സംസ്ഥാനത്ത് സ്വർണവില ഇന്നും വർദ്ധനവ്. ​ഗ്രാമിന് 85 രൂപ വർധിച്ച് 14,970 രൂപയും പവന് 680 രൂപ വർധിച്ച് 1,19,760 രൂപയുമായി. ഇന്നത്തെ വിലയിൽ സംസ്ഥാനത്ത് ഒരു പവൻ സ്വർണാഭരണം വാങ്ങാൻ 1.35 ലക്ഷം രൂപ വേണം. മൂന്നു ശതമാനം ജിഎസ്ടി, 10 ശതമാനം പണിക്കൂലി, ഹോൾമാർക്കിങ് ചാർജ് അതിൻറെ നികുതി എന്നിവ സഹിതമാണിത്. ആഭരണങ്ങളുടെ ഡിസൈൻ അനുസരിച്ച് മൂന്നു ശതമാനം മുതൽ മുപ്പതു ശതമാനം വരെയാണ് സംസ്ഥാനത്ത് പണിക്കൂലി ഈടാക്കുന്നത്.

കഴിഞ്ഞ കുറച്ചുദിവസങ്ങളായി സ്വർണവില കൂടിയും കുറഞ്ഞും നിൽക്കുകയായിരുന്നു. എന്നാൽ ഇന്നലത്തെ വില വർധനവ് ഇന്നും തുടരുന്ന കാഴ്ചയാണ് വിപണിയിലുള്ളത്. ‘സുരക്ഷിത നിക്ഷേപം’ എന്ന നിലയിൽ സ്വർണനിക്ഷേപ പദ്ധതികൾ, സ്വർണക്കട്ടികൾ എന്നിവയ്ക്കും ആവശ്യക്കാർ നിരവധിയാണ്.
അതേസമയം വില കുതിക്കാൻ തുടങ്ങിയതോടു കൂടി സ്വർണം വാങ്ങാൻ ആളുകൾ മടിക്കുന്ന സാഹചര്യമുണ്ട്. ഇത് വ്യാപാരികളെയും പ്രതിസന്ധിയിലാക്കി. ഡിസംബർ 23ന് വില ഒരു ലക്ഷം കടന്നതിന് പിന്നാലെ പിന്നീടുള്ള ദിവസങ്ങളിലും വില ഉയരുന്നതാണ് ദൃശ്യമായത്

. പാരമ്പരാ​ഗത രീതിയിൽ നിന്നും മാറി വിവാഹ ആവശ്യക്കാർ കൂടുതലും സ്വർണം ഒഴിവാക്കിയുള്ള ബദൽ മാർ​ഗങ്ങളാണ് സ്വീകരിച്ചു വരുന്നത്. വിവാഹ ആവശ്യങ്ങൾക്കായി സ്വർണാഭരണം പോലെ തോന്നിപ്പിക്കുന്ന ആഭരണങ്ങൾ വാങ്ങുകയും വാടകയ്ക്ക് എടുക്കുകയും ചെയ്യുന്ന ട്രെൻഡാണ് നിലവിൽ കേരളത്തിലിപ്പോഴുള്ളത്.