ലോക്‌സഭാ തെരഞ്ഞെടുപ്പില്‍ ബിജെപിയുടെ പ്രകടനം ഏറെ നിര്‍ണായകമാണ്. ഇത്തവണ വലിയ മുന്നേറ്റം നടത്തുമെന്നാണ് പ്രതീക്ഷിക്കുന്നത്. കേരളത്തില്‍ ബിജെപി 5 സീറ്റില്‍ വിജയിക്കുമെന്ന് ആവര്‍ത്തിച്ച് കേരളത്തിന്റെ ചുമതലയുള്ള പ്രഭാരി പ്രകാശ് ജാവഡേക്കര്‍. 20 ശതമാനത്തിനു മുകളില്‍ വോട്ടു ലഭിക്കുമെന്നും അദ്ദേഹം പറഞ്ഞു.

കോണ്‍ഗ്രസിന്റെ 20 സീറ്റ് എന്ന കണക്ക് തെറ്റുമെന്നും അവരുടെ പല പ്രമുഖരും കാലിടറി വീഴുമെന്നും ബിജെപി സംസ്ഥാന പ്രസിഡന്റ് കെ.സുരേന്ദ്രന്‍ പറഞ്ഞു. ശശി തരൂര്‍ തോല്‍ക്കും. തിരുവനന്തപുരത്ത് രാജീവ് ചന്ദ്രശേഖറിന്റെ വിജയം 100% ഉറപ്പാണ്.

നേതൃയോഗത്തിനു ശേഷമായിരുന്നു നേതാക്കളുടെ പ്രതികരണം. തൃശൂരിലും തിരുവനന്തപുരത്തും വിജയിക്കുമെന്നാണ് യോഗം വിലയിരുത്തിയത്. രാജീവ് ചന്ദ്രശേഖര്‍ 12,000 വോട്ടിന് ജയിക്കുമെന്നാണ് ബൂത്ത് തലം മുതലുള്ള കണക്ക് നിരത്തിയുള്ള അവകാശവാദം. 3.60 ലക്ഷം വോട്ട് പിടിക്കും. നേമത്ത് ഇരുപതിനായിരത്തിനു മുകളിലും വട്ടിയൂര്‍ക്കാവില്‍ പതിനയ്യായിരത്തിനു മുകളിലുമാണ് ലീഡ് പ്രതീക്ഷ. കഴക്കൂട്ടം, തിരുവനന്തപുരം മണ്ഡലങ്ങളിലും ലീഡ് ചെയ്യും. രണ്ടാമത് തരൂര്‍ എത്തും.

തൃശൂരില്‍ 4 ലക്ഷം വോട്ടു സുരേഷ്‌ഗോപി പിടിക്കും. തൃശൂര്‍, മണലൂര്‍, ഇരിങ്ങാലക്കുട നിയമസഭാ മണ്ഡലങ്ങളില്‍ ഒന്നാം സ്ഥാനത്തും നാട്ടികയിലും പുതുക്കാടും രണ്ടാം സ്ഥാനത്തുമെത്തും. ആറ്റിങ്ങലില്‍ ഇഞ്ചോടിഞ്ച് മത്സരമായിരുന്നു. വി.മുരളീധരന്‍ 3 ലക്ഷം വോട്ട് നേടും. വര്‍ക്കലയിലും ആറ്റിങ്ങലിലും ചിറയിന്‍കീഴിലും ഒന്നാമതെത്തും. 50,000 വോട്ട് അധികം കിട്ടാനുള്ള പ്രവര്‍ത്തനമാണ് നടത്തിയത്. പത്തനംതിട്ടയില്‍ കഴിഞ്ഞ തവണ കെ. സുരേന്ദ്രന്‍ നേടിയ 2.97 ലക്ഷം വോട്ട് അനില്‍ ആന്റണി മറികടക്കുമെന്നും ആലപ്പുഴയിലും മുന്നേറ്റമുണ്ടാകുമെന്നും വിലയിരുത്തി.

