പരാതികളില്‍ റെയ്ഡും മിന്നല്‍ പരിശോധനയും വമ്പന്‍മാര്‍ക്കെതിരെ ഉണര്‍ന്നെഴുന്നേറ്റ് ആദായ നികുതി വകുപ്പ്. മുത്തൂറ്റ് ഗ്രൂപ്പിന്റെ എല്ലാ ഓഫീസുകളിലും ഉടമകളുടേയും പ്രധാന ജീവനക്കാരുടേയും വീടുകളിലും വ്യാപകമായ റെയ്ഡ്. അദായനികുതി വകുപ്പാണ് റെയ്ഡ് നടത്തുന്നത്. ആദായനികുതി കൃത്യമായി അടയ്ക്കുന്നില്ലെന്ന പരാതിയിലാണ് നടപടിയെന്നാണ് സൂചന. അറുപത് പ്രധാന കേന്ദ്രങ്ങളിലാണ് പരിശോധന നടക്കുന്നത്. മുന്നൂറോളം ഉദ്യോഗസ്ഥര്‍ പരിശോധനയില്‍ പങ്കെടുക്കുന്നുണ്ട്. കൊച്ചി ആദായ നികുതി ഓഫീസിന്റെ മേല്‍നോട്ടത്തിലാണ് റെയ്ഡ്. സ്വര്‍ണപ്പണയത്തില്‍ അടക്കം പരസ്യത്തില്‍ കാണിക്കാത്ത പലിശ ഈടാക്കലും തട്ടിപ്പും ഇത്തരം സ്വകാര്യ ഇടപാടുകാരുടെ സ്ഥിരം സംഭവമാണ്. ഇതിനെക്കുറിച്ച് വ്യാപക പരാതികള്‍ ഉണ്ട്.
മുത്തൂറ്റ് ജോര്‍ജ്, മുത്തൂറ്റ് പാപ്പച്ചന്‍, മിനി മുത്തൂറ്റ്, മുത്തൂറ്റ് മെര്‍ക്കന്റയില്‍ എന്നീ സ്ഥാപനങ്ങളാണ് മുത്തൂറ്റിന്റെ പേരിലുള്ളത്. മുത്തൂറ്റ് കുടുംബത്തിലെ സഹോദരന്മാരാണ് ഇവ നടക്കുന്നത്. കോഴഞ്ചേരിയിലെ ഒരു കെട്ടിടത്തിലാണ് ഈ സ്ഥാപനങ്ങളുടെ എല്ലാം രജിസ്‌റ്റേര്‍ഡ് ഓഫീസ്. എന്നാല്‍ ഓരോ വിഭാഗത്തിനും പ്രത്യേകം കോര്‍പ്പറേറ്റ് ഓഫീസുകളുണ്ട്. ഇവിടെയെല്ലാം പരിശോധന നടക്കുന്നുണ്ട്. ഈ ഗ്രൂപ്പുകളുമായി ബന്ധപ്പെട്ട് നിരവധി പരാതികളാണ് അദായനികുതി വകുപ്പിന് ലഭിച്ചിട്ടുള്ളത്. കഴിഞ്ഞ യുപിഎ സര്‍ക്കാരിന്റെ കാലത്ത് തന്നെ ഇത്തരം പരാതികള്‍ ലഭിച്ചെങ്കിലും നടപടികളെടുക്കാന്‍ കഴിഞ്ഞില്ല. ഉന്നത സ്വാധീനമായിരുന്നു ഇതിന് കാരണം.
കേന്ദ്ര സര്‍ക്കാര്‍ മാറിയതോടെ ഈ പരാതികള്‍ പൊടി തട്ടിയെടുക്കുകയായിരുന്നുവെന്നാണ് സൂചന. നേരത്തെ കിംസ് ആശുപത്രി ഗ്രൂപ്പിനെതിരെയും ഇത്തരത്തില്‍ വ്യാപക പരിശോധന നടന്നിരുന്നു. ഈ നടപടികള്‍ പൂര്‍ത്തിയായതോടെ മുത്തൂറ്റിനെതിരായ ഫയല്‍ തുറക്കുകയായിരുന്നു. നികുതി വെട്ടിപ്പ്, കള്ളപ്പണ ഇടപാട്, വരുമാനത്തില്‍ കവിഞ്ഞ സ്വത്ത് സമ്പാദനം, കുഴല്‍പ്പണം ഇടപാട് തുടങ്ങി നിരവധി പരാതികള്‍ മുത്തൂറ്റിനെതിരെ ലഭിച്ചിട്ടുണ്ട്. ഇത്തരം പരാതികളില്‍ കഴമ്പുണ്ടോയെന്നാണ് ഇന്നത്തെ റെയ്ഡിലെ പ്രധാന അന്വേഷണം. ഇക്കാര്യത്തില്‍ അന്തിമ നിഗമനങ്ങളെടുക്കാന്‍ ദിവസങ്ങളുടെ വിലയിരുത്തലുകള്‍ വേണ്ടിവരും.
മുത്തൂറ്റ് പാപ്പച്ചന്‍ ഗ്രൂപ്പലാണ് പ്രധാനമായും പരിശോധന. സ്വര്‍ണ വായ്പാരംഗത്ത് സജീവമായുള്ള സ്ഥാപനം താഴേക്കിടയിലുള്ള ജനവിഭാഗത്തിനായി മൈക്രോ ഫിനാന്‍സ് രംഗത്ത് ഭവന വായ്പവരെയുള്ള വ്യത്യസ്ത വായ്പകള്‍ മുത്തൂറ്റ് പാപ്പച്ചന്റെ മുത്തൂറ്റ് ഫിന്‍കോര്‍പ്പ് നല്‍കുന്നുണ്ട്. അടുത്ത 5 വര്‍ഷത്തിനുള്ളില്‍ ഉപയോക്താക്കളുടെ എണ്ണം 50,000 ആക്കുവാനാണ് മുത്തൂറ്റ് ഹൗസിങ് ഫിനാന്‍സ് ലക്ഷ്യമിടുന്നത്. ഗ്രൂപ്പ് സംരംഭമായ മുത്തൂറ്റ് മൈക്രോഫിന്‍, 10 ലക്ഷം വനിതാ സംരംഭകരുമായി ഇപ്പോള്‍ രാജ്യത്തെ മുന്‍നിര മൈക്രോഫിനാന്‍സ് കമ്പനികളില്‍ 7ാം സ്ഥാനത്താണ്. 2018ഓടുകൂടി ഗ്രാമീണമേഖലയില്‍ 50 ലക്ഷം കുടുംബങ്ങള്‍ക്ക് വായ്പകള്‍ നല്‍കി മൈക്രോ ഫിനാന്‍സ്രംഗത്ത് രണ്ടാംസ്ഥാനത്തെത്തുകയാണ് ലക്ഷ്യം.
വമ്പന്‍മാരെ തൊടാന്‍ ആരും ധൈര്യപ്പെടില്ലെന്നതാണ് ഇവരുടെ ഹുങ്ക്. അതാണ് സകല തട്ടിപ്പുകള്‍ക്കും വിളനിലമാകുന്നത്. രാഷ്ട്രീയക്കാര്‍ കടന്നാക്രമിക്കാതെ ഉദ്യോഗസ്ഥര്‍ അവരുടെ ജോലി കൃത്യമായി ചെയ്താല്‍ ഒരു പരിധിവരെയുള്ള പ്രശ്‌നങ്ങള്‍ക്ക് പരിഹാരം കാണാവുന്നതേ ഉള്ളൂ.