കിടക്കയില്‍ മൂത്രമൊഴിച്ചതിന് രണ്ടര വയസുകാരിയുടെ ജനനേന്ദ്രിയത്തിലും ശരീരത്തിന്റെ വിവിധ ഭാഗങ്ങളിലും നഖം കൊണ്ട് മുറിവേല്‍പ്പിച്ച ശിശുക്ഷേമ സമിതിയിലെ 3 ആയമാര്‍ക്കെതിരെ കുറ്റപത്രം. . കേസന്വേഷണഘട്ടത്തില്‍ തെളിവുനശിപ്പിക്കാന്‍ നഖം മുറിച്ച ശേഷമാണ് ആയമാര്‍ പോലീസ് സ്റ്റേഷനില്‍ എത്തിയത്. തിരുവനന്തപുരം സ്‌പെഷ്യല്‍ പോക്‌സോ കോടതിയിലാണ് സിറ്റി മ്യൂസിയം പോലീസ് കുറ്റപത്രം സമര്‍പ്പിച്ചത്. 2024 ഡിസംബര്‍ 3 നാണ് ആയമാര്‍ അറസ്റ്റിലായത്.

മര്‍ദനമേറ്റത് മാതാപിതാക്കള്‍ മരിച്ച കുഞ്ഞിനായിരുന്നു. അമ്മയുടെ മരണത്തിന് ശേഷം അച്ഛന്‍ ആത്മഹത്യ ചെയ്തതോടെയാണ് രണ്ടര വയസുകാരിയെ ഇവിടെ എത്തിച്ചത്. ശിശു ക്ഷേമ സമിതി ജനറല്‍ സെക്രട്ടറി അരുണ്‍ ഗോപിയുടെ പരാതിയിലാണ് മ്യൂസിയം പോലീസ് കേസെടുത്തത്. 2024 ഡിസംബര്‍ 2 നാണ് കുഞ്ഞിന്റെ ദേഹത്തെ മുറിവുകള്‍ കണ്ടത്. സ്ഥാപനത്തിലെ മറ്റൊരു ആയ കുട്ടിയെ കുളിപ്പിക്കുന്നതിനിടെയാണ് മുറിവ് ശ്രദ്ധയില്‍പ്പെടുന്നത്. ഇതിന് പിന്നാലെ ഇവര്‍ ജനറല്‍ സെക്രട്ടറിയെ വിവരമറിയിച്ചു. തുടര്‍ന്ന് തൈക്കാട് കുട്ടികളുടെ ആശുപത്രിയിലെത്തിച്ച് കുഞ്ഞിനെ വൈദ്യപരിശോധനക്ക് വിധേയമാക്കി.

പരിശോധനയില്‍ മുറിവുള്ളതായി കണ്ടെത്തിയതിന് പിന്നാലെ ശിശു ക്ഷേമ സമിതി ജനറല്‍ സെക്രട്ടറി അരുണ്‍ ഗോപി പൊലീസില്‍ പരാതിപ്പെടുകയായിരുന്നു. പൊലീസെത്തി മൊഴിയെടുത്ത ശേഷമാണ് മൂവരെയും 2024 ഡിസംബര്‍ 3 ന് അറസ്റ്റ് ചെയ്തത്. സംഭവത്തിന് ഒരാഴ്ച മുമ്പ് ജോലി ചെയ്ത ആയമാരെയും പിരിച്ചു വിട്ടു. ഉപദ്രവിച്ചതിനും വിവരം മറച്ചുവച്ചതിനും കേസെടുത്തിരുന്നു.