മുരളീധര വിരുദ്ധ ചേരിയിലെ പ്രമുഖരായ പി.കെ.കൃഷ്ണദാസ്, എ.എന്‍. രാധാകൃഷ്ണന്‍, എം.ടി. രമേശ് എന്നിവര്‍ യോഗത്തില്‍ പങ്കെടുത്തില്ല. എന്നാല്‍ ഇതില്‍ അസ്വാഭാവികതയില്ലെന്നും നേരത്തേ ബുദ്ധിമുട്ട് അറിയിച്ച ശേഷമാണ് വരാതിരുന്നതെന്നും ജാവഡേക്കര്‍ പറഞ്ഞു. ശോഭ സുരേന്ദ്രനെതിരെ ആരോപണമുയര്‍ന്നപ്പോള്‍ സംസ്ഥാനനേതൃത്വം വേണ്ട രീതിയില്‍ പ്രതിരോധിച്ചില്ലെന്ന വിമര്‍ശനവും യോഗത്തില്‍ ഉയര്‍ന്നു. ഇ.പി.ജയരാജനുമായി നടന്ന കൂടിക്കാഴ്ചയെക്കുറിച്ച് രാഷ്ട്രീയത്തിന്റെ ഭാഗമാണെന്നു പറഞ്ഞ് കൂടുതല്‍ പ്രതികരിക്കാനും ജാവഡേക്കര്‍ തയാറായില്ല.

ജൂണ്‍ നാലിന് തിരഞ്ഞെടുപ്പ് ഫലം പുറത്തുവരുമ്പോള്‍ കോണ്‍ഗ്രസിന്റെ പല പ്രമുഖരുടെയും കാലിടറുമെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു. കേരളത്തില്‍ ചരിത്രത്തിലാദ്യമായി ഇത്തവണ ബിജെപി അക്കൗണ്ട് തുറക്കുമെന്നും വോട്ട് ശതമാനം ഗണ്യമായി ഉയരുമെന്നും അദ്ദേഹം പറഞ്ഞു.

കേരളത്തില്‍ ഇത്തവണ മികച്ച വിജയ പ്രതീക്ഷയുണ്ടെന്നും ബൂത്ത്തലം മുതല്‍ ലഭിച്ച റിപ്പോര്‍ട്ടുകള്‍ പ്രതീക്ഷ വെച്ച സീറ്റുകളില്‍ വിജയിക്കാമെന്നതാണെന്നും സുരേന്ദ്രന്‍ പറഞ്ഞു. തിരുവനന്തപുരത്ത് ശശി തരൂര്‍ ഇത്തവണ തോറ്റ് തുന്നംപാടുമെന്നും എന്‍ഡിഎ സ്ഥാനാര്‍ഥി രാജീവ് ചന്ദ്രശേഖറാണ് തിരുവനന്തപുരത്ത് ജയിക്കാന്‍ പോകുന്നതെന്നും സുരേന്ദ്രന്‍ അവകാശപ്പെട്ടു.

അതേസമയം, കോര്‍കമ്മിറ്റി യോഗം കൃഷ്ണദാസ് പക്ഷം ബഹിഷ്‌കരിച്ചുവെന്ന വാര്‍ത്തകള്‍ സുരേന്ദ്രന്‍ തള്ളിക്കളഞ്ഞു. അങ്ങനെ ആരും യോഗം ബഹിഷ്‌കരിച്ചിട്ടില്ല. ബഹിഷ്‌കരിച്ചുവെന്ന് ആരോടെങ്കിലും പറഞ്ഞിട്ടുണ്ടൊയെന്നും സുരേന്ദ്രന്‍ മാധ്യമങ്ങളോട് ചോദിച്ചു. വിഷയത്തില്‍ ഇടപെട്ട് സംസാരിച്ച ബിജെപി കേരള പ്രഭാരി പ്രകാശ് ജാവഡേക്കര്‍ ഏത് യോഗത്തിലും കുറെപ്പേര്‍ പലകാരണങ്ങളാല്‍ വരാതിരിക്കാമെന്ന് വിശദീകരിച്ചു. ഇവിടെ വരാതിരുന്നവര്‍ അധ്യക്ഷനില്‍നിന്ന് അനുമതി നേടിയിരുന്നതായും ജാവ്ദേക്കര്‍ പറഞ്ഞു.