അടൂരില്‍ പിതാവ് നാലുവയസ്സുകാരന്‍ മകനുമായി സ്വകാര്യബസിന് മുന്നില്‍ ചാടി ആത്മഹത്യ ചെയ്യാന്‍ ശ്രമിച്ചു. ബസ് ഡ്രൈവറുടെ സമയോചിതമായ ഇടപെടലില്‍ വലിയ ഒരു അപകടം ആണ് ഒഴിവായത്. തിങ്കളാഴ്ച രാവിലെ 9.30ന് പത്തനതിട്ട അടൂര്‍ ഇന്ദ്രപ്രസ്ഥ ഹോട്ടലിന് സമീപമായിരുന്നു സംഭവം. സംഭവത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.

റോഡിന്റെ അരികിലൂടെ കുട്ടിയുമായി നടന്നുപോകുകയായിരുന്നു പെട്ടെന്ന് റോഡിന്റെ മധ്യത്തിലേക്കിറങ്ങി ബസിന് മുന്നിലേക്ക് ചാടുകയായിരുന്നു. അടൂര്‍ ചവറ റൂട്ടില്‍ സര്‍വീസ് നടത്തുന്ന 'അശ്വിന്‍' എന്ന ബസിന്റെ മുന്നിലേക്ക് ആണ് കുട്ടിയും ആയി ഇയാളുടെ ആത്മഹത്യാശ്രമം. ബസ് ഡ്രൈവറായ ബി. ഉണ്ണികൃഷ്ണന്‍ ഉടന്‍തന്നെ ബ്രേക്കിട്ട് ബസ് നിര്‍ത്തിയതിനാല്‍ വലിയ അപകടമാണ് ഒഴിവാകുകയായിരുന്നു. സംഭവം കണ്ട് ആളുകള്‍ ഓടിക്കൂടിയതോടെ ഇയാള്‍ കുട്ടിയെയും എടുത്ത് റോഡില്‍നിന്ന് എഴുന്നേല്‍ക്കുകയും ഓടിപ്പോകാന്‍ ശ്രമിക്കുകയുംചെയ്തു. ഇതോടെ നാട്ടുകാര്‍ ഇയാളെ തടഞ്ഞുവെച്ച് പോലീസില്‍ വിവരമറിയിച്ചു. തുടര്‍ന്ന് പോലീസെത്തി ഇരുവരെയും സ്‌റ്റേഷനിലേക്ക് കൊണ്ടുപോയി.

കുട്ടിയുമായി ആത്മഹത്യാശ്രമം നടത്തിയ 45കാരന്‍ ആദിക്കാട്ടുക്കുളങ്ങര സ്വദേശിയാണെന്നാണ് പോലീസില്‍നിന്നുള്ള വിവരം. ഭാര്യയ്ക്കും മകനും ഒപ്പം തിങ്കളാഴ്ച രാവിലെ അടൂര്‍ ജനറല്‍ ആശുപത്രിയില്‍ എത്തിയതാണെന്നും എന്നാല്‍, ആശുപത്രിയില്‍വെച്ച് ഭാര്യയെ കാണാതായെന്നും ഇതിന്റെ വിഭ്രാന്തിയിലാണ് മകനുമായി ബസിന് മുന്നിലേക്ക് ചാടിയതെന്നുമാണ് 45കാരന്റെ മൊഴി. ഈ മൊഴിയുടെ അടിസ്ഥാനത്തില്‍ പോലീസ് അന്വേഷണം നടത്തിവരികയാണ്.