്പോകാന് കൈകൊണ്ട് ആംഗ്യം കാണിക്കുന്നതും കാണാമായിരുന്നു.
ഔട്ട് വിളിച്ച തീരുമാനത്തിനെതിരെ സഞ്ജു റിവ്യു എടുക്കാന് ശ്രമിച്ചെങ്കിലും അതിന് കഴിയില്ലെന്ന് ഫീല്ഡ് അമ്പയര് വ്യക്തമാക്കി. ഡല്ഹിക്കെതിരെ 222 റണ്സ് വിജയലക്ഷ്യം പിന്തുടര്ന്ന രാജസ്ഥാനുവേണ്ടി 46 പന്തില് 86 റണ്സടിച്ച സഞ്ജു ഒറ്റക്ക് പൊരുതിയാണ് ടീമിന് വിജയപ്രതീക്ഷ സമ്മാനിച്ചത്.
ഓപ്പണര് യശസ്വി ജയ്സ്വാളും(2 പന്തില് 4) ജോസ് ബട്ലറും(17 പന്തില് 19) റിയാന് പരാഗും (22 പന്തില് 27) വലിയ സ്കോര് നേടാതെ പുറത്തായപ്പോള് സഞ്ജുവിന്റെ പോരാട്ടമാണ് രാജസ്ഥാനെ ജയത്തിന് അടുത്തെത്തിച്ചത്.
ഡല്ഹി ഉയര്ത്തിയ 222 എന്ന വിജയലക്ഷ്യം പിന്തുടര്ന്ന് ഇറങ്ങിയ രാജസ്ഥാന് തുടക്കത്തില് തന്നെ യശസ്വി ജയ്സ്വാളി (2 പന്തില് 4)നെ നഷ്ടമായി. തുടര്ന്ന് ക്രീസിലെത്തിയ സഞ്ജുവിനെ കൂട്ടിപിടിച്ച് ജോസ് ബട്ലര് സ്കോര് ബോര്ഡ് ചലിപ്പിച്ചു. സ്കോര് 67ല് നില്ക്കെ അക്സര് പട്ടേല് ബട്ലറെ( 17 പന്തില് 19) പുറത്താക്കി. ക്രീസിലെത്തിയ റിയാന് പരാഗിനെ കൂട്ടുപിടിച്ച് കളിയുടെ നിയന്ത്രണം സഞ്ജു ഏറ്റെടുത്തു. സിക്സറുകളും ഫോറുകളുമായി സഞ്ജു കളം നിറഞ്ഞപ്പോള് പരാഗും (22 പന്തില് 27) പിന്നാലെ എത്തിയ ശുഭം ദുബെയും മികച്ച പിന്തുണ നല്കി. സ്കോര് 162ല് നില്ക്കെ മുകേഷ് കുമാര് എറിഞ്ഞ പന്ത് ഉയര്ത്തി അടിക്കാന് ശ്രമിച്ചത് ബൗണ്ടറി ലൈനിനു തൊട്ടരികില് ഹോപ്പിന്റെ കൈകളില് അവസാനിച്ചതോടെ രാജസ്ഥാന്റെ പോരാട്ടത്തിനും മങ്ങലേറ്റു.
സഞ്ജു നിര്ത്തിയിടത്തു നിന്ന് റോവ്മന് പവലുമായി ചേര്ന്ന് പോരാട്ടം തുടരാന് ദുബെ ശ്രമിച്ചെങ്കിലും അത് അധികം നീണ്ടില്ല. സ്കോര് 180ല് നില്ക്കെ ഖലീല് അഹ്മദിന്റെ പന്ത് സ്റ്റബ്സ് പിടിച്ച് ദുബെ(12 പന്തില് 25) യുടെ പോരാട്ടം അവസാനിച്ചു. പിന്നാലെ എത്തിയ ഡോനോവന് ഫെറൈറ, രവിചന്ദ്രന് അശ്വിന് എന്നിവര് ഒറ്റയക്കത്തില് പുറത്തായതോടെ രാജസ്ഥാന് പരാജയം മണത്തു. പത്തൊന്പതാം ഓവറിലെ രണ്ടാം പന്തില് റോവന് പവലിനെ മുകേഷ് കുമാര് പുറത്താക്കിയതോടെ രാജസ്ഥാന് പരാജയം ഉറപ്പിച്ചു. ട്രെന്റ് ബോള്ട്ടിനും ആവേശ് ഖാനും അവസാന ഓവറില് അധികമൊന്നും ചെയ്യാനില്ലാതെ വന്നപ്പോള് രാജസ്ഥാന്റെ ഇന്നിങ്സ് രണ്ടു വിക്കറ്റ് ബാക്കി നില്ക്കെ 201ല് അവസാനിച്ചു.
https://www.facebook.com/Malayalivartha