കുംഭമേളയിലൂടെ സമൂഹമാധ്യമങ്ങളിൽ തരംഗമായ ഇൻഡോർ സ്വദേശിനി മൊണാലിസ ഭോസ്‌ലെ പ്രണയസാഫല്യത്തിനായി തിരുവനന്തപുരത്ത് പൊലീസ് സഹായം തേടി. വീട്ടുകാരുടെ എതിർപ്പിനെത്തുടർന്ന് കാമുകൻ ഫർമാൻ ഖാനൊപ്പമാണ് താരം തമ്പാനൂർ പൊലീസ് സ്റ്റേഷനിലെത്തിയത്. ഒന്നര വർഷം മുൻപ് ഇൻസ്റ്റാഗ്രാമിലൂടെ ആരംഭിച്ച പ്രണയമാണ് മൊണാലിസയെയും മഹാരാഷ്ട്ര സ്വദേശി ഫർമാൻ ഖാനെയും കേരളത്തിലെത്തിച്ചത്. ഇരുവരുടെയും വിവാഹത്തിന് മൊണാലിസയുടെ കുടുംബം കടുത്ത എതിർപ്പിലായിരുന്നു. പിതാവ് തന്നെ മറ്റൊരു വിവാഹത്തിന് നിർബന്ധിക്കുകയാണെന്നും തനിക്ക് ഫർമാനൊപ്പം ജീവിക്കണമെന്നും ആവശ്യപ്പെട്ടാണ് മൊണാലിസ പൊലീസിനെ സമീപിച്ചത്. ഷൂട്ടിംഗിനായി കേരളത്തിലെത്തിയതായിരുന്നു ഇരുവരും.

എന്നാൽ സുരക്ഷാ ഭീഷണിയുണ്ടെന്ന തോന്നലിൽ തമ്പാനൂർ സ്റ്റേഷനിൽ നേരിട്ടെത്തി അഭയം ചോദിക്കുകയായിരുന്നു. ഇരുവരുടെയും മൊഴി രേഖപ്പെടുത്തിയ പൊലീസ്, പ്രായപൂർത്തിയായവർ എന്ന നിലയിൽ അവർക്ക് നിയമപരമായ സംരക്ഷണം ഉറപ്പാക്കുമെന്ന് അറിയിച്ചു. നിലവിൽ ഇരുവരും താമസസ്ഥലത്തേക്ക് മടങ്ങിയിട്ടുണ്ട്. രാജ്യത്തെ പലയിടങ്ങളിലും തങ്ങളുടെ ബന്ധത്തിന് വലിയ എതിർപ്പുകൾ നേരിടേണ്ടി വരുമെന്ന് ഉറപ്പുള്ളതിനാലാണ് സുരക്ഷിതമായ ഇടമെന്ന നിലയിൽ കേരളത്തിൽ അഭയം തേടിയതെന്ന് ഇരുവരും പൊലീസിനെ അറിയിച്ചു. യുവതിയുടെ പരാതിയെത്തുടർന്ന് മോണാലിസയുടെ പിതാവ് ജയ് സിങ് ഭോസ് ലയെ തമ്പാനൂർ പൊലീസ് സ്റ്റേഷനിലേക്ക് വിളിച്ചുവരുത്തി.

മോണാലിസയ്ക്ക് 18 വയസ് പൂർത്തിയായ സാഹചര്യത്തിൽ, സ്വന്തം ഇഷ്ടപ്രകാരം ആരെ വിവാഹം കഴിക്കണമെന്നും ആർക്കൊപ്പം ജീവിക്കണമെന്നും തീരുമാനിക്കാനുള്ള നിയമപരമായ അവകാശം അവർക്കുണ്ടെന്ന് പൊലീസ് വീട്ടുകാരെ ബോധ്യപ്പെടുത്തി. ഒടുവില്‍ തന്റെ പ്രിയതമനൊപ്പം പൂവാറിലേക്ക് മടങ്ങണമെന്ന ഉറച്ച നിലപാടിൽ മോണാലിസ ഉറച്ചുനിന്നതോടെ പിതാവിന്റെയും സിനിമയുടെ അണിയറ പ്രവര്‍ത്തകരുടെയും സാന്നിധ്യത്തിൽ സ്റ്റേഷനിലെ നടപടിക്രമങ്ങൾക്ക് ശേഷം ഇവരെയും വിട്ടയച്ചു. ‌

മഹാകുംഭമേളയിലൂടെ സോഷ്യൽ മീഡിയയിൽ തരംഗമായ പെൺകുട്ടിയാണ് മൊണാലിസ ഭോസ്‌ലെ. പ്രയാഗ്‌രാജിലെ കുംഭമേളയിൽ രുദ്രാക്ഷ മാലകൾ വിറ്റിരുന്ന മൊണാലിസയുടെ വീഡിയോ വൈറലായതോടെയാണ് ലോകശ്രദ്ധ നേടിയത്. പ്രശസ്തി ഉപദ്രവമായി മാറിയപ്പോൾ, അച്ഛൻ അവളെ നാടായ ഇൻഡോറിലേക്ക് പറഞ്ഞുവിടുകയും ചെയ്തിരുന്നു. പിന്നാലെ സിനിമാ അവസരങ്ങളും മൊണാലിസയെ തേടിയെത്തി.

'ദ ഡയറി ഓഫ് മണിപ്പൂർ' എന്നതാണ് മൊണാലിസ അഭിനയിക്കുന്ന ആദ്യ സിനിമ. നടൻ രാജ്കുമാർ റാവുവിന്റെ സഹോദരൻ അമിത് റാവു നായകനായെത്തുന്ന സിനിമ സംവിധാനം ചെയ്യുന്നത് സനോജ് മിശ്രയാണ്. മൊണാലിസയെക്കുറിച്ച് വീഡിയോകളിലൂടെ അറിഞ്ഞപ്പോഴാണ്, തന്റെ പുതിയ നായികയായി അവളെ സനോജ് മിശ്ര തിരഞ്ഞെടുക്കുന്നതെന്ന് അദ്ദേഹം തന്നെ വ്യക്തമാക്കിയിട്ടുണ്ട്.