മുഖ്യമന്ത്രിക്ക് ഡല്ഹി വിമാനത്താവളത്തിലും കേരളഹൗസിലും ഉജ്ജ്വലസ്വീകരണം, ഉപരാഷ്ട്രപതി ഹമീദ് അന്സാരിയുമായി കൂടിക്കാഴ്ച നടത്തി
കേരള മുഖ്യമന്ത്രി പിണറായി വിജയന് ഡല്ഹി വിമാനത്താവളത്തിലും കേരളഹൗസിലും ഉജ്ജ്വലസ്വീകരണം. ഡല്ഹി മലയാളികളും കേരളഹൗസിലെ ജീവനക്കാരും ചേര്ന്ന് ഗംഭീരസ്വീകരണമാണ് മുഖ്യമന്ത്രിക്കൊരുക്കിയത്. വാദ്യമേളങ്ങളും, പടക്കങ്ങളും, ആര്പ്പുവിളികളും ചേര്ന്നൊരുക്കിയ ഉത്സവാന്തരീക്ഷത്തിലേക്ക് വന്നിറങ്ങിയ പിണറായിയെ കേരളഹൗസ് റസിഡന്റ് കമ്മീഷണര് ഗ്യാനേന്ദ്രകുമാറിന്റെ നേത്യത്വത്തിലുള്ള ഉദ്യോഗസ്ഥര് സ്വീകരിച്ചു.
തുടര്ന്ന് ഔദ്യോഗിക വസതിയിലെത്തി ഉപരാഷ്ട്രപതി ഹമീദ് അന്സാരിയെ സന്ദര്ശിച്ച പിണറായി വിജയന് പിന്നീട് ധനമന്ത്രി അരുണ് ജയ്റ്റ്ലിയുമായും കൂടിക്കാഴ്ച നടത്തി. ചീഫ് സെക്രട്ടറി എം.എസ്.വിജയാനന്ദും അഡീഷണല് ചീഫ് സെക്രട്ടറിയും മുഖ്യമന്ത്രിയുടെ പ്രിന്സിപ്പല് സെക്രട്ടറിയുമായ നളിനി നെറ്റോയും കൂടിക്കാഴ്ചയില് പങ്കെടുത്തു.
സംസ്ഥാനം നേരിടുന്ന സാമ്പത്തികപ്രശ്നങ്ങളെക്കുറിച്ച് ചീഫ് സെക്രട്ടറി അരുണ് ജെയ്റ്റലിക്ക് വിശദീകരിച്ചു കൊടുത്തു. ജി.എസ്ടി ബില് പാസാക്കാന് സംസ്ഥാന സര്ക്കാരിന്റേയും സിപിഎമ്മിന്റേയും പിന്തുണ തരണമെന്ന് കൂടിക്കാഴ്ചയ്ക്കിടെ ജെയ്റ്റ്ലി പിണറായിയോടും അഭ്യര്ത്ഥിച്ചു.
ഇനി ഉച്ചയ്ക്ക് ശേഷം രാഷ്ട്രപതി പ്രണബ് മുഖര്ജിയേയും പ്രധാനമന്ത്രി നരേന്ദ്രമോദിയേയും പിണറായി സന്ദര്ശിക്കും. അധികാരമേല്ക്കുന്ന മുഖ്യമന്ത്രിമാര് ആദ്യമായി തലസ്ഥാനത്ത് വരുമ്പോള് രാഷ്ട്രപതിയേയും ഉപരാഷ്ട്രപതിയേയും പ്രധാനമന്ത്രിയേയും സന്ദര്ശിക്കുന്നതാണ് പൊതുവെയുള്ള കീഴ്വഴക്കം. രാവിലെ സിപിഎം സംസ്ഥാന സെക്രട്ടറി കൊടിയേരി ബാലകൃഷ്ണന്, പോളിറ്റ് ബ്യൂറോ അംഗം എം.എ.ബേബി എന്നിവര്ക്കൊപ്പമാണ് പിണറായി വിജയന് ഡല്ഹിയില് വിമാനമിറങ്ങിയത്. നാളെ നടക്കുന്ന സിപിഎം പോളിറ്റ് ബ്യൂറോ യോഗത്തിലും അദേഹം പങ്കെടുക്കുന്നുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
