അസമിൽ നിന്നു പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടു വന്നു തലസ്ഥാനത്ത് വീട്ടുജോലിക്കു നിർത്തിയെന്ന ആസാം കുട്ടിക്കടത്ത് കേസിൽ രണ്ടു പ്രതികൾക്ക് മുൻകൂർ ജാമ്യം അനുവദിച്ചു. തിരുവനന്തപുരം മെഡിക്കൽ കോളേജ് സ്റ്റേഷൻ പരിധിക്കകത്ത് താമസിക്കുന്ന രണ്ടും മൂന്നും പ്രതികളായ   ജിൻസി എബ്രഹാം , സിബി കുര്യൻ  എന്നിവർക്കാണ് മുൻകൂർ ജാമ്യം നൽകിയത്. രണ്ടും മൂന്നും പ്രതികളെ കസ്റ്റഡിയിൽ ചോദ്യം ചെയ്യാൻ പോലീസ് റിപ്പോർട്ടിൽ  ആവശ്യപ്പെട്ടിട്ടില്ലെന്ന് നിരീക്ഷിച്ചാണ് തിരുവനന്തപുരം പ്രിൻസിപ്പൽ ജില്ലാ സെഷൻസ് ജഡ്ജി നസീറയാണ് ജാമ്യം അനുവദിച്ചത്.   മനുഷ്യക്കടത്തിന്  തിരുവനന്തപുരം സ്വദേശികളായ ജോൺസൺ, ജിൻസി , സിബി എന്നീ  3  പേർക്കെതിരെയാണ് ജൂലൈ 23 ന് സിറ്റി മെഡിക്കൽ കോളേജ് പോലീസ് കേസെടുത്തത്. 13 വയസ്സുള്ള പെൺകുട്ടിയെ അരുണാചൽ പ്രദേശിൽ കൊണ്ടുപോയി പഠിപ്പിക്കാമെന്നു  കുടുംബത്തെ വിശ്വസിപ്പിച്ച ഒന്നാം പ്രതി ജോൺസൺ  2024 ഡിസംബറിൽ കുട്ടിയെ അരുണാചൽ പ്രദേശിലെ തന്റെ വീട്ടിൽ താമസിപ്പിച്ച്  ജോലികൾ ചെയ്യിച്ചു. 2024 ഡിസംബർ അവസാനത്തോടെ കുട്ടിയെ കേരളത്തിലെത്തിച്ചു വീട്ടുജോലിക്കു നിർത്തി. 
2025 ജനുവരിയിൽ രണ്ടും മൂന്നും പ്രതികളായ ജിൻസിയും സിബിയും ചേർന്നു കുട്ടിയെ അവരുടെ വീട്ടിൽ കൊണ്ടുവന്നു. പ്രതികളുടെ മൂന്നു മക്കളെ നോക്കുന്നതിനുള്ള ഉത്തരവാദിത്തം പെൺകുട്ടിയെ ഏൽപിക്കുകയും നിർബന്ധിച്ചു ഭക്ഷണം പാചകം ചെയ്യിക്കുകയും ചെയ്തു. കുട്ടിയുടെ ബന്ധുക്കളെ ഫോൺ വിളിക്കുന്നത് തടഞ്ഞതായും പൊലീസ് എഫ്ഐആറിൽ പറയുന്നു.   ജൂലൈ 21 ന് പെൺകുട്ടി പരാതിയുമായി മ്യൂസിയം പൊലീസ് സ്റ്റേഷനിൽ എത്തുകയും പൊലീസ് സിഡബ്ല്യുസിയിൽ വിവരം അറിയിക്കുകയും ചെയ്യുകയായിരുന്നു. സിഡബ്ല്യുസി അധികൃതർ കുട്ടിയുടെ സംരക്ഷണം ഏറ്റെടുത്ത ശേഷം  മൊഴി രേഖപ്പെടുത്തി പൊലീസിനു കൈമാറി.  സി‍ഡബ്ല്യുസി റിപ്പോർട്ടിന്റെ അടിസ്ഥാനത്തിൽ മെഡിക്കൽകോളജ് പൊലീസ് കേസ് റജിസ്റ്റർ ചെയ്ത് അന്വേഷണം ആരംഭിച്ചതോടെയാണ് പ്രതികൾ മുൻകൂർ ജാമ്യം തേടിയത്.