കൊച്ചി എളമക്കരയില്‍ പ്ലസ് വണ്‍ വിദ്യാര്‍ത്ഥിനിക്ക് ഗുരുതര പരിക്കേറ്റ അപകടത്തിന് കാരണക്കാര്‍ രക്ഷകരായി വന്നവരെന്ന് സി സി ടി വി ദൃശ്യം. ദൃശ്യങ്ങളില്‍ ഉള്ള കാര്‍ അല്ല ദീക്ഷിതയെ ഇടിച്ചതെന്നും വഴിയരികില്‍ പാര്‍ക്ക് ചെയ്ത വാനിന്റെ ഡോര്‍ തുറന്നപ്പോഴായിരുന്നു അപകടമെന്നും പൊലീസ് കണ്ടെത്തി. പുതിയ സി സി ടി വി ദൃശ്യങ്ങളാണ് വഴിത്തിരിവായത്. കുട്ടി അപകടത്തില്‍പ്പെടാന്‍ കാരണമായ വാന്‍ ഓടിച്ചിരുന്ന സുഭാഷ് നഗര്‍ സ്വദേശി രാജിയെ അറസ്റ്റ് ചെയ്തു.

അപകടത്തിന് തൊട്ടു പിന്നാലെ ദീക്ഷിതയെ റോഡില്‍ നിന്ന് മാറ്റിയതടക്കമുള്ള രക്ഷാപ്രവര്‍ത്തനം നടത്തിയത് രാജിയുടെ നേതൃത്വത്തില്‍ ആയിരുന്നു. പുതിയ ദൃശ്യങ്ങളുടെ അടിസ്ഥാനത്തില്‍ കസ്റ്റഡിയില്‍ എടുത്ത് ചോദ്യം ചെയ്തപ്പോളാണ് രാജി കുറ്റം സമ്മതിച്ചത്. പേടിച്ചിട്ടാണ് ആരോടും പറയാതിരുന്നതെന്ന് രാജി തുറന്നു പറഞ്ഞു. വാഹനം അശ്രദ്ധമായി കൈകാര്യം ചെയ്തതിന് രാജിയെ അറസ്റ്റ് ചെയ്ത് ജാമ്യത്തില്‍ വിട്ടയച്ചു. കരളിന് പരിക്കേറ്റ ദീക്ഷിത അപകടനില തരണം ചെയ്തത് ആശ്വാസമായി.

എളമക്കര ഭവന്‍സ് സ്‌കൂളിലെ പ്ലസ് വണ്‍ വിദ്യാര്‍ത്ഥിനി ദീക്ഷിത സൈക്കിളില്‍ വീട്ടിലേക്ക് മടങ്ങുമ്പോഴായിരുന്നു അപകടം. ആദ്യം പുറത്തു വന്ന സി സി ടി വി ദൃശ്യങ്ങളില്‍ ദീക്ഷിത വീഴുന്നതും ഒരു കിയ സോണറ്റ് കാര്‍ കടന്നു പോകുന്നതും കാണാം. ഒന്ന് ബ്രേക്ക് ചെയ്ത ശേഷം വാഹനം നിര്‍ത്താതെ പോയത് സംശയം ഇരട്ടിപ്പിച്ചു. ദൃശ്യങ്ങളിലെവിടെയും കാറിന്റെ നമ്പര്‍ വ്യക്തമായിരുന്നില്ല. ഒടുവില്‍ പല ക്യാമറകളില്‍ നിന്ന് ലഭിച്ച സൂചനകളുടെ അടിസ്ഥാനത്തില്‍ വാഹനം കടവന്ത്ര സ്വദേശിയുടേതെന്ന് കണ്ടെത്തി. പക്ഷേ എത്ര ചോദ്യം ചെയ്തിട്ടും അപകടമുണ്ടാക്കിയത് താനല്ലെന്ന് അയാള്‍ ഉറപ്പിച്ചു പറഞ്ഞു. കാറിലും അപകടത്തിന്റെ സൂചനകള്‍ ഇല്ല.

അപകടത്തിന്റെ ട്രോമയില്‍ കഴിയുന്ന ദീക്ഷിതയ്ക്കാണെങ്കില്‍ ഒന്നും ഓര്‍മയില്ല. സംശയം തോന്നിയ പൊലീസ് പിന്നിലേക്ക് പരിശോധിച്ചു. എല്ലാ കുറ്റകൃത്യങ്ങളിലും ഒരു തെളിവെങ്കിലും ശേഷിക്കുമെന്ന സിദ്ധാന്തം ഇവിടെയും ആവര്‍ത്തിച്ചു. റോഡിന് എതിര്‍വശത്ത് ആരുടെയും ശ്രദ്ധയില്‍ പെടാതിരുന്ന ക്യാമറയില്‍ അതാ ഞെട്ടിപ്പിക്കുന്ന തെളിവ്. പെണ്‍കുട്ടി കടന്നു പോകുന്നതിന് തൊട്ടു മുന്‍പ് അവിടെ എത്തിയ ഈക്കോ വാനിന്റെ ഡോര്‍ തുറക്കുന്നു, സൈക്കിളില്‍ തട്ടുന്നു. വാന്‍ ഓടിച്ചിരുന്നത് സുഭാഷ് നഗര്‍ സ്വദേശി രാജി. അപകടത്തിന് തൊട്ടു പിന്നാലെ ദീക്ഷിതയെ റോഡില്‍ നിന്ന് മാറ്റിയതടക്കമുള്ള രക്ഷാപ്രവര്‍ത്തനം നടത്തിയത് രാജിയുടെ നേതൃത്വത്തില്‍ ആയിരുന്നു. കസ്റ്റഡിയില്‍ എടുത്ത് ചോദ്യം ചെയ്തപ്പോള്‍ രാജി കുറ്റം സമ്മതിച്ചു. പേടിച്ചിട്ടാണ് ആരോടും പറയാതിരുന്നതെന്ന് രാജി തുറന്നു പറഞ്ഞു.