കെഎസ്ആര്ടിസി ബസിലെ പിടിച്ചുപറിക്കാര്ക്ക് തടവുശിക്ഷ
കെഎസ്ആര്ടിസി ബസില് വെച്ച് യാത്രക്കാരിയുടെ പഴ്സ് തട്ടിപ്പറിച്ച് കടന്നുകളഞ്ഞ തമിഴ്നാട് സ്വദേശിനികള്ക്ക് തിരുവനന്തപുരം കോടതി തടവുശിക്ഷ വിധിച്ചു. പുതുതായി നിലവില് വന്ന ഭാരതീയ ന്യായ സംഹിത (ബിഎന്എസ്) 304-ാം വകുപ്പ് പ്രകാരമുള്ള പിടിച്ചുപറി കുറ്റത്തിന് കേരളത്തില് രേഖപ്പെടുത്തുന്ന ആദ്യത്തെ വിധി കൂടിയാണിത്.
തെങ്കാശി സ്വദേശിനികളായ മഹേശ്വരി, പാര്വതി എന്നിവരെയാണ് ഒരു വര്ഷം തടവിനും രണ്ടായിരം രൂപ പിഴ ഒടുക്കാനും ശിക്ഷിച്ചത്. പിഴത്തുക കേസില് ഒന്നാം സാക്ഷിയായ യാത്രക്കാരിക്ക് നല്കാനും കോടതി ഉത്തരവിട്ടു. തിരുവനന്തപുരം ഒന്നാം ക്ലാസ് ജുഡീഷ്യല് മജിസ്ട്രേട്ട് കോടതി നാലിലെ സിവില് ജഡ്ജി (ജൂനിയര് ഡിവിഷന്) ശ്വേത ശശികുമാറാണ് വിധി പ്രസ്താവിച്ചത്.
കഴിഞ്ഞ 2025 ജൂലൈ ഒന്നിനാണ് കേസിനാസ്പദമായ സംഭവം നടന്നത്. തിരുവനന്തപുരത്തേക്ക് പോവുകയായിരുന്ന കെഎസ്ആര്ടിസി ബസ് അമ്പലംമുക്ക് ബസ് സ്റ്റോപ്പില് നിര്ത്തിയ സമയം, പേരൂര്ക്കടയില് നിന്ന് ബസില് കയറിയ പാലോട് സ്വദേശിയായ യാത്രക്കാരിയുടെ പഴ്സാണ് പ്രതികള് തന്ത്രപരമായി തട്ടിപ്പറിച്ച് ഓടി രക്ഷപ്പെടാന് ശ്രമിച്ചത്.
എന്നാല്, പേരൂര്ക്കട പോലീസ് അന്ന് തന്നെ പ്രതികളെ അതിവേഗം പിടികൂടി കേസ് രജിസ്റ്റര് ചെയ്തു. കേരളത്തിലെ വിവിധ പോലീസ് സ്റ്റേഷനുകളില് സമാനമായ നിരവധി കേസുകളില് ഉള്പ്പെട്ടിട്ടുള്ള ഈ പ്രതികള് പലപ്പോഴും വ്യാജ പേരും വിലാസവുമാണ് നല്കിയിരുന്നത്. ജാമ്യത്തിലിറങ്ങി ഒളിവില് പോകുന്ന ഈ രീതിയിലുള്ള തമിഴ്നാട് സംഘങ്ങളുടെ കുറ്റകൃത്യങ്ങള് തടയുന്നതില് ഈ വിധി നിര്ണായകമായേക്കും.
കേസ് അന്വേഷണം രണ്ടാഴ്ചയ്ക്കുള്ളില് പൂര്ത്തിയാക്കി അതിവേഗം കുറ്റപത്രം സമര്പ്പിക്കുകയും വിചാരണ നടപടികള് വേഗത്തില് പൂര്ത്തിയാക്കുകയുമായിരുന്നു. പ്രോസിക്യൂഷന് വേണ്ടി അസിസ്റ്റന്റ് പബ്ലിക് പ്രോസിക്യൂട്ടര് കെ.എസ്.അരുണ് ഹാജരായി. പുതിയ ക്രിമിനല് നിയമത്തിലെ, പുതുതായി ഉള്പ്പെടുത്തിയ പിടിച്ചുപറി വകുപ്പ് പ്രകാരമുള്ള ഈ ആദ്യ ശിക്ഷാവിധി കുറ്റകൃത്യങ്ങള് തടയുന്നതിന് ഒരു ശക്തമായ സന്ദേശം നല്കുമെന്നാണ് വിലയിരുത്തല്.
https://www.facebook.com/Malayalivartha
